nuqush-e-umr-e-guzishta sameT late hain

nuqūsh-e-umr-e-guzishta sameT laate haiñ

ye rañg rañg ke bādal kahāñ se aate haiñ

kabhī kabhī safar-e-zindagī se ruuTh ke ham

tire ḳhayāl ke saa.e meñ baiTh jaate haiñ

tasavvurāt ke hasrat-kade meñ kaun aayā

charāġh tā-had-e-ehsās jalte jaate haiñ

hameñ hai Dar koī tār-e-umīd TuuT na jaa.e

sambhal sambhal ke unheñ hāl-e-dil sunāte haiñ

banā ga.e haiñ vo yuuñ sāz-e-ārzū ghar ko

ki aaj tak dar-o-dīvār gungunāte haiñ

unhīñ se hai mire ashkoñ kī aabrū 'kausar'

jo āb-o-rañg-e-ġhazal ko ġhazal banāte haiñ

nuqush-e-umr-e-guzishta sameT late hain

ye rang rang ke baadal kahan se aate hain

kabhi kabhi safar-e-zindagi se ruTh ke hum

tere KHayal ke sae mein baiTh jate hain

tasawwuraat ke hasrat-kade mein kaun aaya

charagh ta-had-e-ehsas jalte jate hain

hamein hai Dar koi tar-e-umid TuT na jae

sambhal sambhal ke unhen haal-e-dil sunate hain

bana gae hain wo yun saz-e-arzu ghar ko

ki aaj tak dar-o-diwar gungunate hain

unhin se hai mere ashkon ki aabru 'kausar'

jo aab-o-rang-e-ghazal ko ghazal banate hain