phir uske sine mein dil hi nahin jigar hi nahin

phir us ke siine meñ dil hī nahīñ jigar hī nahīñ

jo us ke husn kā shaidā nahīñ bashar hī nahīñ

duā meñ pahle sā ma.arūf ab asar hī nahīñ nahīñ

havā kā ruḳh jo badal de vo chashm-e-tar hī nahīñ

jo dekhnā ho use chashm-e-dil ko khol ke dekh

ki us ke kūche meñ to aql kā guzar hī nahīñ

sunā ke hāl-e-ġham-e-dil jise sukūn mile

koī shanāsā mirā itnā mo'atabar hī nahīñ

maiñ pur-umīd rahā ma.arka koī bhī rahā

magar ye raat ki jis kī koī sahar hī nahīñ

junūn-e-shauq ne zād-e-safar bhī chhīn liyā

hameñ phirāyā faqat is ne dar-ba-dar hī nahīñ

kuchh is tarah se hameñ muflisī ne qaid kiyā

ki ab badan pe taḳhayyul ke bāl-o-par hī nahīñ

ḳhushā-nasīb ki ham ko kuchh aise dost mile

vafā kā jin ke diloñ se koī guzar hī nahīñ

phir us ke sine mein dil hi nahin jigar hi nahin

jo us ke husn ka shaida nahin bashar hi nahin

dua mein pahle sa maruf ab asar hi nahin nahin

hawa ka ruKH jo badal de wo chashm-e-tar hi nahin

jo dekhna ho use chashm-e-dil ko khol ke dekh

ki us ke kuche mein to aql ka guzar hi nahin

suna ke haal-e-gham-e-dil jise sukun mile

koi shanasa mera itna mo'atabar hi nahin

main pur-umid raha marka koi bhi raha

magar ye raat ki jis ki koi sahar hi nahin

junun-e-shauq ne zad-e-safar bhi chhin liya

hamein phiraya faqat is ne dar-ba-dar hi nahin

kuchh is tarah se hamein muflisi ne qaid kiya

ki ab badan pe taKHayyul ke baal-o-par hi nahin

KHusha-nasib ki hum ko kuchh aise dost mile

wafa ka jin ke dilon se koi guzar hi nahin