qalb-o-nazar ke silsile meri nigah mein rahe

qalb-o-nazar ke silsile merī nigāh meñ rahe

mujh se qarīb-tar na the jo tirī chaah meñ rahe

qahr-e-ḳhudā kī zad pe kyuuñ aa na sake siyāhkār

kis kī supurdagī meñ the kis kī panāh meñ rahe

sūrat-e-hāl dekh kar sab ko hai fikr ye ki ab

jism amaañ meñ ho na ho kaj to kulāh meñ rahe

dār-o-rasan ke faisle sach ke amiin hoñ agar

thoḌī sī jur.at-e-suḳhan harf-e-gavāh meñ rahe

koī sabab to thā ki 'ġhaus' fahm-o-zakā ke bāvajūd

kār-e-savāb chhoḌ kar kār-e-gunāh meñ rahe

qalb-o-nazar ke silsile meri nigah mein rahe

mujh se qarib-tar na the jo teri chah mein rahe

qahr-e-KHuda ki zad pe kyun aa na sake siyahkar

kis ki supurdagi mein the kis ki panah mein rahe

surat-e-haal dekh kar sab ko hai fikr ye ki ab

jism aman mein ho na ho kaj to kulah mein rahe

dar-o-rasan ke faisle sach ke amin hon agar

thoDi si jurat-e-suKHan harf-e-gawah mein rahe

koi sabab to tha ki 'ghaus' fahm-o-zaka ke bawajud

kar-e-sawab chhoD kar kar-e-gunah mein rahe