qarib se na guzar intizar baqi rakh

qarīb se na guzar intizār baaqī rakh

qarābatoñ kā magar e'tibār baaqī rakh

bikharnā hai to fazā maiñ bikher de ḳhushbū

hayā nazar meñ qadam meñ vaqār baaqī rakh

hameñ hamāre hī ḳhvāboñ se kaun rokegā

kheñchā huā hai jo ḳhatt-e-hisār baaqī rakh

tirā vajūd ibārat hai ḳhush-adā.ī se

kashīda-qāmatī-e-ḳhush-gavār baaqī rakh

ḳhizāñ se sulh barat kyūñki vo to aa.egī

phir ehtimām se fasl-e-bahār baaqī rakh

ye kaj-kulāh na.e vaqt ke na Thahreñge

khiñchī kamān mire shahryār baaqī rakh

miTe miTe se nuqūsh-e-qadam haiñ kuchh baaqī

ye ḳhushbuoñ meñ basī rahguzār baaqī rakh

ye sard-o-garm jo māhaul ke taqāze haiñ

ba-chashm-e-nam nafas-e-sho.ala-bār baaqī rakh

takān hai to sambhal jā magar na uuñgh kabhī

safar kī dhuul badan kā ġhubār baaqī rakh

anā bikher na hargiz bachā ke rakh ḳhud ko

har ek dar pe na dāman pasār baaqī rakh

ye nau-tarāzī-e-ma.anī bhī ek shai hai 'atīq'

rivāyatoñ se bhī rishte sañvār baaqī rakh

qarib se na guzar intizar baqi rakh

qarabaton ka magar e'tibar baqi rakh

bikharna hai to faza main bikher de KHushbu

haya nazar mein qadam mein waqar baqi rakh

hamein hamare hi KHwabon se kaun rokega

khencha hua hai jo KHatt-e-hisar baqi rakh

tera wajud ibarat hai KHush-adai se

kashida-qamati-e-KHush-gawar baqi rakh

KHizan se sulh barat kyunki wo to aaegi

phir ehtimam se fasl-e-bahaar baqi rakh

ye kaj-kulah nae waqt ke na Thahrenge

khinchi kaman mere shahryar baqi rakh

miTe miTe se nuqush-e-qadam hain kuchh baqi

ye KHushbuon mein basi rahguzar baqi rakh

ye sard-o-garm jo mahaul ke taqaze hain

ba-chashm-e-nam nafas-e-shoala-bar baqi rakh

takan hai to sambhal ja magar na ungh kabhi

safar ki dhul badan ka ghubar baqi rakh

ana bikher na hargiz bacha ke rakh KHud ko

har ek dar pe na daman pasar baqi rakh

ye nau-taraazi-e-mani bhi ek shai hai 'atiq'

riwayaton se bhi rishte sanwar baqi rakh