rahe na ek bhi bedad-gar sitam baqi

rahe na ek bhī bedād-gar sitam baaqī

ruke na haath abhī tak hai dam meñ dam baaqī

uThā duī kā jo pardā hamārī āñkhoñ se

to ka.abe meñ bhī rahā bas vahī sanam baaqī

bulā lo bālīñ pe hasrat na dil meñ mere rahe

abhī talak to hai tan meñ hamāre dam baaqī

lahad pe ā.eñge aur phuul bhī uThā.eñge

ye rañj hai ki na us vaqt hoñge ham baaqī

ye chaar din ke tamāshe haiñ aah duniyā ke

rahā jahāñ meñ sikandar na aur na jam baaqī

tum aao taar se marqad pe ham qadam chūmeñ

faqat yahī hai tamannā tirī qasam baaqī

'rasā' ye rañj uThāyā firāq meñ tere

rahe jahāñ meñ na āḳhir ko aah ham baaqī

rahe na ek bhi bedad-gar sitam baqi

ruke na hath abhi tak hai dam mein dam baqi

uTha dui ka jo parda hamari aankhon se

to kabe mein bhi raha bas wahi sanam baqi

bula lo baalin pe hasrat na dil mein mere rahe

abhi talak to hai tan mein hamare dam baqi

lahad pe aaenge aur phul bhi uThaenge

ye ranj hai ki na us waqt honge hum baqi

ye chaar din ke tamashe hain aah duniya ke

raha jahan mein sikandar na aur na jam baqi

tum aao tar se marqad pe hum qadam chumen

faqat yahi hai tamanna teri qasam baqi

'rasa' ye ranj uThaya firaq mein tere

rahe jahan mein na aaKHir ko aah hum baqi