rasta rokti KHamoshi ne kaun si baat sunani hai

rasta roktī ḳhāmoshī ne kaun sī baat sunānī hai

raat kī āñkheñ jaan rahī haiñ kis ke paas kahānī hai

aañkh ne vahshat oḌhī hai yā manzar meñ hairānī hai

dasht ne dāman jhaaḌ ke pūchhā ab kaisī vīrānī hai

manzar hai khiḌkī ke andar yā hai khiḌkī se bāhar

gardūñ kī gīrā.ī hai yā ḳhaak ne chādar taanī hai

kauñde se lapke paḌte haiñ chuTkī bhar nīlāhaT se

tāroñ meñ manzar khulne se pahle kī hairānī hai

saare sañg-e-mīl bhī manzil ho sakte haiñ bhed khulā

hāthoñ kī rekhāoñ meñ har manzil ek nishānī hai

aap kaheñ to tiin zamāne ek hī lahr meñ bah nikleñ

aap kaheñ to saarī bātoñ meñ aisī āsānī hai

roz-o-shab ke bandhan khol ke vaqt kā dariyā chal nikle

aap kaheñ to dānā.ī hai ham kah deñ nādānī hai

raat kī chādar tah hone tak dhuup kā jaadū khulne tak

darvāze ke band kivāḌoñ se ik baat chhupānī hai

jitne pul tak raqs kareñgī kirneñ barf kī qāshoñ par

kohsāroñ ke dāman meñ bhī tab tak ek kahānī hai

rasta rokti KHamoshi ne kaun si baat sunani hai

raat ki aankhen jaan rahi hain kis ke pas kahani hai

aankh ne wahshat oDhi hai ya manzar mein hairani hai

dasht ne daman jhaD ke puchha ab kaisi virani hai

manzar hai khiDki ke andar ya hai khiDki se bahar

gardun ki girai hai ya KHak ne chadar tani hai

kaunde se lapke paDte hain chuTki bhar nilahaT se

taron mein manzar khulne se pahle ki hairani hai

sare sang-e-mil bhi manzil ho sakte hain bhed khula

hathon ki rekhaon mein har manzil ek nishani hai

aap kahen to tin zamane ek hi lahr mein bah niklen

aap kahen to sari baaton mein aisi aasani hai

roz-o-shab ke bandhan khol ke waqt ka dariya chal nikle

aap kahen to danai hai hum kah den nadani hai

raat ki chadar tah hone tak dhup ka jadu khulne tak

darwaze ke band kiwaDon se ek baat chhupani hai

jitne pul tak raqs karengi kirnen barf ki qashon par

kohsaron ke daman mein bhi tab tak ek kahani hai