safina mauj-e-bala ke liye ishaara tha

safīna mauj-e-balā ke liye ishāra thā

na phir havā thī muāfiq na phir kinārā thā

ham apne jalte hue ghar ko kaise ro lete

hamāre chāroñ taraf ek hī nazārā thā

ye vāqi.a jo suneñge to log hañs deñge

hameñ hamārī hī parchhā.iyoñ ne maarā thā

tilism toḌ diyā ik sharīr bachche ne

mirā vajūd udāsī kā isti.ārā thā

ye hausla to guloñ kā thā hañs paḌe lekin

unheñ kisī kā tabassum bhī kab gavārā thā

ġhurūr-e-aql meñ īmān bhī gañvā baiThe

ye ik jazīra to sab ke liye kinārā thā

use bhī aaj kiyā maiñ ne āñdhiyoñ ke supurd

bahut dinoñ se mire paas ik sharāra thā

ham us ko kaise sunāte kahāniyāñ 'dānish'

kitāb-e-dil kā har ik safha paara paara thā

safina mauj-e-bala ke liye ishaara tha

na phir hawa thi muafiq na phir kinara tha

hum apne jalte hue ghar ko kaise ro lete

hamare chaaron taraf ek hi nazara tha

ye waqia jo sunenge to log hans denge

hamein hamari hi parchhaiyon ne mara tha

tilism toD diya ek sharir bachche ne

mera wajud udasi ka istiara tha

ye hausla to gulon ka tha hans paDe lekin

unhen kisi ka tabassum bhi kab gawara tha

ghurur-e-aql mein iman bhi ganwa baiThe

ye ek jazira to sab ke liye kinara tha

use bhi aaj kiya main ne aandhiyon ke supurd

bahut dinon se mere pas ek sharara tha

hum us ko kaise sunate kahaniyan 'danish'

kitab-e-dil ka har ek safha para para tha