shahr ka shahr salibon se saja hai ab ke

shahr kā shahr salīboñ se sajā hai ab ke

un kī aamad kā har andāz nayā hai ab ke

qāfila qāfila maqtal kī taraf jā.eñge log

shoḳh pahle se bahut rañg-e-hinā hai ab ke

ye to sach hai vo isī raah se guzreñge magar

koī dekhe na inheñ hukm huā hai ab ke

aao jī bhar ke gale mil leñ rafīqo ham aaj

qatl kī shakl meñ in.ām-e-vafā hai ab ke

mausam-e-gul tire sadqe tirī aamad ke nisār

dekh mujh se mirā saaya bhī judā hai ab ke

ek qatra nahīñ detī hai guzar jaatī hai

jo bhī uThtī hai ghaTā aisī ghaTā hai ab ke

dosto zikr-e-ruḳh-e-yār se ġhāfil na raho

dasht-e-zulmāt meñ mahtāb luTā hai ab ke

shahr ka shahr salibon se saja hai ab ke

un ki aamad ka har andaz naya hai ab ke

qafila qafila maqtal ki taraf jaenge log

shoKH pahle se bahut rang-e-hina hai ab ke

ye to sach hai wo isi rah se guzrenge magar

koi dekhe na inhen hukm hua hai ab ke

aao ji bhar ke gale mil len rafiqo hum aaj

qatl ki shakl mein inam-e-wafa hai ab ke

mausam-e-gul tere sadqe teri aamad ke nisar

dekh mujh se mera saya bhi juda hai ab ke

ek qatra nahin deti hai guzar jati hai

jo bhi uThti hai ghaTa aisi ghaTa hai ab ke

dosto zikr-e-ruKH-e-yar se ghafil na raho

dasht-e-zulmat mein mahtab luTa hai ab ke