sine ki aag aatish-e-mahshar ho jis tarah

siine kī aag ātish-e-mahshar ho jis tarah

yuuñ maujzan hai ġham ki samundar ho jis tarah

zaḳhmoñ se yuuñ hai jism kī dīvār zau-fagan

sho.aloñ kā raqs shāḳh-e-shajar par ho jis tarah

bādal kā shor hāñpte peḌoñ kī bebasī

yuuñ dekhtā huuñ mere hī andar ho jis tarah

uḌte hue ġhubār meñ āñkhoñ kā dasht bhī

kuchh yuuñ lagā ki ḳhushk samundar ho jis tarah

bastī ke ek moḌ pe barsoñ se ik khañDar

yuuñ nauhagar hai merā muqaddar ho jis tarah

vīrāniyoñ kā kis se gilā kījiye ki dil

itnā udaas hai ki luTā ghar ho jis tarah

sukh kī ugī na dhuup na dukh kī miTī lakīr

yuuñ hai mirā nasīb ki patthar ho jis tarah

ehsās meñ shadīd talātum ke bāvajūd

chup huuñ mujhe sukūn mayassar ho jis tarah

yuuñ hasratoñ ke ḳhuuñ kī mahak meñ basā hai dil

mehñdī-rachā vo haat mo.attar ho jis tarah

pyāsā huuñ paas hai vo chamaktā huā badan

yuuñ haat kāñptā hai koī Dar ho jis tarah

patthar na jaan tujh ko dikhā.ūñgā āb-o-tāb

yuuñ qaid huuñ ki siip meñ gauhar ho jis tarah

'zulfī' ko khīñcho! daar pe dīvār meñ chuno

sach boltā hai yuuñ ki payambar ho jis tarah

sine ki aag aatish-e-mahshar ho jis tarah

yun maujzan hai gham ki samundar ho jis tarah

zaKHmon se yun hai jism ki diwar zau-fagan

shoalon ka raqs shaKH-e-shajar par ho jis tarah

baadal ka shor hanpte peDon ki bebasi

yun dekhta hun mere hi andar ho jis tarah

uDte hue ghubar mein aankhon ka dasht bhi

kuchh yun laga ki KHushk samundar ho jis tarah

basti ke ek moD pe barson se ek khanDar

yun nauhagar hai mera muqaddar ho jis tarah

viraniyon ka kis se gila kijiye ki dil

itna udas hai ki luTa ghar ho jis tarah

sukh ki ugi na dhup na dukh ki miTi lakir

yun hai mera nasib ki patthar ho jis tarah

ehsas mein shadid talatum ke bawajud

chup hun mujhe sukun mayassar ho jis tarah

yun hasraton ke KHun ki mahak mein basa hai dil

mehndi-racha wo hat moattar ho jis tarah

pyasa hun pas hai wo chamakta hua badan

yun hat kanpta hai koi Dar ho jis tarah

patthar na jaan tujh ko dikhaunga aab-o-tab

yun qaid hun ki sip mein gauhar ho jis tarah

'zulfi' ko khincho! dar pe diwar mein chuno

sach bolta hai yun ki payambar ho jis tarah