subh-e-qayamat jin honTon pe dilase dekhe

sub.h-e-qayāmat jin hoñToñ pe dilāse dekhe

kyā lab-e-dariyā un jaise bhī pyāse dekhe

kaun vafā kī manzil se is shaan se guzrā

chāk-e-qabā dekhe jo koī balā se dekhe

hāthoñ meñ mīzān laboñ par hukm-e-qazā hai

hākim-e-shahr bhī aksar ham ne ḳhudā se dekhe

dekhne vaale yuuñ to bahut dekhe haiñ lekin

mar jā.ūñ jo koī terī adā se dekhe

jin ko zom thā band-e-mizha kī mazbūtī par

un āñkhoñ se bahte hue dariyā se dekhe

jin hāthoñ se baTtī ḳhairāteñ dekhī thiiñ

in āñkhoñ se un hāthoñ meñ kaase dekhe

is shahr-e-nā-pursāñ meñ ham ne to 'āzar'

chehre guloñ se dekhe dil sahrā se dekhe

subh-e-qayamat jin honTon pe dilase dekhe

kya lab-e-dariya un jaise bhi pyase dekhe

kaun wafa ki manzil se is shan se guzra

chaak-e-qaba dekhe jo koi bala se dekhe

hathon mein mizan labon par hukm-e-qaza hai

hakim-e-shahr bhi aksar hum ne KHuda se dekhe

dekhne wale yun to bahut dekhe hain lekin

mar jaun jo koi teri ada se dekhe

jin ko zom tha band-e-mizha ki mazbuti par

un aankhon se bahte hue dariya se dekhe

jin hathon se baTti KHairaaten dekhi thin

in aankhon se un hathon mein kase dekhe

is shahr-e-na-pursan mein hum ne to 'azar'

chehre gulon se dekhe dil sahra se dekhe