tasawwuraat mein inko bula ke dekh liya

tasavvurāt meñ in ko bulā ke dekh liyā

zamāne bhar kī nazar se chhupā ke dekh liyā

fasāna-e-ġham-e-furqat sunā ke dekh liyā

unhoñ ne sirf mujhe muskurā ke dekh liyā

kabhī kisī ne sar-e-tūr jā ke dekh liyā

kabhī kisī ne kisī ko bulā ke dekh liyā

nigāh-e-parda-kushā kā kamāl kyā kahnā

jahāñ jahāñ vo chhupe us ne jā ke dekh liyā

kahā thā un ko na bulvāo vo na ā.eñge

hamārī baat na maanī bulā ke dekh liyā

ye kis ke vāste aañsū bahā.e jaate haiñ

tumheñ kisī ne jo us vaqt aa ke dekh liyā

kisī ne bhī na diyā saath marne vaale kā

har ik rafīq pe sab kuchh luTā ke dekh liyā

mizāj-e-husn to ik haal par rahā qaa.em

luTāne vāloñ ne sab kuchh luTā ke dekh liyā

ḳhushī kī baat hai niklī to hasrat-e-dīdār

karam-navāz ko sab kuchh luTā ke dekh liyā

rumūz-e-husn junūñ-āshnā rahe varna

ḳhirad pukārtī jalve ḳhudā ke dekh liyā

ġhurūr-e-husn kī ḳhuddāriyāñ ḳhud aa na sakā

shuā-e-husn ko markaz pe lā ke dekh liyā

kabhī na tum ne mizāj-e-dil-e-hazīñ pūchhā

bas ab muaaf karo aazmā ke dekh liyā

kahīñ Thikānā nahīñ ham qafas-nasīboñ kā

chaman meñ rah ke nasheman banā ke dekh liyā

vafā-shi.ār vafāoñ se baaz aa na sake

unhoñ ne ḳhvāb unheñ aazmā ke dekh liyā

sivā.e aap ke koī na ban sakā apnā

har ek shaḳhs ko apnā banā ke dekh liyā

tum aa ga.e dam-e-āḳhir baḌā kiyā ehsāñ

ḳhatā muaaf jo tum ko bulā ke dekh liyā

jo dil se aa.e zabāñ par vo raaz raaz kahāñ

jo rāzdāñ the unheñ bhī batā ke dekh liyā

janāza dekh ke 'vāsil' kā ho ga.e betāb

kafan unhoñ ne bil-āḳhir haTā ke dekh liyā

tasawwuraat mein in ko bula ke dekh liya

zamane bhar ki nazar se chhupa ke dekh liya

fasana-e-gham-e-furqat suna ke dekh liya

unhon ne sirf mujhe muskura ke dekh liya

kabhi kisi ne sar-e-tur ja ke dekh liya

kabhi kisi ne kisi ko bula ke dekh liya

nigah-e-parda-kusha ka kamal kya kahna

jahan jahan wo chhupe us ne ja ke dekh liya

kaha tha un ko na bulwao wo na aaenge

hamari baat na mani bula ke dekh liya

ye kis ke waste aansu bahae jate hain

tumhein kisi ne jo us waqt aa ke dekh liya

kisi ne bhi na diya sath marne wale ka

har ek rafiq pe sab kuchh luTa ke dekh liya

mizaj-e-husn to ek haal par raha qaem

luTane walon ne sab kuchh luTa ke dekh liya

KHushi ki baat hai nikli to hasrat-e-didar

karam-nawaz ko sab kuchh luTa ke dekh liya

rumuz-e-husn junun-ashna rahe warna

KHirad pukarti jalwe KHuda ke dekh liya

ghurur-e-husn ki KHuddariyan KHud aa na saka

shua-e-husn ko markaz pe la ke dekh liya

kabhi na tum ne mizaj-e-dil-e-hazin puchha

bas ab muaf karo aazma ke dekh liya

kahin Thikana nahin hum qafas-nasibon ka

chaman mein rah ke nasheman bana ke dekh liya

wafa-shiar wafaon se baz aa na sake

unhon ne KHwab unhen aazma ke dekh liya

siwae aap ke koi na ban saka apna

har ek shaKHs ko apna bana ke dekh liya

tum aa gae dam-e-aKHir baDa kiya ehsan

KHata muaf jo tum ko bula ke dekh liya

jo dil se aae zaban par wo raaz raaz kahan

jo raazdan the unhen bhi bata ke dekh liya

janaza dekh ke 'wasil' ka ho gae betab

kafan unhon ne bil-aKHir haTa ke dekh liya