thakawaTon se baiTh ke safar utariye kahin

thakāvaToñ se baiTh ke safar utāriye kahīñ

balā se garm ret ho agar na mil sake zamīñ

kaho to is libās meñ tumhāre saath maiñ chalūñ

ġhubār oḌh lūñgā maiñ badan pe aaj kuchh nahīñ

batoñ kā ġhol ab yahāñ utar ke pā sakegā kyā

khaḌe ho tum jahāñ pe ab vo narm jhiil thī nahīñ

khule hue makān meñ adā bhī terī ḳhuub hai

zabāñ se qufl kī talab kalīd zer-e-āstīñ

tamām umr pā-ba-gil na jañgaloñ se mil sakā

daraḳht zard haal sā jo ab bhī hai khaḌā yahīñ

vo rañg kā hujūm sā vo ḳhushbuoñ kī bhiiḌ sī

vo lafz lafz se javāñ vo harf harf se hasīñ

abhī bhī is makān meñ palañg taḳht mez hai

ga.e jo sair ke liye to phir na aa sake makīñ

thakawaTon se baiTh ke safar utariye kahin

bala se garm ret ho agar na mil sake zamin

kaho to is libas mein tumhaare sath main chalun

ghubar oDh lunga main badan pe aaj kuchh nahin

baton ka ghol ab yahan utar ke pa sakega kya

khaDe ho tum jahan pe ab wo narm jhil thi nahin

khule hue makan mein ada bhi teri KHub hai

zaban se qufl ki talab kalid zer-e-astin

tamam umr pa-ba-gil na jangalon se mil saka

daraKHt zard haal sa jo ab bhi hai khaDa yahin

wo rang ka hujum sa wo KHushbuon ki bhiD si

wo lafz lafz se jawan wo harf harf se hasin

abhi bhi is makan mein palang taKHt mez hai

gae jo sair ke liye to phir na aa sake makin