tujhse ab dard ka rishta bhi nahin chahiye hai

tujh se ab dard kā rishta bhī nahīñ chāhiye hai

jā mujhe terī tamannā bhī nahīñ chāhiye hai

dekh kuchh bhī na sakūñ maiñ kisī saa.e ke sivā

raushnī itnī ziyāda bhī nahīñ chāhiye hai

ik nazar tishna-e-nazzāra hī rakh lenī hai

ik tamāshe meñ tamāshā bhī nahīñ chāhiye hai

ḳhair-o-shar donoñ mujhe.... zaḳhm diye jaate haiñ

ye burā kyā mujhe achchhā bhī nahīñ chāhiye hai

ab zarā chāhiye tanhā.ī meñ yaksūī mujhe

ab koī chāhne vaalā bhī nahīñ chāhiye hai

maiñ ne halkān kiyā jis kī talab meñ ḳhud ko

sach to ye hai ki vo duniyā bhī nahīñ chāhiye hai

rok mat mujh ko farastāda-e-tuġhyānī huuñ

us safar meñ huuñ ki rasta bhī nahīñ chāhiye hai

jiinā mushkil to bahut hai tirī is duniyā meñ

lekin is ḳhvāb ko marnā bhī nahīñ chāhiye hai

tujh se ab dard ka rishta bhi nahin chahiye hai

ja mujhe teri tamanna bhi nahin chahiye hai

dekh kuchh bhi na sakun main kisi sae ke siwa

raushni itni ziyaada bhi nahin chahiye hai

ek nazar tishna-e-nazzara hi rakh leni hai

ek tamashe mein tamasha bhi nahin chahiye hai

KHair-o-shar donon mujhe zaKHm diye jate hain

ye bura kya mujhe achchha bhi nahin chahiye hai

ab zara chahiye tanhai mein yaksui mujhe

ab koi chahne wala bhi nahin chahiye hai

main ne halkan kiya jis ki talab mein KHud ko

sach to ye hai ki wo duniya bhi nahin chahiye hai

rok mat mujh ko farastada-e-tughyani hun

us safar mein hun ki rasta bhi nahin chahiye hai

jina mushkil to bahut hai teri is duniya mein

lekin is KHwab ko marna bhi nahin chahiye hai