tujhse gile karun tujhe jaanan manaun main

tujh se gile karūñ tujhe jānāñ manā.ūñ maiñ

ik baar apne-āp meñ aa.uuñ to aa.uuñ maiñ

dil se sitam kī be-sar-o-kārī havā ko hai

vo gard uḌ rahī hai ki ḳhud ko gañvā.ūñ maiñ

vo naam huuñ ki jis pe nadāmat bhī ab nahīñ

vo kaam haiñ ki apnī judā.ī kamā.ūñ maiñ

kyūñkar ho apne ḳhvāb kī āñkhoñ meñ vāpsī

kis taur apne dil ke zamānoñ meñ jā.ūñ maiñ

ik rañg sī kamān ho ḳhushbū sā ek tiir

marham sī vārdāt ho aur zaḳhm khā.ūñ maiñ

shikva sā ik darīcha ho nashsha sā ik sukūt

ho shaam ik sharāb sī aur laḌkhaḌā.ūñ maiñ

phir us galī se apnā guzar chāhtā hai dil

ab us galī ko kaun sī bastī se lā.ūñ maiñ

tujh se gile karun tujhe jaanan manaun main

ek bar apne-ap mein aaun to aaun main

dil se sitam ki be-sar-o-kari hawa ko hai

wo gard uD rahi hai ki KHud ko ganwaun main

wo nam hun ki jis pe nadamat bhi ab nahin

wo kaam hain ki apni judai kamaun main

kyunkar ho apne KHwab ki aankhon mein wapsi

kis taur apne dil ke zamanon mein jaun main

ek rang si kaman ho KHushbu sa ek tir

marham si wardat ho aur zaKHm khaun main

shikwa sa ek daricha ho nashsha sa ek sukut

ho sham ek sharab si aur laDkhaDaun main

phir us gali se apna guzar chahta hai dil

ab us gali ko kaun si basti se laun main