tumhaare qasr-e-azadi ke memaron ne kya paya

tumhāre qasr-e-āzādī ke me'māroñ ne kyā paayā

jahāñ-bāzoñ kī ban aa.ī jahāñ-kāroñ ne kyā paayā

sitāroñ se shab-e-ġham kā to dāman jagmagā uTThā

magar aañsū bahā kar hijr ke māroñ ne kyā paayā

naqīb-e-ahd-e-zarrīñ sirf itnā mujh ko batlā de

tulū-e-sub.h-e-nau bar-haq magar tāroñ ne kyā paayā

junūñ kī baat chhoḌo is ga.e ghar kā Thikānā kyā

fareb-e-'aql o hikmat ke parastāroñ ne kyā paayā

sar-afrāzī milī ahl-e-havas kī pārsā.ī ko

magar terī mohabbat ke gunahgāroñ ne kyā paayā

khilaune de diye kuchh aap ne dast-e-tamannā meñ

ba-juz dāġh-e-jigar ā.īna-bardāroñ ne kyā paayā

milī sar phoḌte hī qaid-e-hastī se bhī āzādī

rukāvaT Daal kar zindāñ kī dīvāroñ ne kyā paayā

hamāre sāmne hī baiTh kar 'fārūq' masnad par

hamīñ se pūchhte ho phir ki ġhaddāroñ ne kyā paayā

tumhaare qasr-e-azadi ke me'maron ne kya paya

jahan-bazon ki ban aai jahan-karon ne kya paya

sitaron se shab-e-gham ka to daman jagmaga uTTha

magar aansu baha kar hijr ke maron ne kya paya

naqib-e-ahd-e-zarrin sirf itna mujh ko batla de

tulu-e-subh-e-nau bar-haq magar taron ne kya paya

junun ki baat chhoDo is gae ghar ka Thikana kya

fareb-e-'aql o hikmat ke parastaron ne kya paya

sar-afraazi mili ahl-e-hawas ki parsai ko

magar teri mohabbat ke gunahgaron ne kya paya

khilaune de diye kuchh aap ne dast-e-tamanna mein

ba-juz dagh-e-jigar aaina-bardaron ne kya paya

mili sar phoDte hi qaid-e-hasti se bhi aazadi

rukawaT Dal kar zindan ki diwaron ne kya paya

hamare samne hi baiTh kar 'faruq' masnad par

hamin se puchhte ho phir ki ghaddaron ne kya paya