ufuq ke us par kar raha hai koi mera intizar shayad

ufuq ke us paar kar rahā hai koī mirā intizār shāyad

usī kī jānib chalī hai shaam o sahar kī ye rahguzār shāyad

qafas meñ dūr-o-darāz se bhīnī bhīnī ḳhushbū sī aa rahī hai

chaman chaman ham ko DhūñDtī hogī mauj-e-fasl-e-bahār shāyad

hazār baar aazmā chukā hai magar abhī aazmā rahā hai

abhī zamāne ko aadmī kā nahīñ hai kuchh e'tibār shāyad

na shab ke gesū sañvar sake aur na din ke ruḳh par nikhār aayā

azal se mashshātgī kā har mudda.ī hai nā-puḳhta-kār shāyad

jo har nazar ko bhigo ga.ī hai jo har nafas ko Dubo ga.ī hai

vahī taġhayyur kī mauj ik din banegī vaj.h-e-qarār shāyad

vahī hai andāz-e-be-niyāzī vahī hai raftār-e-be-shu.ūrī

abhī tak ā.ankhoñ meñ maujzan hai ga.e dinoñ kā ḳhumār shāyad

na jaane hadd-e-nazar se Takrā ke kyuuñ tamannā.ī lauT aa.e

hudūd-e-arz-o-samāñ ke aage khiñchā huā hai hisār shāyad

ufuq ke us par kar raha hai koi mera intizar shayad

usi ki jaanib chali hai sham o sahar ki ye rahguzar shayad

qafas mein dur-o-daraaz se bhini bhini KHushbu si aa rahi hai

chaman chaman hum ko DhunDti hogi mauj-e-fasl-e-bahaar shayad

hazar bar aazma chuka hai magar abhi aazma raha hai

abhi zamane ko aadmi ka nahin hai kuchh e'tibar shayad

na shab ke gesu sanwar sake aur na din ke ruKH par nikhaar aaya

azal se mashshatgi ka har muddai hai na-puKHta-kar shayad

jo har nazar ko bhigo gai hai jo har nafas ko Dubo gai hai

wahi taghayyur ki mauj ek din banegi wajh-e-qarar shayad

wahi hai andaz-e-be-niyazi wahi hai raftar-e-be-shuuri

abhi tak aaankhon mein maujzan hai gae dinon ka KHumar shayad

na jaane hadd-e-nazar se Takra ke kyun tamannai lauT aae

hudud-e-arz-o-saman ke aage khincha hua hai hisar shayad