umr-bhar sine mein ek dard dabae rakkha

umr-bhar siine meñ ik dard dabā.e rakkhā

ek be-nām se rishte ko nibhā.e rakkhā

thā mujhe vahm-o-gumāñ ki vo faqat merī hai

aur us ne bhī bharam merā banā.e rakkhā

āñdhiyāñ sharm se ho jaa.eñ na paanī paanī

sar yahī soch ke peḌoñ ne jhukā.e rakkhā

vaise har baat se rakkhā use vāqif ham ne

lekin afsāna-e-ulfat ko chhupā.e rakkhā

ek rishta jise maiñ de na sakā koī naam

ek rishta jise tā-umr nibhā.e rakkhā

kūza-gar tujh ko banānā hī nahīñ thā jab kuchh

kis liye chaak pe tā-umr chaḌhā.e rakkhā

umr-bhar sine mein ek dard dabae rakkha

ek be-nam se rishte ko nibhae rakkha

tha mujhe wahm-o-guman ki wo faqat meri hai

aur us ne bhi bharam mera banae rakkha

aandhiyan sharm se ho jaen na pani pani

sar yahi soch ke peDon ne jhukae rakkha

waise har baat se rakkha use waqif hum ne

lekin afsana-e-ulfat ko chhupae rakkha

ek rishta jise main de na saka koi nam

ek rishta jise ta-umr nibhae rakkha

kuza-gar tujh ko banana hi nahin tha jab kuchh

kis liye chaak pe ta-umr chaDhae rakkha