un nigahon ko ham-awaz kiya hai maine

un nigāhoñ ko ham-āvāz kiyā hai maiñ ne

tab kahīñ giit kā āġhāz kiyā hai maiñ ne

ḳhatm ho tā-ki sitāroñ kī ijāra-dārī

ḳhaak ko mā.il-e-parvāz kiyā hai maiñ ne

aap ko ik na.ī ḳhiffat se bachāne ke liye

chāndnī ko nazar-andāz kiyā hai maiñ ne

āsmānoñ kī taraf aur nahīñ dekhūñgā

ik na.e daur kā āġhāz kiyā hai maiñ ne

rūThe logoñ ko manāne meñ maza aatā hai

jaan kar aap ko nārāz kiyā hai maiñ ne

tum mujhe chhoḌ ke is tarah nahīñ jā sakte

is ta.alluq pe bahut naaz kiyā hai maiñ ne

vo jo sadiyoñ se yahāñ band paḌā thā dekho

shā.irī kā vahī dar baaz kiyā hai maiñ ne

sun ke mab.hūt huī jaatī hai duniyā saarī

sher likkhe haiñ ki ejaaz kiyā hai maiñ ne

ishq meñ naam kamānā koī āsān na thā

saare ahbāb ko nārāz kiyā hai maiñ ne

sirf logoñ ko batāne se tasallī na huī

chāñd tāroñ ko bhī hamrāz kiyā hai maiñ ne

aur bhī hoñge ka.ī chāhne vaale lekin

aap ke naam ko mumtāz kiyā hai maiñ ne

āsmānoñ se pare kartā hai ab jā ke shikār

tā.ir-e-dil ko vo shahbāz kiyā hai maiñ ne

shā.iroñ se jo tire baad kabhī ho na sakā

kaam vo hafiz-e-shīrāz kiyā hai maiñ ne

un nigahon ko ham-awaz kiya hai main ne

tab kahin git ka aaghaz kiya hai main ne

KHatm ho ta-ki sitaron ki ijara-dari

KHak ko mail-e-parwaz kiya hai main ne

aap ko ek nai KHiffat se bachane ke liye

chandni ko nazar-andaz kiya hai main ne

aasmanon ki taraf aur nahin dekhunga

ek nae daur ka aaghaz kiya hai main ne

ruThe logon ko manane mein maza aata hai

jaan kar aap ko naraaz kiya hai main ne

tum mujhe chhoD ke is tarah nahin ja sakte

is talluq pe bahut naz kiya hai main ne

wo jo sadiyon se yahan band paDa tha dekho

shairi ka wahi dar baz kiya hai main ne

sun ke mabhut hui jati hai duniya sari

sher likkhe hain ki ejaz kiya hai main ne

ishq mein nam kamana koi aasan na tha

sare ahbab ko naraaz kiya hai main ne

sirf logon ko batane se tasalli na hui

chand taron ko bhi hamraaz kiya hai main ne

aur bhi honge kai chahne wale lekin

aap ke nam ko mumtaz kiya hai main ne

aasmanon se pare karta hai ab ja ke shikar

tair-e-dil ko wo shahbaz kiya hai main ne

shairon se jo tere baad kabhi ho na saka

kaam wo hafiz-e-shiraaz kiya hai main ne