un se har haal mein tum silsila-jumban rakhna

un se har haal meñ tum silsila-jumbāñ rakhnā

kuchh madavā-e-ġham-e-gardish-e-daurāñ rakhnā

apne qaabū meñ zarā gesu-e-pechāñ rakhnā

raas aatā nahīñ duniyā ko pareshāñ rakhnā

is añdhere meñ bhaTak jaa.eñ na yādeñ un kī

apnī mizhgāñ pe charāġhoñ ko farozāñ rakhnā

āj-kal bikte haiñ bāzār meñ insāñ ke zamīr

tum ho insān to phir vaq.at-e-insāñ rakhnā

daaġh dil ke haiñ salāmat to koī baat nahīñ

tīrgī laakh sahī sub.h kā imkāñ rakhnā

mausam-e-shahr-e-nigārāñ kā koī Thiik nahīñ

gosha-e-dil meñ koī ātish-e-sozāñ rakhnā

tum se sach pūchho to itnī hai guzārish merī

apne 'afsar' ko ḳhizāñ meñ bhī ġhazal-ḳhvāñ rakhnā

un se har haal mein tum silsila-jumban rakhna

kuchh madawa-e-gham-e-gardish-e-dauran rakhna

apne qabu mein zara gesu-e-pechan rakhna

ras aata nahin duniya ko pareshan rakhna

is andhere mein bhaTak jaen na yaaden un ki

apni mizhgan pe charaghon ko farozan rakhna

aaj-kal bikte hain bazar mein insan ke zamir

tum ho insan to phir waqat-e-insan rakhna

dagh dil ke hain salamat to koi baat nahin

tirgi lakh sahi subh ka imkan rakhna

mausam-e-shahr-e-nigaran ka koi Thik nahin

gosha-e-dil mein koi aatish-e-sozan rakhna

tum se sach puchho to itni hai guzarish meri

apne 'afsar' ko KHizan mein bhi ghazal-KHwan rakhna