usne likha tha harf-e-judai mere liye

us ne likhā thā harf-e-judā.ī mire liye

phir miT ga.ī thī saarī ḳhudā.ī mire liye

gajre tamām shahr meñ baañT aayā to khulā

ghar meñ bhī muntazir thī kalā.ī mire liye

sundar gulāb ḳhvāb to ḳhvāboñ kī baat hai

ye raat niiñd bhī to na laa.ī mire liye

pur-nūr sar-zamīn pe aa kar bhulā diyā

kis ne lahū se sham.a jalā.ī mire liye

vo bhī the ratjagoñ kī masāfat meñ ham-safar

tāroñ ne raat raat sajā.ī mire liye

'fīroz' maiñ ne ḳhud hī salāsil pahan liye

mumkin nahīñ hai ab to rihā.ī mire liye

us ne likha tha harf-e-judai mere liye

phir miT gai thi sari KHudai mere liye

gajre tamam shahr mein banT aaya to khula

ghar mein bhi muntazir thi kalai mere liye

sundar gulab KHwab to KHwabon ki baat hai

ye raat nind bhi to na lai mere liye

pur-nur sar-zamin pe aa kar bhula diya

kis ne lahu se shama jalai mere liye

wo bhi the ratjagon ki masafat mein ham-safar

taron ne raat raat sajai mere liye

'firoz' main ne KHud hi salasil pahan liye

mumkin nahin hai ab to rihai mere liye