war bharpur kiya usne ana par meri

vaar bharpūr kiyā us ne anā par merī

ḳhud bhī maġhmūm huā āh-o-bukā par merī

vaqt-e-āḳhir bhī tirī ḳhair ḳhudā se māñgī

zindagī ḳhatm huī harf-e-duā par merī

sach batā ishq mujhe saḳht pareshāñ huuñ maiñ

kyuuñ ḳhafā hotā nahīñ dost ḳhatā par merī

reza reza hai mirī jaan talab meñ jis kī

us ko tashkīk hai afsos-e-vafā par merī

us ke hāthoñ kī nafāsat pe girāñ thī mehñdī

aa ga.ī yaad use rasm-e-hinā par merī

rañg ġhālib na sahī rañj-e-mohabbat hī sahī

ḳhush nazar aate haiñ naqqād navā par merī

us kā iḳhlās musallam hai ḳhudā ḳhair kare

dost pahuñchā nahīñ 'tanvīr' sadā par merī

war bharpur kiya us ne ana par meri

KHud bhi maghmum hua aah-o-buka par meri

waqt-e-aKHir bhi teri KHair KHuda se mangi

zindagi KHatm hui harf-e-dua par meri

sach bata ishq mujhe saKHt pareshan hun main

kyun KHafa hota nahin dost KHata par meri

reza reza hai meri jaan talab mein jis ki

us ko tashkik hai afsos-e-wafa par meri

us ke hathon ki nafasat pe giran thi mehndi

aa gai yaad use rasm-e-hina par meri

rang ghaalib na sahi ranj-e-mohabbat hi sahi

KHush nazar aate hain naqqad nawa par meri

us ka iKHlas musallam hai KHuda KHair kare

dost pahuncha nahin 'tanwir' sada par meri