waraq waraq se naya ek jawab mangun main

varaq varaq se nayā ik javāb māñgūñ maiñ

ḳhud apnī zaat pe likkhī kitāb māñgūñ maiñ

ye ḳhud-navisht to mujh ko adhūrī lagtī hai

jo ho sake to nayā intisāb māñgūñ maiñ

ham apne shauq se aa.e na apnī tarz jiye

is imtihāñ meñ nayā ik nisāb māñgūñ maiñ

vo haq kī pyaas thī dariyā to bas bahāna thā

lab-e-furāt pe kis se javāb māñgūñ maiñ

bas ek larza mere jism-o-jāñ pe hotā hai

shu.ūr-e-zāt se jab ehtisāb māñgūñ maiñ

tire hisāb meñ haiñ ḳhush-gumāniyāñ ab bhī

tire bahāne nayā ik azaab māñgūñ maiñ

waraq waraq se naya ek jawab mangun main

KHud apni zat pe likkhi kitab mangun main

ye KHud-nawisht to mujh ko adhuri lagti hai

jo ho sake to naya intisab mangun main

hum apne shauq se aae na apni tarz jiye

is imtihan mein naya ek nisab mangun main

wo haq ki pyas thi dariya to bas bahana tha

lab-e-furaat pe kis se jawab mangun main

bas ek larza mere jism-o-jaan pe hota hai

shuur-e-zat se jab ehtisab mangun main

tere hisab mein hain KHush-gumaniyan ab bhi

tere bahane naya ek azab mangun main