wo ek nazar se mujhe be-asas kar dega

vo ik nazar se mujhe be-asās kar degā

mire yaqīn ko merā qayās kar degā

maiñ jab bhī us kī udāsī se uub jā.ūñgī

to yuuñ hañsegā ki mujh ko udaas kar degā

milā ke mujh se nigāheñ vo merī nazroñ ke

zarā sī der meñ ḳhālī gilass kar degā

phir is tarah se rahegā mire ḳhayāloñ meñ

ki merī pyaas ko dariyā kī pyaas kar degā

maiñ us kī gard haTāte hue bhī Dartī huuñ

vo ā.īna hai mujhe ḳhud-shanās kar degā

maiñ us ke sāmne uryāñ lagūñgī duniyā ko

vo mere jism ko merā libās kar degā

vo māhtāb-sifat sirf raushnī hī nahīñ

mujhī ko raat kā manzar bhī ḳhaas kar degā

wo ek nazar se mujhe be-asas kar dega

mere yaqin ko mera qayas kar dega

main jab bhi us ki udasi se ub jaungi

to yun hansega ki mujh ko udas kar dega

mila ke mujh se nigahen wo meri nazron ke

zara si der mein KHali gilass kar dega

phir is tarah se rahega mere KHayalon mein

ki meri pyas ko dariya ki pyas kar dega

main us ki gard haTate hue bhi Darti hun

wo aaina hai mujhe KHud-shanas kar dega

main us ke samne uryan lagungi duniya ko

wo mere jism ko mera libas kar dega

wo mahtab-sifat sirf raushni hi nahin

mujhi ko raat ka manzar bhi KHas kar dega