wo zard chehra moattar nigah jaisa tha

vo zard chehra mo.attar nigāh jaisā thā

havā kā ruup thā bolo to aah jaisā thā

aliil vaqt kī poshāk thā buḳhār us kā

vo ek jism thā lekin karāh jaisā thā

bhaTak rahā thā añdhere meñ dard kā dariyā

vo ek raat kā jugnū thā raah jaisā thā

galī ke moḌ pe Thahrā huā thā ik saaya

libās chup kā badan par nibāh jaisā thā

chalā to saa.e ke mānind saath saath chalā

rukā to mere liye mahr-o-māh jaisā thā

qarīb dekh ke us ko ye baat kis se kahūñ

ḳhayāl dil meñ jo aayā gunāh jaisā thā

bahut sī bātoñ meñ majbūr thā vo ham se bhī

takallufāt meñ ālam-panāh jaisā thā

ḳhabar ke uḌte hī yūñhī ki mar gayā 'mājid'

purāne ghar kā samāñ jashn-gāh jaisā thā

wo zard chehra moattar nigah jaisa tha

hawa ka rup tha bolo to aah jaisa tha

alil waqt ki poshak tha buKHar us ka

wo ek jism tha lekin karah jaisa tha

bhaTak raha tha andhere mein dard ka dariya

wo ek raat ka jugnu tha rah jaisa tha

gali ke moD pe Thahra hua tha ek saya

libas chup ka badan par nibah jaisa tha

chala to sae ke manind sath sath chala

ruka to mere liye mahr-o-mah jaisa tha

qarib dekh ke us ko ye baat kis se kahun

KHayal dil mein jo aaya gunah jaisa tha

bahut si baaton mein majbur tha wo hum se bhi

takallufat mein aalam-panah jaisa tha

KHabar ke uDte hi yunhi ki mar gaya 'majid'

purane ghar ka saman jashn-gah jaisa tha