ya rab meri hayat se gham ka asar na jae

yā rab mirī hayāt se ġham kā asar na jaa.e

jab tak kisī kī zulf-e-pareshāñ sañvar na jaa.e

vo aañkh kyā jo aariz o ruḳh par Thahar na jaa.e

vo jalva kyā jo diida o dil meñ utar na jaa.e

mere junūñ ko zulf ke saa.e se duur rakh

raste meñ chhāñv pā ke musāfir Thahar na jaa.e

maiñ aaj gulsitāñ meñ bulā luuñ bahār ko

lekin ye chāhtā huuñ ḳhizāñ ruuTh kar na jaa.e

paidā hue haiñ ab to masīhā na.e na.e

bīmār apnī maut se pahle hī mar na jaa.e

kar lī hai tauba is liye vaa.iz ke sāmne

ilzām-e-tishnagī mire saaqī ke sar na jaa.e

saaqī pilā sharāb magar ye rahe ḳhayāl

ālām-e-rozgār kā chehrā utar na jaa.e

maiñ us ke sāmne se guzartā huuñ is liye

tark-e-ta.alluqāt kā ehsās mar na jaa.e

masrūr-e-dīd-e-husn hai is vāste 'fanā'

duniyā ke aib par kabhī merī nazar na jaa.e

ya rab meri hayat se gham ka asar na jae

jab tak kisi ki zulf-e-pareshan sanwar na jae

wo aankh kya jo aariz o ruKH par Thahar na jae

wo jalwa kya jo dida o dil mein utar na jae

mere junun ko zulf ke sae se dur rakh

raste mein chhanw pa ke musafir Thahar na jae

main aaj gulsitan mein bula lun bahaar ko

lekin ye chahta hun KHizan ruTh kar na jae

paida hue hain ab to masiha nae nae

bimar apni maut se pahle hi mar na jae

kar li hai tauba is liye waiz ke samne

ilzam-e-tishnagi mere saqi ke sar na jae

saqi pila sharab magar ye rahe KHayal

aalam-e-rozgar ka chehra utar na jae

main us ke samne se guzarta hun is liye

tark-e-talluqat ka ehsas mar na jae

masrur-e-did-e-husn hai is waste 'fana'

duniya ke aib par kabhi meri nazar na jae