ye bandagi ka sada ab saman rahe na rahe

ye bandagī kā sadā ab samāñ rahe na rahe

sar-e-niyāz jhuke āstāñ rahe na rahe

tire ḳhayāl meñ maiñ huuñ mire ḳhayāl meñ tū

mire baġhair tirī dāstāñ rahe na rahe

kise ḳhabar hai ki har ġham meñ hai ḳhushī pinhāñ

ġham-e-habīb salāmat ye jaañ rahe na rahe

nigah ḳhamosh takallum kī rāzdāñ hogī

huzūr-e-dost ye goyā zabāñ rahe na rahe

hamārī laash gulistāñ meñ dafn kar sayyād

chaman se duur koī nauha-ḳhvāñ rahe na rahe

vo mujh se is liye kahte haiñ apne raaz kī baat

ki mere ba.ad koī rāzdāñ rahe na rahe

sadā unhoñ ne anal-haq kī is liye dī thī

sadā dahan meñ tumhārī zabāñ rahe na rahe

maiñ aaj is liye kartā huuñ ehtirām apnā

hamesha ḳhud pe tumhārā gumāñ rahe na rahe

usī ke ishq meñ miT kar ke ho ga.e 'vāsil'

sabāt usī ko hai apnā nishāñ rahe na rahe

ye bandagi ka sada ab saman rahe na rahe

sar-e-niyaz jhuke aastan rahe na rahe

tere KHayal mein main hun mere KHayal mein tu

mere baghair teri dastan rahe na rahe

kise KHabar hai ki har gham mein hai KHushi pinhan

gham-e-habib salamat ye jaan rahe na rahe

nigah KHamosh takallum ki raazdan hogi

huzur-e-dost ye goya zaban rahe na rahe

hamari lash gulistan mein dafn kar sayyaad

chaman se dur koi nauha-KHwan rahe na rahe

wo mujh se is liye kahte hain apne raaz ki baat

ki mere baad koi raazdan rahe na rahe

sada unhon ne anal-haq ki is liye di thi

sada dahan mein tumhaari zaban rahe na rahe

main aaj is liye karta hun ehtiram apna

hamesha KHud pe tumhaara guman rahe na rahe

usi ke ishq mein miT kar ke ho gae 'wasil'

sabaat usi ko hai apna nishan rahe na rahe