ye kaisi baat mera mehrban bhul gaya

ye kaisī baat mirā mehrbān bhuul gayā

kumak meñ tiir to bheje kamān bhuul gayā

junūñ ne mujh se ta.āruf ke marhale meñ kahā

maiñ vo hunar huuñ jise ye jahān bhuul gayā

kuchh is tapāk se rāheñ lipaT paḌīñ mujh se

ki maiñ to samt-e-safar kā nishān bhuul gayā

ḳhumār-e-qurbat-e-manzil thā nā-rasī kā javāz

galī meñ aa ke maiñ us kā makān bhuul gayā

har ik badaltī huī rut meñ yaad aatā hai

vo shaḳhs jo mirā nām-o-nishān bhuul gayā

kuchh aisī baat kabūtar kī aañkh meñ dekhī

uqaab ḳhauf ke maare uḌaan bhuul gayā

maiñ sar-ba-kaf sar-e-maqtal kuchh is adā se gayā

ki merā dushman-e-jāñ ān-bān bhuul gayā

qabā.il aaj bhī shīr-o-shakar nazar aate

ḳhatīb-e-shahr magar vo zabān bhuul gayā

zamīñ kī god meñ itnā sukūn thā 'anjum'

ki jo gayā vo safar kī thakān bhuul gayā

ye kaisi baat mera mehrban bhul gaya

kumak mein tir to bheje kaman bhul gaya

junun ne mujh se taaruf ke marhale mein kaha

main wo hunar hun jise ye jahan bhul gaya

kuchh is tapak se rahen lipaT paDin mujh se

ki main to samt-e-safar ka nishan bhul gaya

KHumar-e-qurbat-e-manzil tha na-rasi ka jawaz

gali mein aa ke main us ka makan bhul gaya

har ek badalti hui rut mein yaad aata hai

wo shaKHs jo mera nam-o-nishan bhul gaya

kuchh aisi baat kabutar ki aankh mein dekhi

uqab KHauf ke mare uDan bhul gaya

main sar-ba-kaf sar-e-maqtal kuchh is ada se gaya

ki mera dushman-e-jaan aan-ban bhul gaya

qabail aaj bhi shir-o-shakar nazar aate

KHatib-e-shahr magar wo zaban bhul gaya

zamin ki god mein itna sukun tha 'anjum'

ki jo gaya wo safar ki thakan bhul gaya