ye kya paDi hai tujhe dil jalon mein baiThne ki

ye kyā paḌī hai tujhe dil jaloñ meñ baiThne kī

ye umr to hai miyāñ dostoñ meñ baiThne kī

chhupā.ī jaatī nahīñ zardiyāñ so duur huuñ maiñ

vagarna hotī hai ḳhvāhish guloñ meñ baiThne kī

shumār merā bhī karte haiñ log in meñ magar

mirī majāl kahāñ shā.iroñ meñ baiThne kī

abhī na uñglī uThā mujh pe thoḌī mohlat de

tamīz siikh rahā huuñ baḌoñ meñ baiThne kī

mujhe badal ke koī aur hī banā diyā hai

ki intihā hai ye sūrat-garoñ meñ baiThne kī

dikhā rahe haiñ tavātur se ḳhāmiyāñ merī

bhagat rahā huuñ sazā ā.inoñ meñ baiThne kī

nahīñ majāl kisī kī ki muntashir kar de

banā chuke haiñ jo aadat safoñ meñ baiThne kī

ḳhazāne luTte raheñge ye ḳhālī hone tak

ujaaḌ degī ye aadat gharoñ meñ baiThne kī

ḳhudā atā kare ohda baḌā ġharīb ko aur

badal sake na vo ḳhū naukaroñ meñ baiThne kī

ḳhushāmadī nahīñ rakhtā hai apne kaam se kaam

to kyā paḌī hai tujhe afsaroñ meñ baiThne kī

ye dil scan karānā bahut zarūrī hai

ki ittilā.a hai tire dhaḌkanoñ meñ baiThne kī

hayāt sū-e-adam le ke jā rahī haiñ 'umar'

jo ādateñ haiñ ga.e mausamoñ meñ baiThne kī

ye kya paDi hai tujhe dil jalon mein baiThne ki

ye umr to hai miyan doston mein baiThne ki

chhupai jati nahin zardiyan so dur hun main

wagarna hoti hai KHwahish gulon mein baiThne ki

shumar mera bhi karte hain log in mein magar

meri majal kahan shairon mein baiThne ki

abhi na ungli uTha mujh pe thoDi mohlat de

tamiz sikh raha hun baDon mein baiThne ki

mujhe badal ke koi aur hi bana diya hai

ki intiha hai ye surat-garon mein baiThne ki

dikha rahe hain tawatur se KHamiyan meri

bhagat raha hun saza aainon mein baiThne ki

nahin majal kisi ki ki muntashir kar de

bana chuke hain jo aadat safon mein baiThne ki

KHazane luTte rahenge ye KHali hone tak

ujaD degi ye aadat gharon mein baiThne ki

KHuda ata kare ohda baDa gharib ko aur

badal sake na wo KHu naukaron mein baiThne ki

KHushamadi nahin rakhta hai apne kaam se kaam

to kya paDi hai tujhe afsaron mein baiThne ki

ye dil scan karana bahut zaruri hai

ki ittilaa hai tere dhaDkanon mein baiThne ki

hayat su-e-adam le ke ja rahi hain 'umar'

jo aadaten hain gae mausamon mein baiThne ki