ye tum se kis ne kaha hai ki dastan na kaho

ye tum se kis ne kahā hai ki dāstāñ na kaho

magar ḳhudā ke liye itnā sach yahāñ na kaho

ye kaisī chhat hai ki shabnam Tapak rahī hai yahāñ

ye āsmān hai tum us ko sā.ebāñ na kaho

rah-e-hayāt meñ nākāmiyāñ zarūrī haiñ

ye tajraba hai ise sa.ī-e-rā.egāñ na kaho

mirī jabīn batā.egī azmateñ us kī

use ḳhudā ke liye sañg-e-āstāñ na kaho

yahāñ muqīm haiñ vīrāniyāñ rag-o-pai meñ

tum aur kuchh bhī kaho us ko shahr-e-jāñ na kaho

jahāñ jahāñ bhī sitam-gar mileñ zarūrat hai

ki us maqām ko tum jāda-e-amāñ na kaho

muāshare kā asar to zarūr hai 'alvī'

mirī ġhazal ko zamāne kī dāstāñ na kaho

ye tum se kis ne kaha hai ki dastan na kaho

magar KHuda ke liye itna sach yahan na kaho

ye kaisi chhat hai ki shabnam Tapak rahi hai yahan

ye aasman hai tum us ko saeban na kaho

rah-e-hayat mein nakaamiyan zaruri hain

ye tajraba hai ise sai-e-raegan na kaho

meri jabin bataegi azmaten us ki

use KHuda ke liye sang-e-astan na kaho

yahan muqim hain viraniyan rag-o-pai mein

tum aur kuchh bhi kaho us ko shahr-e-jaan na kaho

jahan jahan bhi sitam-gar milen zarurat hai

ki us maqam ko tum jada-e-aman na kaho

muashare ka asar to zarur hai 'alwi'

meri ghazal ko zamane ki dastan na kaho