ye zindagi azab agar ho to kya karen

ye zindagī azaab agar ho to kyā kareñ

ik talḳh sī sharāb agar ho to kyā kareñ

tum se hamāre qalb o nazar kā muāmla

ik vaj.h-e-iztirāb agar ho to kyā kareñ

sidq-o-safā kī aarzū ab kyā kare koī

band āgahī kā baab agar ho to kyā kareñ

fitrat meñ jis kī roz-e-azal se hijāb hai

vo husn be-hijāb agar ho to kyā kareñ

ruḳh ko tumhāre chāñd se tashbīh de to deñ

gahnāyā māhtāb agar ho to kyā kareñ

ham rāz-e-dil chhupāte magar apnī zindagī

puurī khulī kitāb agar ho to kyā kareñ

kar lī hai tauba ham ne magar duḳhtar-e-enab

masjid meñ dastiyāb agar ho to kyā kareñ

ye zindagi azab agar ho to kya karen

ek talKH si sharab agar ho to kya karen

tum se hamare qalb o nazar ka muamla

ek wajh-e-iztirab agar ho to kya karen

sidq-o-safa ki aarzu ab kya kare koi

band aagahi ka bab agar ho to kya karen

fitrat mein jis ki roz-e-azal se hijab hai

wo husn be-hijab agar ho to kya karen

ruKH ko tumhaare chand se tashbih de to den

gahnaya mahtab agar ho to kya karen

hum raaz-e-dil chhupate magar apni zindagi

puri khuli kitab agar ho to kya karen

kar li hai tauba hum ne magar duKHtar-e-enab

masjid mein dastiyab agar ho to kya karen