yun dil hai sar-ba-sajda kisi ke huzur mein

yuuñ dil hai sar-ba-sajdā kisī ke huzūr meñ

jaise ki ġhota-zan ho koī bahr-e-nūr meñ

hañs hañs ke kah rahī hai chaman kī kalī kalī

aatā hai lutf husn ko apne zuhūr meñ

saaqī nigāh-e-mast se detā hai jab kabhī

lagte haiñ chaar chāñd hamāre surūr meñ

khā.eñ janāb-e-shaiḳh fareb-e-qayās-o-vahm

ye kaif-e-jāñ-navāz kahāñ chashm-e-hūr meñ

misl-e-kalīm kaun sune lan-tarāniyāñ

mere liye kashish hī kahāñ koh-e-tūr meñ

besh az do harf apnī nahīñ dāstān-e-dard

ham gir ke āsmān se aTke khajūr meñ

ye shoḳhiyāñ kalām meñ yūñhī nahīñ 'amīñ'

paḌhne chale haiñ aap ġhazal rāmpūr meñ

yun dil hai sar-ba-sajda kisi ke huzur mein

jaise ki ghota-zan ho koi bahr-e-nur mein

hans hans ke kah rahi hai chaman ki kali kali

aata hai lutf husn ko apne zuhur mein

saqi nigah-e-mast se deta hai jab kabhi

lagte hain chaar chand hamare surur mein

khaen janab-e-shaiKH fareb-e-qayas-o-wahm

ye kaif-e-jaan-nawaz kahan chashm-e-hur mein

misl-e-kalim kaun sune lan-taraniyan

mere liye kashish hi kahan koh-e-tur mein

besh az do harf apni nahin dastan-e-dard

hum gir ke aasman se aTke khajur mein

ye shoKHiyan kalam mein yunhi nahin 'amin'

paDhne chale hain aap ghazal rampur mein