zahiran shad hun farhan hun hamesha ki tarah

zāhiran shaad huuñ farhāñ huuñ hamesha kī tarah

bātinan zār-o-pareshāñ huuñ hamesha kī tarah

dil mirā barg-e-ḳhizāñ-dīda kī mānind sahī

maiñ parastār-e-bahārāñ huuñ hamesha kī tarah

merī āñkhoñ meñ kisī ne nahīñ dekhe aañsū

phir bhī ye sach hai ki giryāñ huuñ hamesha kī tarah

ravish-e-dahr se ranjīda huuñ bezār nahīñ

ravish-e-dahr pe ḳhandāñ huuñ hamesha kī tarah

jaan kar bhī ki tirā qurb hai ab nā-mumkin

maiñ tire qurb kā ḳhvāhāñ huuñ hamesha kī tarah

mujh se hai un kī vahī be-ruḳhī-o-be-mehrī

maiñ vahī banda-e-yārāñ huuñ hamesha kī tarah

mere anfās kī lau se nahīñ mahfil raushan

ik charāġh-e-tah-e-dāmāñ huuñ hamesha kī tarah

merī mastī pe na kuchh aur gumāñ ho yaaro

sāz-e-dil hī pe to raqsāñ huuñ hamesha kī tarah

sar uThā.e na vatan meñ kahīñ maz.hab kā junūñ

isī andeshe se larzāñ huuñ hamesha kī tarah

mujh ko aqdār-e-adab jaan se baḌh kar haiñ 'azīz

hurmat-e-fan kā nigahbāñ huuñ hamesha kī tarah

muztarib dīda-o-dil zehn hai uljhā uljhā

husn se tālib-e-darmāñ huuñ hamesha kī tarah

ālimoñ aur adīboñ se hai milnā-julnā

ahl-e-daulat se gurezāñ huuñ hamesha kī tarah

mere ausāf se hotī nahīñ pahchān mirī

apne aiboñ se numāyāñ huuñ hamesha kī tarah

inqilābāt ke āhang haiñ mere naġhme

barq huuñ āñdhī huuñ tūfāñ huuñ hamesha kī tarah

ho ke begāna-e-ālām zamāna maġhmūm

maiñ ġhazal-ḳhvāñ huuñ ġhazal-ḳhvāñ huuñ hamesha kī tarah

zahiran shad hun farhan hun hamesha ki tarah

baatinan zar-o-pareshan hun hamesha ki tarah

dil mera barg-e-KHizan-dida ki manind sahi

main parastar-e-bahaaran hun hamesha ki tarah

meri aankhon mein kisi ne nahin dekhe aansu

phir bhi ye sach hai ki giryan hun hamesha ki tarah

rawish-e-dahr se ranjida hun bezar nahin

rawish-e-dahr pe KHandan hun hamesha ki tarah

jaan kar bhi ki tera qurb hai ab na-mumkin

main tere qurb ka KHwahan hun hamesha ki tarah

mujh se hai un ki wahi be-ruKHi-o-be-mehri

main wahi banda-e-yaran hun hamesha ki tarah

mere anfas ki lau se nahin mahfil raushan

ek charagh-e-tah-e-daman hun hamesha ki tarah

meri masti pe na kuchh aur guman ho yaro

saz-e-dil hi pe to raqsan hun hamesha ki tarah

sar uThae na watan mein kahin mazhab ka junun

isi andeshe se larzan hun hamesha ki tarah

mujh ko aqdar-e-adab jaan se baDh kar hain 'aziz

hurmat-e-fan ka nigahban hun hamesha ki tarah

muztarib dida-o-dil zehn hai uljha uljha

husn se talib-e-darman hun hamesha ki tarah

aalimon aur adibon se hai milna-julna

ahl-e-daulat se gurezan hun hamesha ki tarah

mere ausaf se hoti nahin pahchan meri

apne aibon se numayan hun hamesha ki tarah

inqilabaat ke aahang hain mere naghme

barq hun aandhi hun tufan hun hamesha ki tarah

ho ke begana-e-alam zamana maghmum

main ghazal-KHwan hun ghazal-KHwan hun hamesha ki tarah