zabt-e-gham kar bhi liya to kya kiya

zabt-e-ġham kar bhī liyā to kyā kiyā

dil kī rag rag se lahū Tapkā kiyā

har tajallī aap kī tasvīrī thī

is liye maiñ har taraf dekhā kiyā

ġham ke sho.ale jaan tak sarkash hue

ishq soz-e-dil hī ko royā kiyā

luuT liiñ sab husn kī ḳhuddāriyāñ

ai nigāh-e-vāpsīñ ye kyā kiyā

thā tumhāre sāmne dil ko sukūñ

phir jo ghabrāyā to ghabrāyā kiyā

shām-e-ġham kī baḌh ga.iiñ tārīkiyāñ

ai charāġh-e-ārzū ye kyā kiyā

kis se paimān-e-mohabbat bāñdhiye

kaun kis kā rāsta dekhā kiyā

aap se ab kyā kaheñ is ke sivā

aap ne jo kuchh kiyā achchhā kiyā

hāsil-e-ġham bhī miTā kar rakh diyā

ai ġham-e-be-hāsilī ye kyā kiyā

tujh pe ye ilzām 'bāsit' kam nahīñ

pyaar kī nazroñ se kyoñ dekhā kiyā

zabt-e-gham kar bhi liya to kya kiya

dil ki rag rag se lahu Tapka kiya

har tajalli aap ki taswiri thi

is liye main har taraf dekha kiya

gham ke shoale jaan tak sarkash hue

ishq soz-e-dil hi ko roya kiya

luT lin sab husn ki KHuddariyan

ai nigah-e-wapsin ye kya kiya

tha tumhaare samne dil ko sukun

phir jo ghabraya to ghabraya kiya

sham-e-gham ki baDh gain tarikiyan

ai charagh-e-arzu ye kya kiya

kis se paiman-e-mohabbat bandhiye

kaun kis ka rasta dekha kiya

aap se ab kya kahen is ke siwa

aap ne jo kuchh kiya achchha kiya

hasil-e-gham bhi miTa kar rakh diya

ai gham-e-be-hasili ye kya kiya

tujh pe ye ilzam 'basit' kam nahin

pyar ki nazron se kyon dekha kiya