zarra zarra karbala manzar-ba-manzar tishnagi

zarra zarra karbalā manzar-ba-manzar tishnagī

apne hisse meñ to aa.ī hai sarāsar tishnagī

ye bhī dekhā hai sarāboñ se hue sairāb log

pāniyoñ ke saath bhī bahtī hai aksar tishnagī

ho ga.iiñ palkoñ se hī ruḳhsat vo maujeñ ḳhvāb kī

Derā Daale hai yahāñ āñkhoñ ke andar tishnagī

tujh meñ gar bārish samundar ke barābar hai to kyā

mere andar bhī hai sahrā ke barābar tishnagī

is mohazzab shahr meñ ādāb haiñ kuchh jashn ke

raqs kartī hai yahāñ nezoñ ke uupar tishnagī

kyuuñ hamārī chhat ke uupar bādaloñ kā shor hai

kyā hamāre ghar meñ jā.egī mukarrar tishnagī

zarra zarra karbala manzar-ba-manzar tishnagi

apne hisse mein to aai hai sarasar tishnagi

ye bhi dekha hai sarabon se hue sairab log

paniyon ke sath bhi bahti hai aksar tishnagi

ho gain palkon se hi ruKHsat wo maujen KHwab ki

Dera Dale hai yahan aankhon ke andar tishnagi

tujh mein gar barish samundar ke barabar hai to kya

mere andar bhi hai sahra ke barabar tishnagi

is mohazzab shahr mein aadab hain kuchh jashn ke

raqs karti hai yahan nezon ke upar tishnagi

kyun hamari chhat ke upar baadalon ka shor hai

kya hamare ghar mein jaegi mukarrar tishnagi