zaruraton ki hamahami mein jo rah chalte bhi Tokti hai wo shairi hai

zarūratoñ kī hamāhamī meñ jo raah chalte bhī Toktī hai vo shā.irī hai

maiñ jis se āñkheñ churā rahā huuñ jo merī nīndeñ churā rahī hai vo shā.irī hai

jo aag siine meñ pal rahī hai machal rahī hai bayāñ bhī ho to ayaañ na hogī

magar in āñkhoñ ke ābloñ meñ jo jal rahī hai pighal rahī hai vo shā.irī hai

thā ik talātum mai-e-taḳhayyul ke jām-o-ḳhum meñ to jal-tarañgoñ pe chhiḌ ga.ī dhun

jo parda-dār-e-nashāt-e-ġham hai jo zaḳhma-kār-e-navā-garī hai vo shā.irī hai

yahāñ to har din hai ik sunāmī hai ek jaisī har ik kahānī to kyā sunoge

magar vo ik ḳhasta-hāl kashtī jo misl-e-lāsha paḌī huī hai vo shā.irī hai

hai bādaloñ ke siyāh ghoḌoñ ke saath varna havā kī parchhā.īñ kis ne dekhī

dhulī dhulī dhuup ke badan par jo chhāñv jaisī subuk-ravī hai vo shā.irī hai

vahī to kal surma.ī chaTānoñ ke darmiyāñ se guzar rahī thī biphar rahī thī

vahī nadī ab thakī thakī sī jo ret ban kar bikhar ga.ī hai vo shā.irī hai

ghaḌī kī Tik-Tik diloñ kī dhak dhak se baat kartī agar tanaffus muḳhil na hotā

to aisī shiddat kī gū-magū meñ jo ham-kalāmī kī ḳhāmushī hai vo shā.irī hai

jo qahqahoñ aur qumqumoñ se sajī-dhajī hai usī galī se guzar ke dekho

añdhere zīnoñ pe sar-ba-zānū jo bekasī ḳhuun thūktī hai vo shā.irī hai

na hijratoñ ke haiñ daaġh baaqī na apnī gum-gashtagī kā koī surāġh baaqī

so ab jo taarī hai sogvārī jo apnī fitrat se mātamī hai vo shā.irī hai

hai lāla-zār-e-ufuq se aage abhī jo dhundlā sā ik sitāra hai isti.āra

jo hogī tīra-shabī meñ raushan vo koī zohra na mushtarī hai vo shā.irī hai

ġhuzashtagānī hai zindagānī na ye havā hai na hai ye paanī faqat ravānī

jo vāqi.ātī hai vo hai qissa jo vāqa.ī hai vo shā.irī

jo husn-e-manzar hai canvas par vo rañgrezī nahīñ barash kī to aur kyā hai

ab is se aage koī nazar jis jahān-e-ma.anī ko DhūñDhtī hai vo shā.irī hai

ye sher-goī vo ḳhud-farāmosh kaifiyat hai jahāñ ḳhudī kā guzar nahīñ hai

ḳhudī kī bāz-āvarī se pahle jo be-ḳhudī kī ḳhud-āgahī hai vo shā.irī hai

jo vārdātī sadāqatoñ kī alāmateñ haiñ hadīs-e-dil kī rivāyateñ haiñ

usī amānat ko jo hamesha sambhāltī hai sañvārtī hai vo shā.irī hai

anā ke dam se hai nāz-e-hastī anā ke jalvoñ kā ā.īna-dār hai har ik fan

vo ḳhud-numā.ī jo ḳhushnumā hai magar jo thoḌī sī nargisī hai vo shā.irī hai

jo baat nasrī hai nazriyātī hai jadliyātī hai vo mukammal kabhī na hogī

magar jo mujmal hai aur mauzūñ hai aur hatmī aur āḳhirī hai vo shā.irī hai

tijāratoñ kī siyāsateñ ab adab kī ḳhidmat-guzāriyoñ meñ lagī huī haiñ

jo jī rahā hai jo gā rahā hai mushā.era hai jo mar rahī hai vo shā.irī hai

jo dīda-rezī bhī jāñ-gudāzī ke saath hogī to lafz saare guhar baneñge

'ḳhalish' yaqīnan ye sirf zor-e-qalam nahīñ hai jo shā.irī hai vo shā.irī hai

zaruraton ki hamahami mein jo rah chalte bhi Tokti hai wo shairi hai

main jis se aankhen chura raha hun jo meri ninden chura rahi hai wo shairi hai

jo aag sine mein pal rahi hai machal rahi hai bayan bhi ho to ayan na hogi

magar in aankhon ke aablon mein jo jal rahi hai pighal rahi hai wo shairi hai

tha ek talatum mai-e-taKHayyul ke jam-o-KHum mein to jal-tarangon pe chhiD gai dhun

jo parda-dar-e-nashat-e-gham hai jo zaKHma-kar-e-nawa-gari hai wo shairi hai

yahan to har din hai ek sunami hai ek jaisi har ek kahani to kya sunoge

magar wo ek KHasta-haal kashti jo misl-e-lasha paDi hui hai wo shairi hai

hai baadalon ke siyah ghoDon ke sath warna hawa ki parchhain kis ne dekhi

dhuli dhuli dhup ke badan par jo chhanw jaisi subuk-rawi hai wo shairi hai

wahi to kal surmai chaTanon ke darmiyan se guzar rahi thi biphar rahi thi

wahi nadi ab thaki thaki si jo ret ban kar bikhar gai hai wo shairi hai

ghaDi ki Tik-Tik dilon ki dhak dhak se baat karti agar tanaffus muKHil na hota

to aisi shiddat ki gu-magu mein jo ham-kalami ki KHamushi hai wo shairi hai

jo qahqahon aur qumqumon se saji-dhaji hai usi gali se guzar ke dekho

andhere zinon pe sar-ba-zanu jo bekasi KHun thukti hai wo shairi hai

na hijraton ke hain dagh baqi na apni gum-gashtagi ka koi suragh baqi

so ab jo tari hai sogwari jo apni fitrat se matami hai wo shairi hai

hai lala-zar-e-ufuq se aage abhi jo dhundla sa ek sitara hai istiara

jo hogi tira-shabi mein raushan wo koi zohra na mushtari hai wo shairi hai

ghuzashtagani hai zindagani na ye hawa hai na hai ye pani faqat rawani

jo waqiati hai wo hai qissa jo waqai hai wo shairi

jo husn-e-manzar hai canwas par wo rangrezi nahin barash ki to aur kya hai

ab is se aage koi nazar jis jahan-e-mani ko DhunDhti hai wo shairi hai

ye sher-goi wo KHud-faramosh kaifiyat hai jahan KHudi ka guzar nahin hai

KHudi ki baz-awari se pahle jo be-KHudi ki KHud-agahi hai wo shairi hai

jo wardati sadaqaton ki alamaten hain hadis-e-dil ki riwayaten hain

usi amanat ko jo hamesha sambhaalti hai sanwarti hai wo shairi hai

ana ke dam se hai naz-e-hasti ana ke jalwon ka aaina-dar hai har ek fan

wo KHud-numai jo KHushnuma hai magar jo thoDi si nargisi hai wo shairi hai

jo baat nasri hai nazriyati hai jadliyati hai wo mukammal kabhi na hogi

magar jo mujmal hai aur mauzun hai aur hatmi aur aaKHiri hai wo shairi hai

tijaraton ki siyasaten ab adab ki KHidmat-guzariyon mein lagi hui hain

jo ji raha hai jo ga raha hai mushaera hai jo mar rahi hai wo shairi hai

jo dida-rezi bhi jaan-gudazi ke sath hogi to lafz sare guhar banenge

'KHalish' yaqinan ye sirf zor-e-qalam nahin hai jo shairi hai wo shairi hai