zist hai ek masiyat soz-e-dili tere baghair

ziist hai ik ma.asiyat soz-e-dilī tere baġhair

haañ mohabbat bhī hai ik ālūdgī tere baġhair

shām-e-ġham tere tasavvur hī se āñkhoñ meñ charāġh

varna mere ghar meñ ho aur raushnī tere baġhair

ye jahāñ tanhā bhalā kyā mujh ko de paatā shikast

maiñ ne kab khāyā fareb-e-dostī tere baġhair

raat ke siina meñ hai ik zaḳhm jis kā naam chāñd

ik sunahrī jū-e-ḳhūñ hai chāñdnī tere baġhair

har-nafas hai pai-ba-pai nākāmiyoñ kā sāmnā

ziist hai ik mustaqil sharmindagī tere baġhair

de ga.ī dhokā magar shā.istagī-e-ġham mirī

aa rahā hai dil pe ilzām-e-ḳhushī tere baġhair

ilm-o-aql-o-nām-o-jāh-o-zor-o-zar sab hech ishq

ho ke sab kuchh bhī nahīñ kuchh aadmī tere baġhair

dil kī shādābī kī zāmin hai tū hī ai yād-e-dost

aa na paa.ī ġham ke phūloñ meñ namī tere baġhair

ek ik lamhe meñ jab sadiyoñ kī sadiyāñ kaT ga.iiñ

aisī kuchh rāteñ bhī guzrī haiñ mirī tere baġhair

zindagī 'mullā' kī hai mahjūb nām-e-zindagī

rah ga.ī hai shā.irī hī shā.irī tere baġhair

zist hai ek masiyat soz-e-dili tere baghair

han mohabbat bhi hai ek aaludgi tere baghair

sham-e-gham tere tasawwur hi se aankhon mein charagh

warna mere ghar mein ho aur raushni tere baghair

ye jahan tanha bhala kya mujh ko de pata shikast

main ne kab khaya fareb-e-dosti tere baghair

raat ke sina mein hai ek zaKHm jis ka nam chand

ek sunahri ju-e-KHun hai chandni tere baghair

har-nafas hai pai-ba-pai nakaamiyon ka samna

zist hai ek mustaqil sharmindagi tere baghair

de gai dhoka magar shaistagi-e-gham meri

aa raha hai dil pe ilzam-e-KHushi tere baghair

ilm-o-aql-o-nam-o-jah-o-zor-o-zar sab hech ishq

ho ke sab kuchh bhi nahin kuchh aadmi tere baghair

dil ki shadabi ki zamin hai tu hi ai yaad-e-dost

aa na pai gham ke phulon mein nami tere baghair

ek ek lamhe mein jab sadiyon ki sadiyan kaT gain

aisi kuchh raaten bhi guzri hain meri tere baghair

zindagi 'mulla' ki hai mahjub nam-e-zindagi

rah gai hai shairi hi shairi tere baghair