zindagi KHak mein bhi thi tere diwane se

zindagī ḳhaak meñ bhī thī tire dīvāne se

ab na uTThegā bagūlā koī vīrāne se

is qadar ho ga.ī kasrat tire dīvānoñ kī

qais ghabrā ke chalā shahr ko vīrāne se

jal-marā aag mohabbat kī ise kahte haiñ

jalnā dekhā na gayā sham.a kā parvāne se

kis kī begāna-vashī se ye tahayyur aayā

ki ab apne bhī nazar aate haiñ begāne se

shaiḳh sāhab bhī hue motaqid-e-pīr-e-muġhāñ

aaj ye taaza ḳhabar aa.ī hai mai-ḳhāne se

itnī tauhīn na kar merī balā-noshī kī

sāqiyā mujh ko na de maap ke paimāne se

ai 'vafā' apne bhī jab aañkh churā lete haiñ

be-ruḳhī kā ho gilā kyā kisī begāne se

zindagi KHak mein bhi thi tere diwane se

ab na uTThega bagula koi virane se

is qadar ho gai kasrat tere diwanon ki

qais ghabra ke chala shahr ko virane se

jal-mara aag mohabbat ki ise kahte hain

jalna dekha na gaya shama ka parwane se

kis ki begana-washi se ye tahayyur aaya

ki ab apne bhi nazar aate hain begane se

shaiKH sahab bhi hue motaqid-e-pir-e-mughan

aaj ye taza KHabar aai hai mai-KHane se

itni tauhin na kar meri bala-noshi ki

saqiya mujh ko na de map ke paimane se

ai 'wafa' apne bhi jab aankh chura lete hain

be-ruKHi ka ho gila kya kisi begane se