اکیلی

افراد

سوشیلا : (ایک نوجوان عورت جس کی آواز میں رت جگے کی خرخراہٹ ہو)

کشور : (ایک دولتمند آدمی۔۔۔۔۔۔ آواز میں با نکپن ہو)

موتی : (ایک جذباتی نوجوان)

چپلا : (ایک عام کنواری لڑکی)

مدن : (کشورکا دوست)

قلی :

اور چار پانچ آرکسٹرا :

۔۔۔۔۔۔۔۔۔۔۔۔۔۔۔۔۔۔۔۔۔

(ریل گاڑی کے چلنے کی آواز۔۔۔۔۔۔اس آواز پر ذیل کی عبارت سپرامپوز کی جائے)

تمہیدیہ: زندگی کی گاڑی چلی جارہی ہے۔۔۔۔۔۔ دندناتی ہوئی۔۔۔۔۔۔ کسے معلوم ہے کہ اس کے بھاری بھر کم پہیوں کے نیچے کتنے پتھرپس جاتے ہیں۔ کتنی جاندار چیزیں اس کے سدا گھومنے والے چکرّ کی لپیٹ میں آجاتی ہیں۔۔۔۔۔۔ زندگی کی گاڑی یوں ہی چلتی رہے گی۔۔۔۔۔۔ دندناتی ہوئی۔ بچے گھٹنو ں چلتے رہیں گے۔ جوان اونچی اونچی فضاؤں میں اڑتے اور گرتے رہیں گے۔۔۔۔۔۔ بڑھاپا روتا رہے گا۔ جوانی چِلّاتی رہے گی اور۔۔۔۔۔۔

۔۔۔۔۔۔زندگی کی انتھک گاڑی چلتی رہے گی۔۔۔۔۔۔ دندناتی ہوئی۔ تدبیر تقدیر سے ٹکراتی رہے گی۔ امید اور یاس باہم دست و گریباں ہوتی رہیں گی۔۔۔۔۔۔۔حسن اپنا دستر خوان بچھائے عشق کوخوراک دیتا رہے گا۔۔۔۔۔۔ اور۔۔۔۔۔۔زندگی کی گاڑی دندناتی رہے گی۔

ایک عورت اور ایک مرد۔ دو عورتیں اور ایک مرد۔ دو مرد اور ایک عورت یہ گردان ازل سے جاری ہے اور ابد تک جاری رہے گی۔ قصہ آدم رنگین تر ہوتا جائے گا اور۔۔۔۔۔۔زندگی کی آ ہنی گاڑی پیچ کھاتی ہوئی چلتی رہے گی۔

۔۔۔۔۔۔۔۔۔۔۔۔۔۔۔۔۔۔۔۔۔

(گاڑی کی آواز چند لمحات تک جاری رہے گی۔۔۔۔۔۔ پھر اسی گاڑی کے ٹھہرنے کی آواز آئے۔ یاد رہے کہ رات کا وقت ہے۔۔۔۔۔۔ خوانچے والوں کی اُداس تھکی ہوئی آواز کبھی کبھی سُنائی دے۔ اس دوران میں انجن کی شائیں شائیں برابر آتی رہے۔ ذیل کا ٹکڑا ان آوازوں پر سپرامپوز کیا جائے۔

سوشیلا: (گھبرائے ہوئے لہجے میں)۔۔۔۔۔۔قُلی۔۔۔۔۔۔قُلی۔۔۔۔۔۔(زور سے)قُلی!

ایک آدمی: کیوں بھئی کوئی قلی ہے۔۔۔۔۔۔؟

سوشیلا: موہن۔۔۔۔۔۔موہن۔۔۔۔۔۔موہن کہاں گیا؟

وہی: آدمی موہن؟

سوشیلا: کچھ نہیں۔۔۔۔۔۔قُلی۔۔۔۔۔۔قُلی!

قلی: جی حضور!

سوشیلا: (گھبراہٹ میں یہ میرا سامان باہر نکالو۔۔۔۔۔۔کون سا اسٹیشن ہے۔

قلی: یہ ایک سوٹ کیس اور بسترا ہی ہے یا کچھ اور بھی ہے!

سوشیلا: اپنے آپ سے)موہن کہاں گیا؟۔۔۔۔۔۔ یہ کون سا اسٹیشن ہے۔۔۔۔۔۔ٹھہرو قلی۔اسباب ابھی نہ اُتارو۔۔۔۔۔۔ ان کا بستر اور ٹرنک کہاں ہے۔۔۔۔۔۔

قلی: (اپنے دھیان میں) ایک آنہ پھیرے کا میم صاحب۔آپ سے جیاد ا تھوڑے لوں گا۔

سوشیلا: اساب باہر نکال دیا۔۔۔۔۔۔ لیکن۔۔۔۔۔۔لیکن۔۔۔۔۔۔ یہ کون سا اسٹیشن ہے موہن کہاں ہے۔۔۔۔۔۔میرے سوٹ کیس کا تالا کس نے کھولا ہے۔

قلی: ایسے ہی کھلا پڑا تھا۔

(ٹرنک کھولنے کی آواز۔۔۔۔۔۔پھر دبی دبی چیخ)

سوشیلا: میرے ز یور۔۔۔۔۔۔میں لُٹ گئی۔

قلی: کیا ہوا میم صاحب۔

سوشیلا: (پریشانی کے عالم میں) کچھ نہیں۔۔۔۔۔۔تم جاؤ۔ میرا اسباب یہیں پڑا رہنے دو۔

(چند لمحات تک انجن کی شائیں شائیں۔ پھر سیٹی کی آواز۔ انجن کی چیخ۔ پھر گاڑی چلنے کی آواز۔۔۔۔۔۔آہستہ آہستہ یہ آواز دھیمی ہوتی جائے)

کشور: م۔۔۔۔۔۔م۔۔۔۔۔۔میں سمجھتا ہوں آپ کسی کا انتظار کررہی ہیں۔

سوشیلا: (چونک کر) موہن تم(پھر فوراً ہی ناامید ہو کر) نہیں! موہن کہاں ہے؟

کشور: (بڑے بانکے انداز میں) میں سمجھتا ہوں آپ کو کسی کا انتظار ہے۔

سوشیلا: (گھٹی گھٹی آواز میں)۔۔۔جی نہیں۔۔۔۔۔۔ میں اکیلی ہوں۔

کشور: (مسکرا کر)۔۔۔۔۔۔ آپ اکیلی نہیں ہیں۔۔۔۔۔۔قلی ان کا اسباب اٹھاؤ۔

(دور سے گاڑی کی چیخ مدھم میں آواز آئے اور تھوڑی دیر تھرتھرا کر ڈوب جائے)

(ناچنے کی آواز۔۔۔۔۔۔سوشیلا توڑا لیتی ہے)

کشور: بھئی سوشیلا خوب ناچتی ہو۔۔۔۔۔۔ ایسا معلوم ہوتا ہے ہوا میں سگریٹ کا دھواں پریشان ہورہا ہے۔۔۔۔۔۔ آنکھوں کے سامنے خوبصورت اداؤں اور لچکیلے خیالوں کا ایک بھنور سا بن جاتا ہے۔ ایک عجیب چکر میں آدمی پھنس جاتا ہے۔ سمجھ میں نہیں آتا تم کہاں سے شروع ہوتی اور کہاں ختم ہو جاتی ہو۔(ناچ بند ہو جاتا ہے۔ زمین پر گھنگرؤں کے ساتھ سوشیلا کے چلنے کی آواز آتی ہے)

سوشیلا: ایک صرف آپ نے داد دی تو کیا ہوا۔۔۔۔۔۔ میں کچھ اور بھی چاہتی ہوں۔۔۔۔۔۔

کشور: کیا چاہتی ہو تم۔۔۔۔۔۔ تمہیں اور کس چیز کی ضرورت ہے؟

سوشیلا: یہ مکان۔۔۔۔۔۔اس کے آٹھ بڑے بڑے سنسان کمروں۔۔۔۔۔۔ ایک چھوٹے سے باغ اور تین چار نوکروں کی جھکی ہوئی کمر کے آگے کیا اور کچھ بھی نہیں۔۔۔۔۔۔ میں چاہتی ہوں۔۔۔۔۔۔ میں چاہتی ہوں۔۔۔۔۔۔ جانے میں کیا چاہتی ہوں۔

کشور: (ہنس کر) کچھ نہ چاہ کر نہ چاہنا ہی عورت کی سب سے بڑی چاہ ہے۔۔۔۔۔۔ لیکن میں پوچھتا ہوں آج کل تم سوچتی کیا رہتی ہو۔

سوشیلا: (مضطرب لہجے میں)۔۔۔۔۔۔میں یہ سوچتی رہتی ہوں اس خالی گھر میں میں ایک خوبصورت تپائی ہو جس کو آپ اپنی مرضی کے مطابق سجاتے رہتے ہیں۔

کشور: اس لیئے کہ تپائی اور عورت میں کوئی زیادہ فرق نہیں۔۔۔۔۔۔تپائی پر سے اگر کپڑا سرک جائے تو بڑے بڑے قیمتی پھولدان گر کر چکنا چور ہو جایا کرتے ہیں اور۔۔۔۔۔۔

سوشیلا: بس۔۔۔۔۔۔بس پر ماتما کے لیئے اس سے آگے نہ کہیئے گا۔۔۔۔۔۔ کشور صاحب آپ عورت کو بالکل نہیں جانتے۔۔۔۔۔۔ وہ مرد عورت کو کیا جانے جسے پلیٹ فارم پر کھوئے ہوئے ٹکٹ کی طرح ایک عورت مل گئی ہو۔۔۔۔۔۔ میں جو کچھ چاہتی ہوں مجھے معلوم ہے۔ آج سے دو برس پہلے میں گھر سے بھاگ کر سونے اور چاندی کے چور موہن کے ساتھ ایک ریل گاڑی میں سوار ہوئی تھی اس وقت میرے دل میں جس بات کی چاہ تھی مجھے اب بھی یاد ہے۔۔۔۔۔۔ اور سچ پوچھئے تو وہ نامکمل چاہ۔ وہی پیاسی خواہش میرے اندر تڑپ رہی ہے۔۔۔۔۔۔ وہ الفاظ جو میری زبان کی نوک پر آکر جم گئے تھے پگھل کر باہر نکلنے کے لیئے بیتاب ہیں۔۔۔۔۔۔میں اکیلی ہوں۔۔۔۔۔۔ کشور صاحب میں اکیلی ہوں۔۔۔۔۔۔ دو برس سے میں اس خوفناک طور پر سنسان مکان میں ان گھنگرؤں کی اداس جھنجھناہٹیں سناکرتی ہوں۔۔۔۔۔۔ میں کچھ اور بھی سُننا چاہتی ہوں۔۔۔۔۔۔دنیا میں گھنگرؤں کی جھنجھناہٹ کے علاوہ اور بہت سی آوازیں موجود ہیں۔ میں سب کی سب سُننا چاہتی ہوں۔۔۔۔۔۔میں چاہتی ہوں۔ میرے اردگرد ہجوم ہوں۔ میں ان ہجوموں کے اندر گھر جانا چاہتی ہوں۔۔۔۔۔۔ آواز کے سمندر میں ڈبکیاں لگانا چاہتی ہوں۔۔۔۔۔۔ میں بہت کچھ چاہتی ہوں۔

(ہجوم کا شور۔۔۔۔۔۔ ذیل کے ٹکڑے اس پر سپرامپوز کیئے جائیں)

الف: وار فنڈ کے سلسلے میں مس سوشیلا کا ناچ۔

ب: مس سوشیلا پہلی مرتبہ اسٹیج پر۔

ج: ٹاؤن ہال میں ایک شاندار اجتماع۔

د: رائے بہادر لالہ کشور چند کی مساعی جمیلہ۔

(ہجوم کا شور بڑی صفائی سے رقص کے ایک ٹکڑے میں تحلیل کیا جائے)

(رقص پرے اورآرکسٹرا کے ساتھ ہو۔۔۔۔۔۔ توڑے وغیرہ لیئے جائیں۔جب رقص ختم ہو جائے تو داد کے نعرے بلند ہوں۔ تالیاں پیٹی جائیں۔۔۔۔۔۔ آہستہ آہستہ یہ شور تحلیل ہو جائے)

سوشیلا: (سخت گھبراہٹ میں۔۔۔۔۔۔لہجہ لرزاں ہو جیسے جذبات سے بھرپور ہے)۔۔۔۔۔۔میں۔۔۔۔۔۔ میں۔۔۔۔۔۔میں آپ لوگوں کی قدردانی۔۔۔۔۔۔میں آپ لوگوں کی قدردانی کا شکریہ ادا کرتی ہوں( حلق میں جیسے کچھ پھنس جاتا ہے۔۔۔ میں پہلی مرتبہ اسٹیج پر آئی ہوں۔۔۔۔۔۔ اس لیئے۔۔۔۔۔۔ میں اس لیئے(ہنسنے کی کوشش کرتے ہوئے)کچھ گھبرا سی گئی ہوں۔۔۔۔۔۔میں نے اتنا ہجوم پہلے کبھی نہیں دیکھا۔۔۔۔۔۔ میں۔۔۔۔۔۔ میں ایک(جلدی سے) بار پھر آپ کا شکریہ ادا کرتی ہوں۔

(ہجوم کا شور اور تالیوں کی آواز)

(نوٹ: یہ شور آہستہ آہستہ تحلیل کردیا جائے۔)

کشور: تم نے میری تالی کی آواز سُنی تھی سوشیلا۔

سوشیلا: (ہجوم کا اثر ابھی تک اس پر قائم ہے)نہیں۔۔۔۔۔۔ میں نے کسی کی تالی کی آواز نہیں سُنی۔۔۔۔۔۔ مجھے تو ایسا محسوس ہوتا تھا کہ تقدیر کے دو بڑے بڑے ہاتھ میرے کانوں کے پاس ایک نہ ختم ہونے والی تالی بجا رہے ہیں۔۔۔۔۔۔ اُف یہ آواز کتنی بھیانک تھی۔

کشور: دو برس کی تنہائی ختم ہو چکی۔۔۔۔۔۔ ان آٹھ سنسان کمروں، نوکروں ۔کی جھکی ہوئی کمر اور چھوٹے باغیچے کے آگے بہت کچھ پڑا ہے جس کی سیاحت تم نے اب شروع کردی ہے۔۔۔۔۔۔ گھبراؤ نہیں دنیا اتنی بڑی نہیں جتنی کہ تم سمجھے بیٹھی ہو۔۔۔۔۔۔(ہنس کر) اب کیا سوچ رہی ہو!

سوشیلا: یہ سوچ رہی ہوں۔۔۔۔۔۔میں پوچھتی ہوں آپ مجھ سے محبت کیوں نہیں کرتے۔۔۔۔۔۔(جذباتی انداز میں۔۔۔۔۔۔دو سال ہوگئے ہیں مجھے یہاں آئے ہوئے۔ آپ نے ایک بار بھی مجھے محبت کی نظروں سے نہیں دیکھا۔۔۔۔۔۔ میں عورت ہوں۔ ایک نامکمل عورت ہوں۔۔۔۔۔۔کرسی نہیں ہوں۔۔۔۔۔۔ایک بار بھی آپ نے محبت بھرا کلمہ منہ سے نہیں نکالا۔۔۔۔۔۔ کیا میں خوبصورت نہیں، کیا مجھ میں وہ خوبیاں نہیں جو مرد کے دل میں محبت پیدا کرتی ہیں۔۔۔۔۔۔ مجھ میں کیا نقص ہے جو آپ نے مجھے ان نگاہوں سے دیکھنا گوارا نہیں کیا جو عورت کے اندر نسوانیت بیدار کرتی ہیں۔ جو عورت کو بتاتی ہیں کہ وہ عورت ہے مٹی کی ڈھیری نہیں۔۔۔۔۔۔ دو برس تک میں سوچا کی ہوں۔ دو برس تک میں آپ کی نگاہوں میں محبت کی اُداسی ڈھونڈ رہی ہوں مگر۔۔۔۔۔۔میں پوچھتی ہوں مجھے یہاں لانے سے آپ کا مطلب کیا تھا۔۔۔۔۔۔ آپ نے کوئی ہاتھی خرید لیا ہوتا کوئی بندر پال لیا ہوتا۔۔۔۔۔۔ کوئی مینا پنجرے میں ڈال لی ہوتی۔

کشور: (مسکرا کر) آہستہ۔۔۔۔۔۔آہستہ(وقفہ) لو اب پوچھو کیا چاہتی ہو۔

سوشیلا: (تھک کر) میں کچھ پوچھنا نہیں چاہتی۔

کشور: تو میں تم سے اک بات پوچھنا چاہتا ہوں۔۔۔۔۔۔ میں نے ان دو برسوں میں ایک مرتبہ بھی تمہیں محبت بھری نظروں سے نہیں دیکھا۔ درست ہے۔۔۔۔۔۔ اب تم یہ بتاؤ کیا تم مجھ سے محبت کرتی ہو۔۔۔۔۔۔ مجھ سے محبت کرسکتی ہو۔

(چند لمحات خاموشی طاری رہے)

کشور: بولو۔۔۔۔۔۔ کیا تم مجھ سے محبت کرتی ہو۔۔۔۔۔۔ کیا تم مجھ سے محبت کرسکتی ہو۔

سوشیلا: (وقفہ)نہیں۔۔۔۔۔۔میں آپ سے محبت۔۔۔۔۔۔نہیں کرتی۔۔۔۔۔۔میں آپ سے محبت۔۔۔۔۔۔نہیں میں اس کے متعلق اس وقت وثوق سے کچھ نہیں کہہ سکتی۔ لیکن میرا خیال ہے میں آپ سے کبھی محبت نہیں کرسکوں گی۔ اس لیئے کہ آپ عورت سے کوسوں دُور ہیں۔

کشور: تم ٹھیک کہتی ہو۔۔۔۔۔۔میں عورت سے اتنا ہی دُور ہوں جتنا کہ مریخ ہمارے اس کرّہ زمین سے دُور ہے۔۔۔۔۔۔لیکن اس میں میرا کوئی قصور نہیں۔۔۔۔۔۔ تم غور کرو تو یہ سارا قصور اس دُوری کا ہے۔۔۔۔۔۔ میں۔۔۔۔۔۔تم جانتی ہی ہو کہ میں ایک دولتمند آدمی ہوں۔۔۔۔۔۔چیزیں خریدنے کا عادی۔۔۔۔۔۔ میں نے صرف تمہارے منہ سے محبت محبت نہیں سنی۔ یہ لفظ میں اس سے پیشتر کئی مرتبہ سن چکا ہوں۔۔۔۔۔۔ میں چاہتا ہوں کہ اس سے مجھے دلچسپی پیدا ہو جائے مگر۔۔۔۔۔۔افسوس ہے کہ تم دولتمند نہیں ہو۔۔۔۔۔۔ تم میری باتوں کا مطلب کیسے سمجھو گی۔۔۔۔۔۔محبت(ہنس کر)۔۔۔۔۔۔ یقیناً یہ کوئی دلچسپ چیز ہوگی۔ مگر میں صرف اتنا جانتا ہوں کہ یا تو کوئی چیز پسند کی جاتی ہے یا ناپسند۔۔۔۔۔۔ میں تمہیں پسند کرتا ہوں۔۔۔۔۔۔ اس کے باوجود تمہیں پسند کرتا ہوں کہ تم مجھ سے محبت نہیں کرتیں۔۔۔۔۔۔میرا مطلب یہ ہے کہ مجھے پسند نہیں کرتیں۔

سوشیلا: میں آپ کوپسند ضرور کرتی ہوں اس لیئے نہیں کہ آپ مجھ سے محبت نہیں کرتے بلکہ اس لیئے کہ آپ اچھے آدمی ہیں۔۔۔۔۔۔اگر آپ محبت کرنا بھی چاہیں تو نہ کرسکیں گے۔۔۔۔۔۔ اور میں۔۔۔۔۔۔اور میں ایسے نقطے پر پہنچ چکی ہوں جہاں ایک ایسا خطرناک موڑ آتا ہے کہ پچھلی زندگی کے تمام واقعات اوجھل ہوجاتے ہیں۔۔۔۔۔۔

کشور: میری سمجھ میں کچھ بھی نہیں آیا(ہنس کر) سوشیلا تمہاری باتیں سمجھنے کے لیئے مجھے ضرور کسی سے محبت کرنا پڑے گی۔۔۔۔۔۔اچھا بھلا یہ تو بتاؤ محبت کرنے کے لیئے پہلے کیا کچھ کرنا پڑتا ہے۔۔۔۔۔۔ میرا مطلب ہے محبت میرے دل میں کس طریقے سے پیدا ہوسکتی ہے۔۔۔۔۔۔کیا تم میرے اندر محبت پیدا کرسکتی ہو؟

سوشیلا: (وقفہ) کشور صاحب آپ نے بڑی سخت غلطی کی جو مجھے سجا بنا کر اس دنیا میں لے گئے جو خواہشوں سے بھری ہوئی ہے۔۔۔۔۔۔ میں اکیلی اچھی تھی۔۔۔۔۔۔اب مجھے ہجوم سے ڈر لگتا ہے۔۔۔۔۔۔کشور صاحب میں تنہا رہنا چاہتی ہوں۔۔۔۔۔۔مجھے ڈر ہے۔۔۔۔۔۔مجھے ڈر ہے۔۔۔۔۔۔ اگر میرے گونگے جذبات احساس کی شدت سے بول اُٹھے تو میرے کان بہرے ہو جائیں گے۔۔۔۔۔۔مجھے کوئی آواز سنائی نہ دے گی۔۔۔۔۔۔ آپ کی آواز بھی سنائی نہ دے گی۔

کشور: (ہنستا ہے) تم دیوانی ہو۔۔۔۔۔۔(ہنستا ہے)

(دھیمے دھیمےُ سروں میں وا ئلن بجائی جائے۔ذیل کا مکالمہ جب تک جاری رہے اس کے عقب میں وائلن بجتی رہے)

موتی: (سرگوشیوں میں)سوشیلا تم سچ مچ دیوانی ہو۔

سوشیلا: نہیں تم نہیں سمجھتے موتی۔۔۔۔۔۔ تمہاری باتیں ایسی ہیں کہ میں بہک جاتی ہوں۔۔۔۔۔۔

موتی: تم کتنی سُندر ہو۔

(سانسوں کی آواز)

موتی: چاند کی روشنی میں تمہاری گردن دیکھتا ہوں تو ایسا معلوم ہوتا ہے میرا ہی کوئی حسین خیال منجمد ہوگیا ہے۔۔۔۔۔۔

(سانسوں کی آواز)

موتی: تمہارے سانس میرے سانسوں میں گھل مل رہے ہیں۔۔۔۔۔۔ آج کی رات کتنی پرُاسرار ہے۔

(سوشیلا تیزی سے سانس لیتی ہے)

موتی: تم اُس رات اسٹیج پر رقص کررہی تھیں اور میں ایک کونے میں بیٹھا تمہاری ہر لچک کو اپنے دل میں جذب کررہا تھا۔

سوشیلا: (بے خود ہو کر) موتی(آواز بھینچ جاتی ہے) موتی۔آؤ۔۔۔۔۔۔یہاں سے بھاگ جائیں۔۔۔۔۔۔ لیکن کہاں جائیں گے؟۔۔۔۔۔۔ ٹھہرو۔۔۔۔۔۔چلو ایسی جگہ چلیں جو بڑی وسیع ہو۔۔۔۔۔۔ لیکن جس کی وسعتیں اٹھا کر ہم جب چاہیں اپنے اندر چھپا سکیں۔

موتی: چلو!

سوشیلا: چلو۔۔۔۔۔۔ مجھے ایسی جگہ لے چلو جہاں میں ایک بار کھل کر ناچ سکوں۔۔۔۔۔۔جہاں میرے ٹخنے گھنگرؤں کی تمام جھنجھناہٹیں نچوڑ دیں۔۔۔۔۔۔ جہاں میں حرکت کی آخری حد کو پہنچ کر ساکت ہو جاؤں۔

موتی: جہاں زندگی کے آغاز اور انجام کا کچھ پتا ہی نہ چلے۔

سوشیلا: ہاں ایسی ہی جگہ ہو۔۔۔۔۔۔(وقفہ)موتی۔۔۔۔۔۔ یہ دنیا بڑی سُندر ہے۔

موتی: آج رات کے دو بجے بالکنی کے نیچے میں تمہارا انتظار کروں گا۔۔۔۔۔۔ آج ہی رات ہمیں یہاں سے بھاگ جانا چاہیئے۔۔۔۔۔۔

سوشیلا: دو بجے۔۔۔۔۔۔

(کلاک دو بجاتا ہے۔۔۔۔۔۔ٹن۔۔۔۔۔۔ٹن۔۔۔۔۔۔آخری ٹن کی گونج تھوڑی دیر تک سنائی دے)

موتی: (آواز دُور سے آئے۔۔۔۔۔۔سرگوشی کی صورت میں)سوشیلا۔۔۔۔۔۔سوشیلا!

(سوشیلا کے ٹہلنے کی آواز)

سوشیلا: آگیا۔۔۔۔۔۔آگیا۔۔۔اب میں کیا کروں۔۔۔۔۔۔(وقفہ۔۔۔۔۔۔سرگوشیوں میں)موتی۔۔۔۔۔۔موتی!

موتی: سوشیلا۔۔۔۔۔۔ہاں میں ہوں موتی۔۔۔۔۔۔ آؤ۔۔۔۔۔۔جلدی نیچے چلی آؤ۔سب سامان تیار ہے۔

سوشیلا: آہستہ بولو۔۔۔۔۔۔آہستہ بولو۔۔۔۔۔۔ دیکھو باہر کا دروازہ بند ہے۔ اب میں کیسے نیچے آؤں۔۔۔۔۔۔ بالکنی سے اتر آتی مگر میرے پاس کوئی رسی بھی تو نہیں۔۔۔۔۔۔

(دروازے پر دستک ہوتی ہے)۔۔۔۔۔۔یہ کون؟۔۔۔۔۔۔ تم پرے ہٹ جاؤ موتی۔۔۔۔۔۔

(وقفہ۔۔۔۔۔۔پھر دروازہ کھولنے کی آواز)

سوشیلا: (سخت گھبرا کر۔۔۔۔۔۔آپ۔۔۔۔۔۔کشور صاحب آپ؟

کشور: (ہنس کر)ارے۔۔۔۔۔۔ابھی تک تم سوئی نہیں۔۔۔۔۔۔میں سمجھا۔۔۔۔۔۔کل تمہاری سالگرہ جو ہے۔۔۔۔۔۔ اسی خوشی میں نیند تو نہیں آتی ہوگی۔۔۔۔۔۔نئے سال اور نئے قدم میں کوئی خاص فرق تو نہیں ہوتا۔۔۔۔۔۔

سوشیلا: میں۔۔۔۔۔۔میں۔۔۔۔۔۔ہاں سالگرہ۔۔۔۔۔۔بیٹھئے۔۔۔۔۔۔میں۔۔۔۔۔۔میں۔

کشور: تمہارے لیئے آج میں نے ایک تحفہ خریدا تھا۔۔۔۔۔۔یہ لو۔۔۔۔۔۔ ساڑھی ہے اُمید ہے تم پسند کرو گی۔۔۔۔۔۔ ٹھہرو۔میں تمہیں کھول کر دکھاتا ہوں۔۔۔۔۔۔ساڑھیاں کھولنے کا یہ طریقہ مجھے کبھی نہ آئے گا۔۔۔۔۔۔ دیکھو تو ر سّا بنا دیا ہے۔

سوشیلا: رسّا؟

کشور: صبح تمہیں ایسے کئی تحفے ملیں گے۔۔۔۔۔۔ میں چاہتا تھا کہ سالگرہ پر سب سے پہلا تحفہ میری تم میری طرف سے قبول کرو۔

سوشیلا: ش۔۔۔۔۔۔ش۔۔۔۔۔۔شکریہ۔

کشور: اچھا اب میں جاتا ہوں۔۔۔۔۔۔ تم سو جاؤ اور اچھے اچھے خواب دیکھو۔۔۔۔۔۔یہ ساڑھی سنبھال لو۔۔۔۔۔۔ مجھے اُمید ہے تم اسے پسند کرو گی(جمائی لیتا ہے) بھئی مجھے تو سخت نیند آرہی ہے۔۔۔۔۔۔ میں چلا۔

(وقفہ۔۔۔۔۔۔ پھر دروازہ بند کرنے کی آواز)

(کپڑوں کی تیز سرسراہٹ)

سوشیلا: (بھنچے ہوئے لہجے میں)۔۔۔۔۔۔موتی۔۔۔۔۔۔موتی۔

موتی: کیا ہے۔۔۔۔۔۔تم کہاں چلی گئی تھیں۔۔۔۔۔۔نیچے اُترنے کے لیئے کوئی سامان پیدا کیا؟

سوشیلا: نہیں تو۔۔۔۔۔۔موتی اب میں ایک منٹ یہاں نہیں ٹھہرنا چاہتی۔۔۔۔۔۔ٹھہرو ایک چیز مل گئی۔۔۔۔۔۔میرے پاس ساڑھی ہے۔۔۔۔۔۔ اسے جنگلے سے باندھ کر نیچے اُتر آؤں گی۔۔۔۔۔۔ تم یہاں ٹھہرو۔۔۔۔۔۔

(وقفہ)

سوشیلا: یہاں باندھ دیتی ہوں۔

موتی: مضبوطی سے۔۔۔۔۔۔ سنبھل کے ۔۔۔۔۔۔ سنبھل کے۔۔۔۔۔۔ ابھی نہیں۔۔۔۔۔۔ابھی نہیں۔۔۔۔۔۔بس اب ٹھیک ہے۔۔۔۔۔۔کود جاؤ۔

(کودنے کی آواز)

سوشیلا: (مرحلہ طے کرنے کے بعد)اُف۔۔۔۔۔۔اب چلو۔۔۔۔۔۔ تمہاری موٹر کہاں ہے(وقفہ۔۔۔۔۔۔پھر موٹر چلنے کی آواز)

(کشور ہنستا ہے)

کشور: چلی گئی۔۔۔۔۔۔ اور ساڑھی بھی کام آہی گئی۔۔۔۔۔۔ چلو بھئی اب سوتے ہیں۔سخت نیند آرہی ہے۔۔۔۔۔۔(جمائی لیتا ہے)

(ناچ کی گت شروع ہو۔۔۔۔۔۔پہلے بالکل دھیمی ہو پھر آہستہ آہستہ بہت تیز ہو جائے۔اس کے ساتھ ساتھ سوشیلا کے ناچنے کی آواز بھی آئے۔ پھر آہستہ آہستہ لے دھیمی ہو جائے اور موسیقی اور ناچ کی آواز عقب میں چلی جائے۔۔۔۔۔۔ ذیل کا مکالمہ اس پر سپرامپوز کیا جائے)

موتی: ایسا معلوم ہوتا ہے آسمان سے گھنگرؤں کی بارش ہورہی ہے۔۔۔۔۔۔ کتنے سہانے دن ہیں اور کیسی پیاری راتیں ہیں۔

سوشیلا: میں خوش ہوں۔۔۔۔۔۔ میں بہت خوش ہوں۔۔۔۔۔۔ ان کھلی کھلی فضاؤں میں ایسا معلوم ہوتا ہے میں پھیلتی جارہی ہوں۔۔۔۔۔۔موتی میں یہ چاند اُٹھا کر اپنے سر کے نیچے تکیہ بنا کر رکھ لُوں۔

موتی: میرے بازو پر سر رکھ کر سو جاؤ۔۔۔۔۔۔ یہ چاند سے زیادہ آرام دہ ہو گا۔

سوشیلا: میری نیندیں۔۔۔۔۔۔ کہاں گئیں میری نیندیں؟

موتی: سو جاؤ۔۔۔۔۔۔سو جاؤ۔۔۔۔۔۔

(دھیمے دھیمے سُروں میں ایک دُھن شروع ہو جس میں ذیل کا گیت موتی گائے)

گیت:

تاروں سے البیلی پریاں چھم چھم کرتی آئیں

میٹھی میٹھی لوری دے کر من تیرا بہلائیں

موندی پلکوں پر آکاش کی خوشبوئیں برسائیں

بیتی باتیں ہلکے پھلکے سپنے سے بن جائیں

نیندیں سندرتا کا گہنا

سورگ سے نیند نگر میں رہنا

کرنوں کی سیڑھی سے اتریں ٹم ٹم کرتے تارے

پو پھٹنے تک ہولے ہولے ناچیں ہر کے دوارے

من ساگر میں ڈبکی ماریں سپنے پیارے پیارے

چھٹ جائیں سب غم کے بادل کٹ جائیں دکھ سارے

سوشیلا اور موتی:

نیند سندرتا کا گہنا

سورگ ہے نیند نگر میں رہنا

سوشیلا: (ایک دم)نہیں۔۔۔۔۔۔نہیں۔۔۔۔۔۔میں نہیں سونا چاہتی۔۔۔۔۔۔ میں نہیں سو سکتی۔۔۔۔۔۔میں جاگتی رہوں گی۔

(ناچ کی گت شروع ہو۔۔۔۔۔۔رقص کا ایک تیز سا چکر شروع ہو۔۔۔۔۔۔چند لمحات کی تیز گردشوں کے بعد ایک دم آرکسٹرا بند ہو جائے اور ایسا معلوم ہو کہ بہت سے گھنگرو فرش پر بکھر گئے ہیں۔۔۔۔۔۔ اس کے بعد ایک دم خاموشی طاری ہو جائے)

موتی: (گھبرائے ہوئے انداز میں) گھر سے تار آیا ہے کہ جلدی پہنچو۔۔۔۔۔۔ مجھے ابھی ابھی جانا ہوگا۔۔۔۔۔۔تمہیں یہاں اکیلی چھوڑ کر میں جارہا ہوں۔۔۔۔۔۔ میں۔۔۔۔۔۔(غم افزا موسیقی کا ٹکڑا۔۔۔۔۔۔ذیل کا مکالمہ اس پر سپرامپوز کیا جائے)

سوشیلا: تشریف ر کھیئے۔۔۔۔۔۔میرا ہی نام سوشیلا ہے۔

چپلا: تار میں نے بھیجا تھا۔۔۔۔۔۔ اس لیئے کہ میں تم سے اکیلے میں بات کرنا چاہتی تھی۔۔۔۔۔۔(جذبات کی شدت کے ساتھ) تم خوبصورت ہو۔

سوشیلا: آپ کی نگاہیں جو خوبصورت ہیں۔۔۔۔۔۔ بیٹھ جائیے۔ آپ تھکی تھکی معلوم ہوتی ہیں۔

چپلا: میں اس گھر میں نہیں بیٹھوں گی جہاں دوسرے گھروں کو تباہ کرنے والی عورت رہتی ہے۔

سوشیلا: میں آپ کا مطلب نہیں سمجھی۔

چپلا: تو مجھے صاف لفظوں میں کہنا پڑے گا کہ میں اس آدمی کی منگیتر ہوں جس کو تم قریب قریب تباہ کر چکی ہو۔۔۔۔۔۔ میری جرأت کی شاید تم داد نہ دے سکو۔ میں رسم و رواج کے تمام بندھن توڑ کر یہاں تمہارے پاس پہنچی ہوں۔۔۔۔۔۔ مجھے میرا منگیتر واپس دے دو۔۔۔۔۔۔ مجھے تم سے نفرت ہے۔ اس لیئے کہ تم ڈسنے والی ناگن ہو۔ مگر میں۔۔۔۔۔۔میں ۔۔۔۔۔۔تم جانتی ہو تمہاری وجہ سے ایک صرف میں تباہی کے غار میں نہیں گروں گی بلکہ وہ بھی برباد ہو جائے گا۔۔۔۔۔۔ اس کا باپ اس کو عاق کرنے والا ہے۔

سوشیلا: اس میں میرا قصور؟۔۔۔۔۔۔ میں اس کے باپ سے جائیداد نہیں مانگتی۔۔۔۔۔۔ میں کسی سے کچھ بھی نہیں مانگتی۔۔۔۔۔۔ اس کے ملنے کے بعد میں اور کسی چیز کی خواہش نہیں کرسکتی ہوں۔۔۔۔۔۔

چپلا: تم بہت خود غرض ہو۔

سوشیلا: ہر آدمی خود غرض ہوتا ہے۔ کیا آپ نہیں ہیں۔۔۔۔۔۔ اچھا بھلا یہ تو بتائیے کیا آپ کو موتی سے محبت ہے؟

چپلا: (خاموش رہتی ہے)

سوشیلا: کیا آپ کو موتی سے محبت ہے؟

چپلا: یہ۔۔۔۔۔۔یہ کیسا بے ڈھب سوال ہے۔۔۔۔۔۔ میں اس سے محبت کروں گی۔۔۔۔۔۔ مجھے اس سے محبت کرنی پڑے گی اس لیئے کہ وہ میرا ہونے والا پتی ہے۔۔۔۔۔۔وہ مجھے عزیز نہ ہوتا تو میں یہاں تمہارے پاس کیوں آتی۔

سوشیلا: (ہنستی ہے) آپ کو ابھی اس سے محبت پیدا ہوگی۔ مگر میں تو اس سے محبت کررہی ہوں۔۔۔۔۔۔ کس کا حق اس پر زیادہ ہوا۔۔۔۔۔۔ آپ کا یا میرا؟

چپلا: مجھے زیادہ باتیں بنانا نہیں آتیں۔۔۔۔۔۔ میں نے سچی سچی بات تم سے کہہ دی ہے۔۔۔۔۔۔ یہ مجھے معلوم ہی تھا کہ تم میرے جذبات کی قدر نہ کرو گی۔۔۔۔۔۔ سچ ہے ایک ناچنے گانے والی عورت۔۔۔۔۔۔

سوشیلا: (بات کاٹ کر) یہ فرمائیے آپ چاہتی کیا ہیں؟

چپلا: (رونا شروع کردیتی ہے)۔۔۔۔۔۔ میں کچھ نہیں چاہتی۔۔۔۔۔۔ تم اپنی ہٹ سے باز نہ آؤ گی تو وہ تباہ ہو جائے گا۔۔۔۔۔۔ اور۔۔۔۔۔۔اور۔۔۔۔۔۔ میں برباد ہو جاؤں گی۔

سوشیلا: میرے متعلق بھی آپ نے کچھ سوچا!

چپلا: میں۔۔۔۔۔۔ میں تمہارے متعلق کیا سوچ سکتی ہوں۔۔۔۔۔۔تم مجھ سے بہتر اپنے متعلق سوچ سکتی ہو۔۔۔۔۔۔تم نے دنیا دیکھی ہے۔۔۔۔۔۔ میں نے تو آج پہلی مرتبہ گھر سے باہر قدم نکالا ہے (روتی ہے)

سوشیلا: روئیے نہیں۔۔۔۔۔۔ مجھے آپ سے ہمدردی ہے۔۔۔۔۔۔ جائیے میں نے آپ کا ہونے والا موتی آپ کو دے دیا۔۔۔۔۔۔(غمگین ہنسی کے ساتھ) میں اس کو آپ کی اور اس کی اپنی بہتری کے لیئے چھوڑتی ہوں۔ مگر میں اس کی محبت اپنے دل سے نہیں نکال سکوں گی۔۔۔۔۔۔کاش۔۔۔۔۔۔ میں آپ کے لیئے یہ بھی کرسکتی۔۔۔۔۔۔میری دُعا ہے کہ آپ اس سے محبت کرسکیں۔۔۔۔۔۔موتی تو محبت کرنے میں ماہر ہے۔۔۔۔۔۔

(جھانجھ کی آواز)

کشور: (جھنجھلا کر) یہ محبت محبت کی رٹ تم نے کیا لگا رکھی ے۔۔۔۔۔۔ میں تم سے ہزار مرتبہ کہہ چکا ہوں سوشیلا سے مجھے محبت نہیں ہے۔۔۔۔۔۔ نہیں ہے۔ نہیں ہے(وقفہ) مجھے اس کی غیر حاضری ضرور محسوس ہوتی ہے اس لیئے کہ میں انسان ہوں پتھر نہیں ہوں۔۔۔۔۔۔ اس کمرے میں جب اس کی بکھری ہوئی چیزیں دیکھتا ہوں تو مجھے اس کی یاد ضرور ستاتی ہے اس لیئے کہ دو ڈھائی برس تک میں اس دلچسپ عورت کو متواتر دیکھتا رہا ہوں۔۔۔۔۔۔ یہی وجہ ہے کہ آج میں نے اس کی تمام چیزیں آگ میں جھونک دینے کا ارادہ کرلیا ہے۔۔۔۔۔۔آہستہ آہستہ اس کی یاد ضرور محو ہو جائے گی۔

مدن: بھئی عجب انسان ہو۔۔۔۔۔۔تمہاری کوئی بات میری سمجھ میں نہیں آتی۔۔۔۔۔۔ محبت نہیں کرتے ہو اور کرتے بھی ہو۔۔۔۔۔۔ اب یہ تمہارا نیا فلسفہ سُن رہا ہوں۔ لگاؤ آگ ان چیزوں کو۔۔۔۔۔۔ چلو۔۔۔۔۔۔جھونکو ان کو انگیٹھی میں۔۔۔۔۔۔کچھ دیر یہ بھی تماشا رہے۔۔۔۔۔۔

کشور: لو(چیزیں آگ میں پھینکنے کی آواز)۔۔۔۔۔۔یہ لو اور(آواز)۔

مدن: اور یہ جناب نے مداریوں کی طرح سوشیلا کا ریشمی رومال اپنے کوٹ کی آستین میں کیوں چھپا لیا ہے۔۔۔۔۔۔؟

کشور: (لاجواب ہو کر)کون۔۔۔۔۔۔کون کہتا ہے۔۔۔۔۔۔ رومال۔۔۔۔۔۔آستین۔۔۔۔۔۔تم۔۔۔۔۔۔تم جھوٹ کہتے ہو۔

مدن: (ہنستا ہے) میں جھوٹ کہہ سکتا ہوں مگر تمہاری گھبراہٹ جھوٹ نہیں بولتی۔

کشور: میں نے۔۔۔۔۔۔ میں نے اگر اس کا رومال اپنی آستین میں رکھ لیا ہے تو کیا بُرا کیا ہے۔۔۔۔۔۔ مجھے کیا اس کے ایک چھوٹے سے رومال پر بھی حق نہیں۔۔۔۔۔۔

یہ رومال میرا اپنا ہی تو ہے۔۔۔۔۔۔(وقفہ۔۔۔۔۔۔پھر دروازہ کھلنے کی آواز)

کشور: (ایک دم حیرت زدہ ہو کر)۔۔۔۔۔۔سوشیلا۔۔۔۔۔۔تم آگئیں۔۔۔۔۔۔

سوشیلا: (افسردگی آمیز متانت سے)ہاں آگئی۔۔۔۔۔۔بے کھٹکے اندر چلی آئی۔۔۔۔۔۔اس لیئے کہ آپ مجھ سے محبت نہیں کرتے۔ صرف پسند کرتے ہیں۔۔۔۔۔۔

کشور: (پھر پہلی سی شان کے ساتھ) چھوڑو ان باتوں کو۔۔۔۔۔۔ مجھے معلوم تھا کہ تم ضرور واپس آؤ گی۔۔۔۔۔۔یہ دنیا بہت چھوٹی ہے سوشیلا۔۔۔۔۔۔مدن دیکھا میں نے تم سے کیا کہا تھا۔۔۔۔۔۔ سوشیلا آگئی۔۔۔۔۔۔سوشیلا تم کدھر دیکھ رہی ہو تمہاری یہ چیزیں پرانی ہوگئی تھیں۔۔۔۔۔۔ مدن تم بیوقوفوں کی طرح میری طرف کیا دیکھ رہے ہو۔۔۔۔۔۔(ناچ کی گت شر و ع ہو)۔۔۔ سوشیلا اب پھر وہی دلچسپیاں رہیں گی۔

(رقص کا ٹکڑا۔۔۔۔۔۔ہجوم اور تالیوں کا شور۔۔۔۔۔۔چند لمحات کے بعد یہ ختم ہو جائے)

سوشیلا: فرمائیے۔۔۔۔۔۔ مجھ سے ملنے کی آپ نے کیوں تکلیف کی؟

موتی: (غصّہ دبا کر) جیسے تم مجھے جانتی ہی نہیں۔۔۔۔۔۔ میں تمہارے لیئے بالکل اجنبی ہوں۔۔۔۔۔۔دیکھو سوشیلا۔۔۔۔۔۔ میں زیادہ گفتگو نہیں کرنا چاہتا۔۔۔۔۔۔ میں تم سے صرف ایک بات پوچھنے آیا ہوں۔

سوشیلا: پوچھئے!

موتی: تم مجھے چھوڑ کر کیوں چلی آئیں۔۔۔۔۔۔تم نے میر ی واپسی کا انتظار کیوں نہ کیا؟

سوشیلا: (روحانی تکلیف محسوس کرتے ہوئے) اس لیئے کہ کشور تمہارے مقابلے میں کہیں دولت مند ہے۔۔۔۔۔۔ تمہارے پاس کچھ بھی نہیں تھا۔۔۔۔۔۔ تم اپنے باپ کے رحم و کرم پر تھے۔

موتی: (حیرت زدہ ہو کر) تم۔۔۔۔۔۔تم۔۔۔۔۔۔تم میری ہتک کررہی ہو۔۔۔۔۔۔میں۔۔۔۔۔۔میں۔۔۔۔۔۔

سوشیلا: اب آپ تشریف لے جائیے۔۔۔۔۔۔میرے اور ملاقاتی بھی ہیں۔

(دروازہ کھلنے کی آواز)

کشور: سوشیلا چہرے سے پینٹ وینٹ اتار لیا۔۔۔۔۔۔یہ۔۔۔۔۔۔یہ۔۔۔۔۔۔

سوشیلا: یہ مسٹر موتی لال ہیں۔۔۔۔۔۔ میں آپ کا تعارف کرانا بھول گئی۔۔۔۔۔۔ مسٹر موتی، کشور صاحب سے ملیئے۔۔۔۔۔۔کشور صاحب یہ مسٹر موتی ہیں۔آپ نے اخباروں میں ان کے پتا کی د یہانت کی خبر پڑھی ہوگی۔

کشور: دل کی حرکت بند ہوگئی تھی شاید۔

موتی: (جھنجھلا کر)۔۔۔۔۔۔میرا دل کافی مضبوط ہے کشور صاحب آپ مطمئن رہیں۔۔۔۔۔۔سوشیلا۔۔۔۔۔۔ یہی وہ صاحب ہیں جن کے پاس دولت کے انبار موجود ہیں۔۔۔۔۔۔آپ اچھے خاصے کارٹون معلوم ہوتے ہیں(وقفہ۔۔۔۔۔۔ پھر زور سے دروازہ بند کرنے کی آواز)

کشور: (زور سے ہنستا ہے)۔۔۔۔۔۔آدمی دلچسپ ہے۔

سوشیلا: (افسردہ ہنسی)ہاں۔۔۔۔۔۔ کچھ دلچسپ ہی ہے۔۔۔۔۔۔ چلیئے۔۔۔۔۔۔میں بہت تھک گئی ہوں۔

(دروازہ کھلنے کی آواز۔۔۔۔۔۔وقفہ۔۔۔۔۔۔پھر موٹر اسٹارٹ ہوتی ہے۔۔۔۔۔۔چلتی ہے۔۔۔۔۔۔فیڈ آوٹ)

موتی: میرے پاس کافی روپیہ ہے۔۔۔۔۔۔ تم بے فکرر ہو۔۔۔۔۔۔میں یہ چاہتا ہوں کہ اس کشور کی ساری بزنس تباہ ہو جائے۔۔۔۔۔۔جگہ جگہ اس کے مقابلے میں دفتر قائم کیئے جائیں۔کوشش کی جائے کہ مارکیٹ پر ہمارا قبضہ ہو جائے۔۔۔۔۔۔ سمجھے۔۔۔۔۔۔اس میں کوئی شک نہیں کہ یہ جوا ہے۔ لیکن میں اسے کھیل جانا چاہتا ہوں۔۔۔۔۔۔یا میں تباہ ہو جاؤں گا یا اس کو تباہ کردوں گا۔

ایک آدمی: میں سمجھ گیا۔۔۔۔۔۔ آپ کے حکم کی تعمیل بہت جلد ہو جائے گی۔ میں نے اس کام کے لیئے بہت سے ماہر اکٹھے کرلیئے ہیں۔

موتی: یہ سب اچانک حملے کی صورت میں ہو۔۔۔۔۔۔اس طرح کہ وہ بوکھلا جائے۔۔۔۔۔۔سمجھے۔۔۔۔۔۔ بس چند دنوں ہی میں اس کھیل کا خاتمہ ہو جانا چا ہیئے۔

(ہجوم کا شور جیسا کہ عام طور پر سٹہ کھیلنے والی جگہوں میں ہوتا ہے۔۔۔۔۔۔ اس شور پر ذیل کے ٹکڑے سپر امپوز کء کیئے جائیں۔)

الف: بازار بڑا تیز ہورہا ہے۔

ب: یہ کون ہے جو دھڑ دھڑ شیئر خرید رہا ہے۔

ج: اگر کچھ روز تیزی کا یہی حال رہا تو اندھیر مچ جائے گا۔

د: یہ ہے کون جس نے مارکیٹ میں ہلڑ مچا دیا ہے۔

موتی: (قہقہہ بلند کرتا ہے) خریدے جاؤ۔۔۔۔۔۔ خریدے جاؤ۔

کشور: خریدے جاؤ۔۔۔۔۔۔خریدے جاؤ۔۔۔۔۔۔لیکن پتا چلا ؤ کہ ہمارے مقابلے میں کون آدمی ہے۔

(وقفہ۔۔۔۔۔۔شور برابر جاری ہے)

الف: اب اس نے شیئر بیچنے شروع کردیئے ہیں۔

ب: بہت آہستہ آہستہ بیچ رہا ہے۔

(شور بند ہو جائے۔۔۔۔۔۔ اس کے بعد ٹیلی فون کی گھنٹی کی آواز)

سوشیلا: آپ بیٹھئے۔۔۔۔۔۔ میں دیکھتی ہوں کون ہے(ٹیلی فون کی گھنٹی بجتی رہے)

(وقفہ۔۔۔۔۔۔ٹیلی فون کا چونگا اٹھانے کی آواز) ہیلو۔۔۔۔۔۔ ہیلو۔۔۔۔۔۔

ٹیلی فون کرنے والا:(آواز ٹیلی فون میں سے آتی معلوم ہو)کشور صاحب ہیں۔

سوشیلا: فرمائیے۔

ٹیلی فون کرنے والا: (گھبرائی ہوئی آواز میں)دیکھئے۔۔۔۔۔۔ کشور صاحب اگر نہیں ہیں تو میرا یہ پیغام فوراً ان تک پہنچا دیجئے۔۔۔۔۔۔ اچھی طرح نوٹ کرلیجئے گا۔۔۔۔۔۔ہمیں معلوم ہوگیا ہے کہ ان کے مقابلے میں آنے والا موتی ہے۔۔۔۔۔۔ موتی لال سیٹھ گوبند پرشاد جوہری کا لڑکا۔۔۔۔۔۔ اس نے اپنے نئے شیئر آہستہ آہستہ بیچنے شروع کردیئے ہیں۔۔۔۔۔۔کشور صاحب اگر چاہیں تو یہ موقع ہے کہ اسے چٹکیوں میں برباد کیا جاسکتا ہے۔۔۔۔۔۔ لیکن اگر ذرا سی غفلت ہوگئی تو یاد رہے کشورصاحب کو بہت بھاری نقصان اُٹھانا پڑے گا۔۔۔۔۔۔ میں اِن کے حکم کا منتظر رہوں گا۔۔۔۔۔۔ آپ جلدی ان کو میرا یہ پیغام سُنا دیجئے۔

سوشیلا: بہت بہتر۔۔۔۔۔۔(ٹیلی فون کا چونگا رکھنے کی آواز)

(وقفہ)

کشور : کون تھا؟

سوشیلا: میری ایک سہیلی تھی۔۔۔۔۔۔ چا�أ کی دعوت دے رہی تھی۔۔۔۔۔۔ میں نے منظور نہیں کی اس لیئے کہ آج میرا باہر گھومنے کوجی چاہتا ہے۔۔۔۔۔۔ چلیئے ذرا باغ کی سیر کر آئیں۔

کشور: چلو۔۔۔۔۔۔ مگر جلدی واپس آجائیں گے اس لیئیکہ مجھے بہت سے کام کرنے ہیں۔

(وقفہ۔۔۔۔۔۔موٹر کی آواز۔۔۔۔۔۔ فیڈ آوٹ)

(ٹیلی فون کی گھنٹیوں کا شور۔۔۔۔۔۔ بیشمار گھنٹیاں بج رہی ہوں۔۔۔۔۔۔ ان آوازوں کے بیچ بیچ میں’’ ہیلو۔۔۔۔۔۔ ہیلو۔۔۔۔۔۔ ہیلو کشور صاحب۔۔۔۔۔۔ ہیلو۔۔۔۔۔۔ ہیلو۔۔۔۔۔۔کی آواز آتی رہے)

(موٹر کے چلنے کی آواز۔۔۔۔۔۔ذیل کا مکالمہ اس پر سپرامپوز کیا جائے)

سوشیلا: جی چاہتا ہے آج یوں ہی موٹر چلتی رہے۔۔۔۔۔۔ درخت پیچھے بھاگے چلے جارہے ہیں جیسے بیتی ہوئی گھڑیاں۔۔۔۔۔۔ زمانہ اس موٹر سے زیادہ تیز چلنے والا ہے۔

کشور: آج تم فلسفہ چھانٹ رہی ہو۔

سوشیلا: انسان جس کا دنیا میں کوئی مقصد نہ رہے فلسفی ہو جاتا ہے۔

کشور: (ہنس کر) یہ آج تم کیا بہکی بہکی باتیں کررہی ہو۔

سوشیلا: انسان جس نے اپنے خیال کے مطابق کوئی اچھا کام کیا ہو اکثر بہک جایا کرتا ہے۔

کشور: تم نے کوئی اچھا کام کردیا!

سوشیلا: جی ہاں۔۔۔۔۔۔ بڑا اچھا کام کیا ہے۔

کشور: کیا؟

سوشیلا: ٹیلی فون آیا تھا کہ دولت کے کھیل کے میدان میں آپ کا مقابلہ موتی سے ہے۔۔۔۔۔۔اس اناڑی سے۔۔۔۔۔۔ میں نے اس پر ترس کھا کر آپ کو وہ بات نہ بتائی جس کے باعث اب آپ کو لاکھوں کا نقصان اُٹھانا پڑے گا۔

کشور: (حیرت زدہ ہو کر) کیا کہہ رہی ہو تم؟۔۔۔۔۔۔وہ۔۔۔۔۔۔وہ۔۔۔۔۔۔وہ ٹیلیفون میرے نام آیا تھا۔۔۔۔۔۔اور وہ آدمی موتی تھا۔

سوشیلا: جی ہاں۔موتی۔۔۔۔۔۔یاد ہے ایک بار آپ نے کہا تھا۔۔۔۔۔۔ عورت اور تپائی میں کوئی فرق نہیں ہوتا۔تپائی پر سے اگر کپڑا سرک جائے تو بڑے بڑے قیمتی پھولدان گر کر چکنا چور ہو جایا کرتے ہیں۔

کشور: تم مجھ سے پہیلیاں نہ بھجواؤ۔

سوشیلا: (افسردہ ہنسی کے ساتھ)عورت آپ کی نگاہوں میں تپائی ہوگی۔ مگر یقین جانیئے وہ قدرت کی سب سے بڑی پہیلی ہے۔۔۔۔۔۔ میں نے اس کو بچا لیا۔ اور آپ کو تباہ کردیا۔۔۔۔۔۔بھلا پوچھئے تو کیوں۔

کشور: کیوں؟

سوشیلا: اس لیئے کہ مجھے اس سے محبت تھی۔۔۔۔۔۔اور میں۔۔۔۔۔۔اور میں۔۔۔۔۔۔میں نہیں۔۔۔۔۔۔ آپ۔۔۔۔۔۔آپ مجھے صرف پسند کرتے تھے۔۔۔۔۔۔عورتیں عقلمندی کی حد تک احمق ہوتی ہیں۔۔۔۔۔۔ آپ کا کیاخیال ہے۔

کشور: باریک ریشمی ساڑھیاں اور عورتیں ہمیشہ میری عقل سے بالاتر رہی ہیں تمہیں اس سے محبت تھی تو پھر اسے چھوڑ کر کیوں آئیں۔

سوشیلا: عورتوں کو یہ بھی شوق ہوتا ہے کہ وہ اپنی ساڑھیاں دوسروں کو تحفے کے طور پر دے دیں۔۔۔۔۔۔ دوسروں کے جسم پر اپنے دیئے ہوئے کپڑے دیکھ کر بھی وہ لذّت حاصل کرلیتی ہیں۔۔۔۔۔۔ میں نے اپنی محبت اٹھا کر کسی اور کو پہنا دی اور خوش ہوگئی۔۔۔۔۔۔ میرا خیال ہے میرا تحفہ لے کر اس کو محبت کرنے کا سلیقہ آگیا ہوگا۔

کشور: ایک تحفہ تم نے مجھے بھی دیا ہے۔

سوشیلا: میں بھول گئی ہوں۔۔۔۔۔۔کون سا تحفہ؟

کشور: (ہنس کر) کتنی زود فراموش ہو۔۔۔۔۔۔اپنے اس اناڑی دوست کو اتنی جلدی بھول گئیں۔ اس پر تم نے جو احسان کیا ہے میں نے تحفے کے طور پر قبول کرلیا ہے۔۔۔۔۔۔رسید چاہیئے۔

سوشیلا: میں کچھ اور ہی سوچ رہی ہوں۔۔۔۔۔۔ ایسا معلوم ہوتا ہے میں نے پھر نئے سرے سے اپنا سفر شروع کیا ہے۔۔۔۔۔۔ وہی گاڑی ہے۔۔۔۔۔۔ وہی پلیٹ فارم ہے۔۔۔۔۔۔

(موٹر کی آواز۔ریل گاڑی کی آواز میں تحلیل ہو جائے۔۔۔۔۔۔انجن کی شائیں شائیں۔۔۔۔۔۔ سیٹی کی آواز۔۔۔۔۔۔ انجن کی چیخ۔۔۔۔۔۔پھر گاڑی چلنے کی آواز۔۔۔۔۔۔آہستہ آہستہ یہ آواز دھیمی ہو جائے)

کشور: میں سمجھتا ہوں آپ کسی کا انتظار کررہی ہیں۔

سوشیلا: (چونک کر) موہن تم(پھر فوراً ہی ناامید ہو کر)نہیں موہن کہاں!

کشور: میں سمجھتا ہوں آپ کو کسی کا انتظار ہے۔

سوشیلا: (گھٹی گھٹی آواز میں)۔۔۔۔۔۔جی نہیں۔۔۔۔۔۔میں اکیلی ہوں۔

کشور: (مسکرا کر) آپ اکیلی نہیں ہیں۔

(موٹر کی آواز پھر عود کر آئے۔۔۔۔۔۔ چند لمحات کے بعد یہ آواز آہستہ آہستہ دھیمی کردی جائے)

(فیڈ آؤٹ)