ساڑھی

افراد

کوی : (مالتی کا چاہنے والا)

مالتی : (جوان لڑکی)

مالتی کی ماں :

سیٹھ : (مالتی کا دولت مند عاشق)

کوی کا دوست:

اور تین چار فالتو آدمی :

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

(مشین چلانے کی آواز۔۔۔۔۔۔کبھی ہولے ہولے کبھی تیز تیز)

مالتی: (مشین چلاتی جاتی ہے اور ساتھ ساتھ گاتی بھی جاتی ہے)۔۔۔۔۔۔میں بن کی چڑیا بن کے بن بن بولوں رے۔۔۔۔۔۔یہ قینچی کدھر گئی۔۔۔۔۔۔ماں قینچی کہاں ہے۔ ایک منٹ بھی نہیں ہوا میں نے یہاں اپنے پاس رکھی تھی۔۔۔۔۔۔مل گئی(قینچی کی آواز۔۔۔۔۔۔پھر مشین چلانے کی آواز۔۔۔۔۔۔ بولوں رے۔۔۔۔۔۔ میں بن کی چڑیا بن کے بن بن بولوں رے۔۔۔۔۔۔بولوں رے۔۔۔۔۔۔ ماں کاج بنا لیئے؟

ماں: یہ تو بار بار پوچھتی ہے۔ بنا تو رہی ہوں۔۔۔۔۔۔میرے ہاتھ مشین تو نہیں۔

مالتی: ۔۔۔۔۔۔میں بن کی چڑیا بن کے بن بن بولوں رے۔۔۔۔۔۔ بولوں رے۔۔۔۔۔۔ بس اب سوئی نہیں ملے گی۔۔۔۔۔۔ یہ میری سوئی کدھر گئی۔۔۔۔۔۔ ہائے رام کیا مصیبت ہے۔ ایک چیز ملتی ہے۔ دوسری گم ہو جاتی ہے۔۔۔۔۔۔ سوئی مل جائے گی تو انگشتانہ غائب ہو جائے گا۔ انگشتانہ مل جائے گا تو نگوڑی قینچی کہیں غائب غلّہ ہو جائے گی۔۔۔۔۔۔ قینچی۔۔۔۔۔۔ اور مجھے یہ سات قمیصیں ٹھیک بارہ بجے سیٹھ صاحب کے گھر پہنچا دینی ہیں۔۔۔۔۔۔ ماں کاج بنا لیئے؟

ماں: آگ لگے کاجوں کو۔۔۔۔۔۔میرے تو اُنگلیوں کے پوٹے چھلنی ہوگئے۔۔۔۔۔۔ چولھے میں جائے ایسا افراتفری کا کام۔

مالتی: دیکھنا کوئی فالتو سوئی پٹاری میں تو نہیں۔۔۔۔۔۔ ٹھہرو مل گئی۔۔۔۔۔۔یہ نگوڑی سوئیاں کہاں کہاں چمٹ جاتی ہیں۔۔۔۔۔۔(مشین چلانے کی آواز)۔۔۔۔۔۔مورے آنگنا میں آئیں آلی۔۔۔۔۔۔ میں چال چلوں متوالی۔۔۔۔۔۔ میں چال چلوں متوالی۔

ماں: مالتی

مالتی: ۔۔۔۔۔۔میں چال چلوں متوالی۔۔۔۔۔۔ کیا ہے ماں۔

ماں: میں کہتی ہوں یہ گانا بند کر۔

مالتی: کیوں؟

ماں: بس مجھے اچھا نہیں لگتا۔

مالتی: (ہنستی ہے)۔۔۔۔۔۔ پریہ گانا میں تھوڑی گاتی ہوں۔

ماں: تو اورکون گاتا ہے؟

مالتی: کوئی ایکٹرس گاتی ہوگی۔۔۔۔۔۔مورے آنگنا میں آئی آلی میں چال چلوں متوالی۔۔۔۔۔۔(مشین کی تیز گڑگڑاہٹ)۔۔۔۔۔۔ ماں میں ایکٹرس بن جاؤں۔۔۔۔۔۔

ماں: کیوں؟

مالتی: سُنتی ہوں ایکٹرسوں کے کپڑے درزی سیتے ہیں۔۔۔۔۔۔ ان کو مشین چلانا نہیں پڑتی۔

ماں: تو دیوانی ہوگئی ہے۔

مالتی: ماں؟

ماں: کیا ہے!

مالتی: ۔۔۔۔۔۔کچھ نہیں۔۔۔۔۔۔کاج بنا لیئے۔

ماں: یہ تو بات کرتے کرتے رک کیوں جایا کرتی ہے۔۔۔۔۔۔جانتی ہے مجھے اس سے کتنی الجھن ہوتی ہے۔۔۔۔۔۔ میں کہتی ہوں تیرے من میں ضرور کچھ ہے جو تو بتانا نہیں چاہتی۔ کئی دنوں سے تو کھوئی کھوئی سی رہتی ہے۔ مجھے بتا تو سہی تو کس سوچ میں پڑی رہتی ہے۔۔۔۔۔۔ تیرا اب سلائی میں بھی جی نہیں لگتا۔ یہ سات قمیصیں تو نے مر پیٹ کرچار دن میں تیار کی ہیں۔۔۔۔۔۔ ابھی دو کی پیٹیاں باقی ہیں۔ کیا ہوگیاہے تجھے؟

مالتی: کیا ہوگیا ہے مجھے۔۔۔۔۔۔اچھی بھلی تو ہوں(مشین زیادہ تیز چلاتی ہے)۔۔۔۔۔۔ اچھی بھلی تو ہوں(ہلکی ہلکی سُبکیوں کی آواز)۔۔۔۔۔۔اچھی بھلی تو ہوں(سُبکیوں کی آواز۔۔۔۔۔۔مشین کی رفتار زیادہ تیز ہو جاتی ہے)۔۔۔۔۔۔کیا ہوا ہے مجھے۔۔۔۔۔۔ تم تو مجھے ناحق کوستی رہتی ہو(سبکیوں کی آواز بُلند ہو جاتی ہے)۔

ماں: تو نے اب رونا کیوں شروع کردیا ہے؟

مالتی: (رونی آواز میں)۔۔۔۔۔۔ میں کب روتی ہوں۔۔۔۔۔۔ میں رو کیسے سکتی ہوں۔ اتنی لوٹھاسی ہوگئی ہوں۔ کیا مجھے روتے شرم نہ آئے گی(روتی جاتی ہے) ۔۔۔۔۔۔اور پھر کوئی بات بھی تو ہو۔۔۔۔۔۔ ایسے خالی خولی کیا روؤں۔۔۔۔۔۔

ماں: دیکھ قمیص کا کپڑا داغدار ہو جائے گا۔۔۔۔۔۔تیرے آنسو گر رہے ہیں۔

مالتی: (مشین کی رفتار تیز کردیتی ہے۔۔۔۔۔۔ماں۔کاج بنا لیئے؟

ماں: بنا لیئے۔

مالتی: ۔۔۔۔۔۔دونوں پیٹیاں بھی تیار ہوگئیں؟

(مشین کی آواز چند لمحات تک جاری رہے پھر یہ آواز آہستہ آہستہ موٹر کے اسٹارٹ ہونے کی پھڑپھڑاہٹ میں تبدیل ہو جائے)

سیٹھ: آؤ مالتی۔موٹرمیں بیٹھ جاؤ۔

مالتی: نہیں سیٹھ صاحب۔۔۔۔۔۔میں پیدل چلی جاؤں گی۔ میرا گھر یہاں سے دُور نہیں۔۔۔۔۔۔قمیص آپ کو پسند آگئی ہے نا۔

(موٹر کی پھڑپھڑاہٹ بند ہو جاتی ہے۔۔۔۔۔۔موٹر کا دروازہ کھلتا ہے)

سیٹھ: مالتی۔۔۔۔۔۔کیا تم نے کبھی اس بات پر غور نہیں کیا کہ تمہارے ہاتھ لوہے کی مشین چلانے کے لیئے نہیں بنے۔۔۔۔۔۔ تم ہر روز دوسروں کے لیئے کپڑے تیارکرتی ہو لیکن تمہارے بدن پر تو وہی کپڑے ہیں جو پچھلی سردیوں میں تم نے پہنے تھے۔۔۔۔۔۔یہ زندگی نہیں۔۔۔۔۔۔میں شاعر ہوتا تو تمہیں سمجھاتا کہ زندگی کیا ہے اور تم جیسی حسین لڑکیوں کی زندگی کیسے بسر ہونی چاہیئے۔ لیکن میں اتنا ضرور جانتا ہوں کہ تم اپنے آپ پر ظلم کررہی ہو۔۔۔۔۔۔ تم اپنی جوانی کی تمام خوبصورتیاں فنا کررہی ہو۔۔۔۔۔۔ میں پوچھتا ہوں۔ آخرتم اتنی حسین کیوں ہو۔۔۔۔۔۔ کیا اس لیئیکہ قینچی ہاتھ میں لے کرکپڑے کاٹتی رہو۔ مشین چلاتی رہو۔۔۔۔۔۔ دراصل۔۔۔۔۔۔دراصل تم نے آج تک کبھی اس بات پر غور ہی نہیں کیا تم کس قدر خوش رہ سکتی ہو۔۔۔۔۔۔موٹر۔ باغوں کی سیر۔اچھے اچھے کپڑے۔۔۔۔۔۔ ریشمی ساڑھیاں۔۔۔۔۔۔ ہنسی۔ قہقہے۔۔۔۔۔۔ کیا یہ چیزیں تمہاری نہیں ہوسکتیں۔۔۔۔۔۔کیا تمہارا ان پر کوئی حق نہیں۔

مالتی: (پھولے ہوئے سانس کے ساتھ)۔۔۔سیٹھ صاحب۔۔۔

سیٹھ: ان میلے کچیلے کپڑوں کے بدلے زرق برق ساڑھیاں۔۔۔۔۔۔خدمت کے لیئے نوکر۔۔۔۔۔۔ آج تم دوسروں کے لیئے کام کرتی ہو۔ کل دوسرے تمہارے لیئے کام کریں گے۔۔۔۔۔۔ یہ کوئی سپنا نہیں۔۔۔۔۔۔ ایک صرف تمہاری ہاں پرسب کچھ ہو جائے گا۔

مالتی: میں۔۔۔۔۔۔میں۔۔۔۔۔۔

سیٹھ: بولو۔۔۔۔۔۔بولو۔۔۔۔۔۔ ایک صرف تمہاری ہاں پر سب کچھ ہو جائے گا۔

مالتی: (موسیقی کا ایک ٹکڑا شروع ہو۔ ایسا جس میںُ سر الجھے ہوئے سے ہوں۔)

نہیں۔۔۔۔۔۔نہیں(موسیقی بند ہو جائے۔ مالتی زور سے کہے)۔۔۔نہیں۔۔۔ابھی نہیں(موسیقی کےُ سر مدھم ہو جائیں۔۔۔۔۔۔ قدموں کی چاپ ان سروں پر سپر امپوز کی جائے۔۔۔۔۔۔چند لمحات کے بعد یہ سرپھر بلند ہو جائیں۔ ان میں موٹر کی پوں پوں بھی گاہے گاہے سنائی دے۔۔۔۔۔۔روپوں کی کھنکھناہٹ بھی آئے۔۔۔۔۔۔پھر سیٹھ کے یہ الفاظ دہرائے جائیں۔’’۔۔۔۔۔۔ موٹر۔باغوں کی سیر۔۔۔۔۔۔اچھے اچھے کپڑے۔ریشمی ساڑھیاں۔۔۔۔۔۔ ہنسی۔ قہقہے۔۔۔۔۔۔کیا یہ چیزیں تمہاری نہیں ہوسکتیں۔۔۔۔۔۔کیا تمہارا ان پر کوئی حق نہیں‘‘۔۔۔۔۔۔ ایک دم موسیقی کا یہ ٹکڑا ختم ہو جائے۔صرف ایک تار تھوڑی دیر کے لیئے لرزتا رہے۔۔۔۔۔۔پھر ہولے ہولے ایک مدھم سی راگنی بُلند ہو۔۔۔۔۔۔ ان سروں کے بیچ بیچ میں مالتی کہے۔’’میں چلتے چلتے ایک دوراہے پر آگئی ہوں۔۔۔۔۔۔ایک طرف دولت ہے۔۔۔۔۔۔دوسری طرف محبت۔۔۔۔۔۔ ایک طرف دولت ہے دوسری طرف محبت‘‘۔۔۔۔۔۔ موسیقی کا یہ ٹکڑا ایک گیت کی شکل اختیار کرلے ذیل کا گیت اسی دھن میں گوایا جائے)

گیت:

یہ کون آیا یہ کون آیا

یہ میری دنیا پرچھانے

یہ کچھ کھونے یا کچھ پانے

یہ بل کھاتا یہ شرماتا

یہ کون آیا یہ کون آیا

آنکھوں میں شرارت اور شوخی

شوخی میں ہے برق کی طراری

جو دیکھ کے مجھ کو اٹھلایا

یہ کون آیا یہ کون آیا

کیا یہ شہزادی ہے تاروں کی

یا آس ہے درد کے ماروں کی

کیوں ذرہ ذرہ مسکایا

یہ کون آیا یہ کون آیا

مالتی: (ہولے سے)۔۔۔۔۔۔ میں ہوں مالتی۔

کوی: (اسی دھن میں گاتا ہے)

یہ لوری ہے کیا راتوں کی

یا ٹھنڈی ہوا برساتوں کی

یہ خود ہے کوئی یا ہے سایہ

یہ کون آیا یہ کون آیا

کوی: (گانا ختم کرکے ہنستا ہے)۔۔۔۔۔۔اوہ تُم ہو۔۔۔۔۔۔مالتی۔۔۔۔۔۔میری اپنی مالتی۔۔۔۔۔۔(شاعرانہ انداز میں)اوہ مالتی۔ مجھے تم سے کتنی محبت ہے۔

مالتی: (کھوئے ہوئے انداز میں)۔۔۔۔۔۔کتنی!

کوی: گزری ہوئی کل سے زیادہ۔۔۔۔۔۔اور۔۔۔۔۔۔آنے والی کل سے کم

مالتی: تم مجھ سے محبت کیوں کرتے ہو؟

کوی: یہ تم نے کیسا عجیب سوال کیا۔۔۔۔۔۔میں کیوں جیتا ہوں۔۔۔۔۔۔ یہ ستارے کیوں چمکتے ہیں۔۔۔۔۔۔ یہ اندھیرے اور اجالے کا الٹ پھیر کیوں ہے۔۔۔۔۔۔یہ پرندے کیوں چہچہاتے ہیں۔۔۔۔۔۔ چاند کیوں چمکتا ہے۔۔۔۔۔۔ تم کیوں خوبصور ت ہو۔ تمہیں دیکھ کر میرا دل کیوں دھڑکتا ہے۔۔۔۔۔۔ تمام کائنات کا سمٹ کر ایک ہستی میں سما جانا اور اس ہستی کا پھیل کر والہانہ وسعت اختیارکرلینا۔۔۔۔۔۔ یہ ہے محبت۔۔۔۔۔۔محبت۔۔۔۔۔۔ محبت آتما کا گہنا ہے۔

مالتی: کیا میں خوبصورت ہوں کوی!

کوی: تم خوبصورتی کا سرچشمہ ہو۔۔۔۔۔۔ تم سے کئی خوبصورتیاں پیدا ہوتی ہیں۔۔۔۔۔۔ایک خوبصورتی تووہ ہے جو تم نے میرے دل و دماغ میں پیدا کی ہے۔۔۔۔۔۔ میری کویتا صرف اسی لیئے خوبصورت ہے کہ اس پر تمہارا سایہ ہے۔۔۔۔۔۔ تم نہ ہوتیں تو کچھ بھی نہ ہوتا۔

مالتی: میں توکچھ بھی نہیں ہوں۔۔۔۔۔۔ بھکارن کے سوا اور کیا ہوسکتی ہوں۔

کوی: (ہنستا ہے)۔۔۔تم شہزادی ہو مالتی۔۔۔۔۔۔ شہزادی۔

مالتی: شہزادی۔

کوی: ہاں شہزادی۔۔۔۔۔۔میرے سپنوں کی شہزادی۔۔۔۔۔۔ میرے خیالوں کی ملکہ۔

مالتی: سپنوں کی شہزادی۔۔۔۔۔۔خیالوں کی ملکہ۔۔۔۔۔۔سپنے ۔۔۔۔۔۔خیال

(وقفہ)

کوی: کس سوچ میں پڑ گئیں؟

مالتی: میری ایک بات مانو گے۔

کوی: ایک۔۔۔۔۔۔صرف ایک ۔۔۔۔۔۔میں تمہاری ہزار۔۔۔۔۔۔تم مجھ سے کہوتو میں آسمان کے تمام تارے نوچ کر تمہاری اس میلی ساڑھی میں ٹانک دوں۔۔۔۔۔۔ چاند صرف ایک ہے۔ دو ہوتے تو میں انہیں اُتار کرتمہارے کانوں میں آویزے بنا کر لٹکا دیتا۔۔۔۔۔۔ تم حکم دوتو میں ساتوں سمندر کھنگال کر۔۔۔۔۔۔

مالتی: مجھے ایک اچھی سی ساڑھی لادو۔۔۔۔۔۔

کوی: (ہنستا ہے) ایک ساڑھی۔۔۔۔۔۔صرف ایک ساڑھی۔۔۔۔۔۔

مالتی: ہاں۔ صرف ایک ساڑھی جس کا کپڑا میرے بدن کے ساتھ لگ کر سرسرائے۔۔۔۔۔۔سچ مچ کی ساڑھی۔۔۔۔۔۔ میں کل نہا دھو کر یہ ساڑھی پہننے کے لیئے تیار رہوں گی۔

(وقفہ۔۔۔۔۔۔قدموں کی چاپ۔ دروازہ کھولنے اور بند کرنے کی آواز)

کوی: چلی گئیں۔۔۔۔۔۔(اپنے آپ سے باتیں کرتا ہے) ایک ساڑھی!صرف ایک ساڑھی۔۔۔۔۔۔ دنیا کے اچھے سے اچھے ملبوسات میں اس کے قدموں میں ڈھیر کردوں گا۔۔۔۔۔۔ نیلے رنگ کی ریشمی ساڑھی اور اس پر سفید تلے کی دھاریاں۔۔۔۔۔۔ایسا معلوم ہوگا آسمان کا ایک ٹکڑا نکال کر اسے چاند کی کرنوں میں لپیٹ دیا گیا ہے۔۔۔۔۔۔نہیں کالی ساڑھی ہو اور اس پر مقیش کی بندکیاں جیسے اندھیاری راتوں میں آسمان پرتاروں کا چھڑکاؤ۔۔۔۔۔۔ ایک نہیں کئی ساڑھیاں ہوں۔

(ہاں مالتی کے الفاظ دہرائے جائیں۔۔۔۔۔۔ آواز سرگوشی کے مانند ہو)

مالتی: صرف ایک ساڑھی جس کا کپڑا میرے بدن کے ساتھ لگ کر سرسرائے۔ سچ مچ کی ساڑھی۔

کوی: (چونک کر)۔۔۔سچ مچ کی ساڑھی۔۔۔(وقفہ)۔۔۔۔۔۔ تو اس میں کون سی مشکل ہے۔۔۔۔۔۔ میں ابھی لے آتا ہوں۔۔۔۔۔۔روپے۔۔۔۔۔۔روپے۔۔۔۔۔۔حاصل کرنا بھی کوئی مشکل کام ہے۔۔۔

(روپوں کی کھنکھناہٹ شروع ہو۔۔۔۔۔۔موسیقی کے ساتھ ساتھ روپے بجتے رہیں۔۔۔۔۔۔چند لمحات کے بعد یہ ٹکڑا ختم ہو جائے)

کوی: ایڈیٹر صاحب! آپ کے پرچے میں دو برس سے میرا کلام چھپتا رہا ہے۔ اس دوران میں آپ نے ہمیشہ اس کی تعریف کی ہے۔

ایڈیٹر: جی ہاں۔۔۔۔۔۔ آپ کا کلام واقعی قابل تعریف ہے۔

کوی: (خوش ہو کر)۔۔۔۔۔۔قدر افزائی کا شکریہ۔۔۔۔۔۔ آج میں آپ کی خدمت میں اپنی چھ تازہ غزلیں لے کر حاضر ہوا ہوں۔۔۔۔۔۔ ظاہر ہے کہ ان کی کوئی قیمت ادا نہیں کرسکتا۔ لیکن اس وقت چونکہ مجھے روپوں کی ضرورت ہے اس لیئے۔۔۔۔۔۔

ایڈیٹر: مجھے بے حد افسوس ہے کہ میں آپ کی خدمت کرنے سے معذور ہوں۔۔۔۔۔۔ پرچے کی آمدن اتنی قلیل ہے کہ ہر مہینے مجھے خسارہ اٹھانا پڑتا ہے۔ یہ تو زبان اور ادب کی خدمت کا شوق ہے کہ میں اس خسارے کو برداشت کررہا ہوں ورنہ۔۔۔۔۔۔

(جھانجھ کی آواز)

کوی: ۔۔۔۔۔۔مجھے یاد ہے ایک بار آپ نے میرے کلام کی خواہش کی تھی جس کو میں چند وجوہ کے باعث پورا نہ کرسکا تھا۔۔۔۔۔۔ اب میرے پاس چھ غیر مطبوعہ غزلیں موجود ہیں۔۔۔۔۔۔ چھیوں کی چھیوں نئی شاعری کا نفیس ترین نمونہ ہیں۔

ایڈیٹر: مجھے افسوس ہے کہ اس شمارے میں ان کے لیئے جگہ نہیں نکل سکتی اس لیئے کہ آپ کی شاعری کے خلاف اس میں ایک طویل مضمون شائع ہورہا ہے۔

کوی: (بگڑ کر)۔۔۔۔۔۔ میری شاعری کے خلاف۔۔۔۔۔۔ وہ کون وہ کون۔۔۔۔۔۔ وہ کون شرارت پسند ہے جو مجھ سے الجھنا چاہتا ہے؟ مجھے کسی کی کیا پروا ہے۔۔۔۔۔۔مضمون چھوٹا ہو یا بڑا اس سے میری شاعری کو کیا ضعف پہنچ سکتا ہے۔ تنقید کا جو معیار مجھے آپ کے پرچے میں نظر آتاہے اس کے پیش نظر۔۔۔۔۔۔ لیکن چھوڑیئے اس قصے کو ۔۔۔۔۔۔ کیا آپ کو میری غزلوں کی ضرورت ہے۔ یعنی معاوضہ ادا کرکے کیا آپ میری غزلیں خریدنے کے لیئے تیار ہیں۔

ایڈیٹر: جی نہیں۔۔۔۔۔۔ میں نے آج تک بڑے سے بڑے شاعر کو بھی معاوضہ ادا نہیں کیا۔۔۔۔۔۔ حضرت نواب اکبر آبادی اس وقت ہندوستان کے سب سے بڑے شاعر ہیں۔۔۔۔۔۔میں نے آج تک ان کو بھی معاوضہ ادا نہیں کیا۔

(جھانجھ کی چھنانن نن۔۔۔صرف ایک بار)

کوی: ۔۔۔۔۔۔پرسوں آپ میرے پاس سہرا کھلوانے کے لیئے تشریف لائے تھے اور شاید میں نے یہ سہرا لکھنے سے انکارکردیا تھا۔۔۔۔۔۔میں۔۔۔۔۔۔ میں اب آپ کا سہرا لکھوانے کیلیئے تیار ہوں بشرطیکہ آپ معاوضہ کچھ بڑھا دیں۔

سہرا والا: اب معاوضہ بڑھانے یا گھٹانے کا سوال ہی نہیں رہا اس لیئے کہ میں ایک اور شاعر سے نصف داموں پر سہرا لکھوا چکا ہوں اور یہ شرط ساتھ طے کی ہے کہ سہرا وہ خود پڑھے گا۔

(جھانجھ کی آواز)

کوی: (غصے میں)۔۔۔۔۔۔اور اس نابکار نے مجھے جواب دیا۔ چونکہ میں ادب اور شعر کی خدمت کرتا ہوں اس لیئے آپ کو معاوضہ ادا نہیں کرسکتا۔۔۔۔۔۔ شعر اور ادب کی خدمت۔۔۔۔۔۔ اور دنیا جانتی ہے کہ رسالہ نکالنے سے پہلے وہ نیلوفر اور بنفشہ کا شربت بیچا کرتا تھا۔۔۔۔۔۔ اور۔۔۔۔۔۔اور اس پاجی نے کہا: آپ کی غزلیں تازہ شمارے میں اس لیئے نہیں چھپ سکتیں کہ اس میں آپ کے خلاف ایک طویل مضمون شائع ہورہا ہے۔۔۔۔۔۔میرے خلاف۔۔۔۔۔۔میری شاعری کے خلاف۔۔۔۔۔۔کیا لکھے گا کوئی میری شاعری کے خلاف اور پھر اس خرافات کے پلندے میں۔۔۔۔۔۔میں نے سخت غلطی کی جو اس بھانڈ کے پاس اپنی غزلیں لے کرگیا۔۔۔۔۔۔اور۔۔۔۔۔۔اوربہت اچھا ہوا جو اس چپٹی ناک والے نے اپنا سہرا کسی حجام سے لکھوا لیا ورنہ مجھے سخت روحانی کوفت ہوتی۔۔۔۔۔۔ میں شاعر ہوں۔ بھڑبھونجا نہیں ۔۔۔۔۔۔میں۔۔۔۔۔۔میں۔۔۔

دوست: تم کن اُلجھنوں میں گرفتار ہوگئے ہو۔۔۔۔۔۔لعنت بھیجو ایسے بدذوق آدمیوں پر اور اپنا کام کیئے جاؤ۔۔۔۔۔۔ تمہاری ذات سے ملک اورقوم کو بہت سی اُمیدیں وابستہ ہیں۔۔۔۔۔۔تمہاری شاعری صرف شاعری ہی نہیں الہام ہے۔۔۔۔۔۔آنے والی نسلیں تمہارے مجسّمے تیار کریں گی۔۔۔۔۔۔ تمہیں پوجیں گی۔۔۔۔۔۔ وہ نظم جو آج کل تم لکھ رہے ہو ایک صرف وہی تمہیں قیامت تک زندہ رکھنے کے لیئے کافی ہے۔۔۔۔۔۔ دراصل تم خود اپنی قدر نہیں کرتے۔۔۔۔۔۔ تم بہت بڑے آدمی ہو، چھوٹے چھوٹے آدمیوں کی حقیر باتوں پر تمہیں غور نہیں کرنا چاہیئے۔

کوی: تم سچ کہتے ہو دوست۔۔۔۔۔۔ سچ کہتے ہو۔۔۔۔۔۔یہ میری بیوقوفی ہے جو میں ایسی حقیر باتوں پر غور کرکے اپنا قیمتی وقت برباد کرتا ہوں۔۔۔۔۔۔ مجھے اپنی نظم مکمل کرنی چاہیئے جو شاعری کی دنیا میں ایک انقلاب برپا کردے گی۔۔۔۔۔۔ میں اس کے دو بند اور لکھ چکا ہوں۔۔۔۔۔۔آج دو بند اور لکھوں گا۔۔۔۔۔۔ عنوان میں نے قائم کرلیا ہے۔۔۔۔۔۔’’اندھیارا درپن‘‘

(جھانجھ کی آواز)

(۔۔۔۔۔۔کوی کے گُنگنانے کی آواز۔۔۔۔۔۔ایسا معلوم ہو کہ شعر فکرکررہا ہے۔ دروازہ کھلنے کی آواز۔۔۔۔۔۔کوی گنگناتا رہتا ہے۔۔۔۔۔۔ دروازہ کھلنے کی آواز پھرآتی ہے۔۔۔۔۔۔)

کوی: (چونک کر)۔۔۔کون ہے؟

مالتی: میں ہوں۔۔۔۔۔۔مالتی۔

کوی: (خوش ہوکر)۔۔۔۔۔۔تم ہو۔۔۔۔۔۔ میں شعر لکھ رہا تھا اور تمہاری تصویرمیری آنکھوں کے سامنے تھی۔۔۔۔۔۔عجیب بات ہے کہ تم سے تمہارا تصور زیادہ خوبصورت ہے۔۔۔۔۔۔مگر۔۔۔۔۔۔مگر۔۔۔۔۔۔آج تو تم بہت نکھری ہوئی ہو۔ تمہارے خاکستری ہونٹ ابھی ابھی کھلے تھے تو مجھے ایسا محسوس ہوا تھا کہ ندی کے گدلے پانی میں چمکیلی مچھلیاں غوطے لگا رہی ہیں۔۔۔۔۔۔ تمہارے دانت اس وقت میرے خیالوں سے بھی کہیں زیادہ روشن ہیں۔۔۔۔۔۔اوہ مالتی میں آج کس قدر خوش ہوں۔

مالتی: آج تم اتنے زیادہ خوش کیوں ہو۔۔۔۔۔۔ کیا میرے لیئے۔۔۔

کوی: (بات کاٹ کر)۔۔۔۔۔۔ میں اس لیئے خوش ہوں کہ میری نظم آج مکمل ہو جائے گی یہ وہ نظم ہے جس کے چھپنے پر میں تمام ہندوستان میں مشہور ہو جاؤں گا۔ یہ وہ نظم ہے جو قیامت تک میرا نام زندہ رکھے گی۔۔۔۔۔۔ اب وہ وقت دور نہیں جب لوگ مجھے پوجا کریں گے۔۔۔۔۔۔اور۔۔۔۔۔۔اور میں تمہاری پوجا کروں گا۔۔۔۔۔۔ کیا تمہیں میری شہرت سے خوشی نہ ہوگی۔۔۔۔۔۔مالتی۔ تم نہیں جانتی ہو۔ میں کتنا بڑا شاعرہوں۔۔۔۔۔۔ شاعری میری کنیز ہے اس لیئے کہ میں تمہارا غلام ہوں۔۔۔۔۔۔

مالتی: ۔۔۔۔۔۔میں نہا دھو کر آئی تھی۔۔۔۔۔۔

کوئی: جبھی تم نکھری ہوئی ہو۔۔۔۔۔۔غسل۔۔۔۔۔۔خوبصورتی کے لیئے غسل بہت ضروری ہوتا ہے۔۔۔۔۔۔ صرف تمہیں دیکھ لینے سے میری آتما نکھر جاتی ہے۔۔۔۔۔۔میں سوچتا ہوں۔۔۔۔۔۔میں سوچتا ہوں اگر تم نہ ہوتیں تو۔۔۔۔۔۔تو۔۔۔۔۔۔لیکن یہ سوچ بچار بالکل فضول ہے اس لیئے کہ تم ہو۔۔۔۔۔۔اور چونکہ تم ہو اس لیئے دنیا میں میرے لیئے سب کچھ ہے۔

مالتی: تمہاری باتیں بڑی میٹھی ہیں۔۔۔۔۔۔تمہاری کویتا اور بھی میٹھی ہے۔۔۔۔۔۔ تم جب کہتے ہو:میں تاروں کی شہزادی ہوں یا تمہارے سپنوں کی ملکہ ہوں تو مجھے بڑی خوشی ہوتی ہے۔۔۔۔۔۔جی چاہتا ہے کان کھلے رہیں۔ آنکھوں میں نیند آجائے اور ساری عمر یہی کچھ سننے میں بیت جائے۔۔۔۔۔۔مگر۔۔۔۔۔۔مگر۔۔۔۔۔۔ سارا وقت یوں نہیں گزر سکتا۔ جب تم پاس نہیں ہوتے۔۔۔۔۔۔ جب تمہاری کویتا میرے کانوں میں صرف ایک بھنبھناہٹ سی بن کے رہ جاتی ہے تو میں کچھ اور سوچنا شروع کردیتی ہوں۔۔۔۔۔۔ جی اور چیزوں کے لیئے للچاتا ہے۔۔۔۔۔۔ دولت بھی تو بری چیز نہیں۔۔۔۔۔۔

کوی: (ہنستا ہے) دولت۔۔۔۔۔۔اس کے متعلق پھر کبھی نہ سوچنا مالتی۔۔۔۔۔۔ بہت بُری چیز ہے۔۔۔۔۔۔ اس سے دل و دماغ کا ہاضمہ خراب ہو جاتا ہے۔۔۔۔۔۔ اور پھر دولت اتنی اہم چیز بھی تو نہیں جو اس پر غور کیا جائے۔۔۔۔۔۔میں ہوں تم ہو۔ میری شاعری ہے۔۔۔۔۔۔دولت کی ہمیں کیا ضرورت ہے۔۔۔۔۔۔ دولت کی تو ان لوگوں کو ضرورت ہوتی ہے جو مصنوعی خوشیاں خریدنا چاہتے ہیں اور پھر محبت کرنے وا لی روحیں تو بہت اونچی ہوتی ہیں۔۔۔۔۔۔

مالتی: تم میرے لیئے ساڑھی لائے؟

کوی: ساڑھی۔۔۔۔۔۔ساڑھی۔۔۔۔۔۔ تمہیں ساڑھی کی کیا ضرورت ہے۔ یہ کپڑے بڑے اچھے ہیں۔۔۔۔۔۔دراصل۔۔۔۔۔۔دراصل۔۔۔۔۔۔ یہاں پھر اسی دولت کا سوال پیدا ہوجاتا ہے۔۔۔۔۔۔ میں تمہیں ایک نہیں کئی ساڑھیاں لادوں گا۔۔۔۔۔۔میں دولت مند بھی ہو جاؤں گا تمہارے لیئے۔۔۔۔۔۔ دولت پیدا کرنا کوئی مشکل کام نہیں۔

مالتی: تو پھر پیدا کیوں نہیں کرتے۔۔۔۔۔۔میرے ہاتھ لوہے کی مشین چلانے کے لیئے نہیں بنے تم خود کہہ چکے ہو کہ میری انگلیاں نازک تاروں میں راگ جگانے کے لیئے بنائی گئی ہیں۔۔۔۔۔۔ تم خود کئی بار اپنی کویتا میں لکھ چکے ہو کہ میں شہزادی ہوں۔۔۔۔۔۔لیکن میں شہزادی کہاں ہوں۔۔۔۔۔۔ لباس جو میں نے پہن رکھا ہے۔ کیا شہزادیوں کا ہے۔۔۔۔۔۔ سب جھوٹ ہے۔۔۔۔۔۔

کوی: مالتی تم ٹھیک سمجھی نہیں ہو۔۔۔۔۔۔ تم اس خوبصورتی کو نہیں پہنچی ہو جو اس بات میں ہے کہ ایسے لباس میں بھی تم شہزادی ہو۔۔۔۔۔۔بعض شہزادیاں شہزادیوں کے لباس میں بھی شہزادیاں معلوم نہیں ہوتیں۔۔۔۔۔۔

مالتی: یہ بات اس وقت تو بڑی اچھی معلوم ہوتی ہے پر۔۔۔۔۔۔میں جاتی ہوں۔

کوی: کہاں۔۔۔۔۔۔ابھی تھوڑی دیر اور ٹھہرو۔۔۔۔۔۔مالتی

(دروازہ کھولنے اور بند کرنے کی آواز)

کوی: (ہنستا ہے)۔۔۔چلی گئی۔۔۔(وقفہ)۔۔۔ ساڑھی۔۔۔مجھے اس کے لیئے ایک ساڑھی کسی نہ کسی طرح ضرور حاصل کرنی چاہیئے۔۔۔۔۔۔ ساڑھی میں بہت بھلی معلوم ہوگی۔۔۔۔۔۔ اس کی خواہش بے جا نہیں۔۔۔۔۔۔ یہ نظم مکمل کرلوں پھر ادھر توجہ کردوں گا(کاغذوں کی کھڑکھڑاہٹ) ساڑھی۔۔۔۔۔۔ایک نہیں کئی ساڑھیاں۔۔۔(روپوں کی کھنکھناہٹ چند لمحات تک جاری رہے۔۔۔۔۔۔پھر دوسرے سین کا مکالمہ شروع ہو۔)

سیٹھ: یہ تو کچھ بھی نہیں۔۔۔۔۔۔ وہ ساڑھیاں جو میں نے تمہارے لیئے بمبئی سے منگوائی ہیں دیکھنے کے قابل ہوں گی۔۔۔۔۔۔بنارسی ساڑھیاں بھی تمہارے لیئے آرہی ہیں۔۔۔۔۔۔ بولو اور کیا چاہیئے۔۔۔۔۔۔ دنیا کی ہر نعمت تمہیں مل سکتی ہے۔

مالتی: بس۔۔۔۔۔۔بس۔۔۔۔۔۔(ہنستی ہے)بس۔۔۔۔۔۔اتنا کافی ہے اچھا سیٹھ صاحب بتائیے۔ میں اس ساڑھی میں کیسی معلوم ہوتی ہوں؟

سیٹھ: کیسی معلوم ہوتی۔۔۔۔۔۔بڑی اچھی معلوم ہوتی ہو۔

مالتی: آپ کو تعریف کرنا نہیں آتی۔۔۔۔۔۔ چند روکھے پھیکے لفظوں سے وہ بات پیدا نہیں ہوتی۔

سیٹھ: کون سی۔

مالتی: آپ نہیں سمجھیں گے۔

سیٹھ: بھئی۔ میں تم سے پہلے بھی کہہ چکاہوں کہ میں شاعر نہیں ہوں۔۔۔۔۔۔اگر میں شاعر ہوتا تو۔۔۔۔۔۔

مالتی: (آواز بھرا جاتی ہے)۔۔۔جانے دیجئے ان باتوں کو۔۔۔۔۔۔میں۔۔۔۔۔۔میں۔۔۔۔۔۔کچھ نہیں۔۔۔۔۔۔

سیٹھ: مالتی۔۔۔۔۔۔ تم کچھ دنوں سے اداس اداس کیوں رہتی ہو۔۔۔۔۔۔کیا مجھ سے کوئی غلطی ہوگئی ہے۔۔۔۔۔۔ کیا میری توجہ میں کوئی کمی واقع ہوگئی ہے۔۔۔۔۔۔ تم مجھ سے صاف صاف کہو۔۔۔۔۔۔ میں تمہاری ہر خدمت کے لیئے تیار ہوں۔۔۔۔۔۔بولو۔ تمہیں کیا چاہیئے۔۔۔۔۔۔ کشمیر چلو گی۔۔۔۔۔۔

مالتی: مجھے کوئی تکلیف نہیں ہے۔۔۔۔۔۔ اور سچ پوچھئے تو مجھے تکلیف صرف اس بات کی ہے کہ اب مجھے کوئی تکلیف نہیں ہے۔۔۔۔۔۔ آپ نے میری ہر خواہش پوری کی ہے۔۔۔۔۔۔ اس سے زیادہ میں آپ سے مانگ نہیں سکتی اور نہ اس سے زیادہ آپ دے سکتے ہیں۔۔۔ لیکن میں خوش ہوں(رونی آواز میں۔۔۔۔۔۔یہ ظاہر کرتی ہے کہ اسے کوئی دُکھ نہیں)۔۔۔میں بہت خوش ہوں(ایکا ایکی پھوٹ پھوٹ کر رونا شروع کردیتی ہے)

(رونے کی یہ آواز آہستہ آہستہ ذیل کے گیت میں تحلیل ہو جائے)

کوی: ۔۔۔۔۔۔خلش میں مزا ہے نہ غم میں مزا ہے۔

نہ اب عشق کے زیر و بم میں مزا ہے

تڑپ میں نہ اب کیف و کم میں مزا ہے

۔۔۔عجب زندگی ہے

جو آہیں بھروں بھی تو تسکیں نہیں ہے

دعائیں کروں تو بھی تسکیں نہیں ہے

یقیناً مروں بھی تو تسکیں نہیں ہے

۔۔۔عجب زندگی ہے

یہ رنگین منظر بھی بے کیف سے ہیں

قسم ہے گل تر بھی بے کیف سے ہیں

وہ بام اور وہ دربھی بے کیف سے ہیں

۔۔۔عجب زندگی ہے

زمانے کی رنگت سے گھبرا رہا ہوں

ہر ایک رنج و راحت سے گھبرا رہا ہوں

کسی کی محبت سے گھبرا رہا ہوں

۔۔۔عجب زندگی ہے

(گیت ختم کرنے کے بعد ٹھنڈی سانس لیتا ہے اور کہتا ہے’’عجب زندگی ہے‘‘)

دوست: ۔۔۔۔۔۔تمہارا دل جل رہا ہے۔۔۔۔۔۔ اس گیت سے جلے ہوئے دل کی بو آتی ہے۔

کوی: میرا کوٹ جل رہا ہوگا۔۔۔۔۔۔میں سگریٹ جو پی رہا تھا۔

دوست: اپنے آپ کو دھوکا کیوں دیتے ہو۔۔۔۔۔۔تمہیں آج تک کبھی کوٹ نصیب بھی ہوا ہے۔۔۔۔۔۔یہ تمہارا دل جل رہا ہے۔

کوی: جلنے دو۔۔۔۔۔۔ مجھے یہ بتاؤ کہ یہ ریشمی ساڑھی کیسی ہے۔۔۔۔۔۔ ٹھہرو میں تمہیں کھول کر دکھاتا ہوں(کاغذ کی کھڑکھڑاہٹ)۔۔۔ہاتھ مت لگانا میلی نہ ہو جائے۔

دوست: میں پوچھتا ہوں تمہارا دماغ تو نہیں بہک گیا۔ یہ ہر دوسرے تیسرے دن تم کس کے لیئے ساڑھی خرید لاتے ہو۔۔۔۔۔۔کیا اب کسی اور سے آنکھ لڑائی ہے؟

کوی: نہیں تو۔

دوست: تو پھر یہ ساڑھیاں کیوں خریدی جارہی ہیں؟

کوی: مالتی کے لیئے۔

دوست: مالتی کے لیئے؟

کوی: ہاں مالتی کے لیئے۔۔۔۔۔۔ دراصل آج کل میں ایک بڑے دلچسپ کھیل میں مشغول ہوں۔۔۔۔۔۔شعروں کو ساڑھیوں میں تبدیل کررہا ہوں۔۔۔۔۔۔ شعر بیچتا ہوں۔ ساڑھیاں خریدتا ہوں۔

دوست: شعر بیچتے ہو اور ساڑھیاں خریدتے ہو؟

کوی: ہاں، شعر بیچتا ہوں اور ساڑھیاں خریدتا ہوں۔۔۔۔۔۔ کیا یہ دلچسپ کھیل نہیں۔۔۔ایک بڑا اچھا گاہک مجھے اتفاق سے مل گیا ہے۔۔۔۔۔۔اس کے پاس ساڑھیاں تھیں مگرشعر نہیں تھے۔ میرے پاس شعر ہیں مگر ساڑھیاں نہیں تھیں۔۔۔۔۔۔اب ہم دونوں ایک دوسرے کے گاہک بن گئے ہیں۔۔۔۔۔۔اور دوست سچ کہتا ہوں سودا بڑی ایمانداری سے ہورہا ہے۔۔۔۔۔۔وہ نہ جانے میرے شعروں کو کہاں استعمال کرتا ہے۔ لیکن میں تو اس کے دیئے ہوئے پیسوں سے ساڑھی خرید رہا ہوں اور عیش کررہا ہوں۔(دیوانہ وار ہنستا ہے۔ جس میں دُکھ کا اظہار بھی ہے) عیش کررہا ہوں۔۔۔۔۔۔ وہ جو میرے اندر شاعر گھسا ہوا ہے۔ اس کو ہرروزباہر نکالتا ہوں اور اس کی بے عزتی کرتا ہوں۔۔۔۔۔۔ اس کو اپنے سامنے کھڑا کرتا ہوں اور اس سے کہتا ہوں’’تو اپنے آپ کو عقل مند سمجھتا ہے۔۔۔۔۔۔یہ تیری غلط فہمی ہے۔ تو پرلے درجے کا بیوقوف ہے۔۔۔۔۔۔تو اپنے آپ کو فطرت کا راز داں سمجھتا ہے۔۔۔۔۔۔تو سمجھتا ہے کہ تیرے تخیل میں دنیا کی تمام وسعتیں سمٹی ہوئی ہیں۔۔۔۔۔۔تو ہر راز سے واقف ہے مگر واقعہ یہ ہے کہ تجھے ایک چھوٹا سا رازبھی معلوم نہیں ہوا کہ عورت پہلے عورت ہے بعد میں وہ خیالوں کی ملکہ اور سپنوں کی شہزادی بنتی ہے۔۔۔۔۔۔تو مسخرا ہے۔۔۔بھانڈ ہے۔۔۔۔۔۔ سمجھا!تو کچھ بھی نہیں ہے۔۔۔۔۔۔جامیری آنکھوں سے دُور ہو جا‘‘۔۔۔۔۔۔ میں اب شاعر کوسزادے رہا ہوں۔۔۔شعر بیچتا ہوں۔ ساڑھیاں خریدتا ہوں۔۔۔۔۔۔شاید۔۔۔۔۔۔شاید۔۔۔۔۔۔شاید وہ کسی روز واپس آجائے۔۔۔۔۔۔ جب تک میں بہت سی ساڑھیاں جمع کرلوں گا۔۔۔۔۔۔لیکن میں سوچتا ہوں وہ میرے شعر جمع کرکے کیا کرئے گا۔۔۔۔۔۔

(موسیقی کا ایک ٹکڑا شروع ہو۔۔۔۔۔۔ذیل کا مکالمہ اس ٹکڑے پر سپر امپوز کیا جائے)

سیٹھ: مالتی۔

مالتی: مجھ سے کچھ کہا آپ نے۔

سیٹھ: ہاں۔۔۔۔۔۔لو دیکھو۔میں آج تمہارے لیئے کتنی اچھی چیز لایا ہوں۔

مالتی: آپ ہمیشہ میرے لیئے اچھی چیزیں ہی لایا کرتے ہیں۔

سیٹھ: نہیں۔۔۔۔۔۔ خاص کرکے یہ چیز بہت ہی اچھی ہے۔۔۔۔۔۔ تمہیں کویتا کا شوق ہے نا۔۔۔۔۔۔

مالتی: ہاں کبھی تھا۔۔۔۔۔۔کبھی سُنا کرتی تھی۔

سیٹھ: میں تمہیں سُناتا ہوں۔۔۔۔۔۔پھر تم باجے پر اسی چیز کو گانا۔

(ذیل کے اشعار پڑھتا ہے)

یہ کون آیا یہ کون آیا

یہ میری دنیا پر چھانے

یہ کچھ کھونے یہ کچھ پانے

یہ بل کھاتا یہ شرماتا

مالتی:

یہ کون آیا یہ کون آیا

آنکھوں میں شرارت اور شوخی

شوخی میں ہے برق کی طراری

جو دیکھ کے مجھ کو اٹھلایا

یہ کون آیا یہ کون آیا

سیٹھ: تمہیں تو یہ گیت پہلے ہی سے یاد ہے۔۔۔۔۔۔کیا پڑھ چکی ہو کہیں۔

مالتی: (چونک کر)۔۔۔سیٹھ صاحب۔ یہ کویتا آپ کہاں سے لائے ہیں۔ یہ کویتا آپ کو کس نے دی۔۔۔۔۔۔مجھے یہ گیت سارا زبانی یاد ہے۔

سیٹھ: میں نے یہ گیت اور ایسے بہت سے گیت تمہارے لیئے خریدے ہیں۔تمہیں پسند ہوں تو اور بھی آجائیں گے۔

مالتی: (دیوانہ وار)۔۔۔۔۔۔خریدے ہیں۔۔۔۔۔۔خریدے ہیں۔۔۔۔۔۔وہ مجھے بیچ رہا ہے۔۔۔۔۔۔وہ مجھے بیچ رہا ہے۔۔۔۔۔۔اس کو روکیئے۔۔۔۔۔۔سیٹھ صاحب اس کو روکیئے۔۔۔۔۔۔وہ مجھے بیچ رہا ہے(رونا شروع کردیتی ہے)۔۔۔۔۔۔وہ مجھ سے انتقام لے رہا ہے۔۔۔۔۔۔وہ مجھے بیچ رہا ہے۔

(فیڈ آؤٹ)