بشیر بدر کے شعری سرمائے کے مطالعہ سے پتہ چلتا ہے کہ وہ دور جدید کے ان شعراء میں شامل ہیں جن کے ذریعہ اردو غزل نئے نئے تجربات کی منزلوں کو طے کرتے ہوئے اکیسویں صدی کی طرف گامزن ہے اور اس میں فکری موضوعاتی، لفظی، اسلوبیاتی غرض کہ ہر قسم کی تبدیلیاں رونما ہو رہی ہیں۔ ان کی شاعری میں روایت سے رشتہ ملتا ہے ، عصری تقاضوں کا احساس اور نئی تبدیلیوں پر نظر ہے ، انھوں نے روایتی مضامین کو بھی نئے انداز اور نئے مفاہیم سے برتا ہے ، بشیر بدر کا اپنا اسلوب اور آہنگ ہے جو لفظی پیکر تراشی نئی تخلیقی لفظیات کے استعمال، علامتی صورت گری جدید نادر تشبیہات اور استعارات سے مل کر بنتا ہے ۔بشیر بدر کا پہلا شعری مجموعہ "اکائی" ہے جس پر اردو اکیڈمی لکھنؤ کی طرف سے ایوارڈ بھی ملا ۔ دوسرا شعری مجموعہ " امیج " ہے جس پر بھی ان کو اردو اکیڈمی لکھنؤ نے ایوارڈ سے نوازہ ،حکومت ہند کی جانب سے ان کی شعری خدمات کے عوض پدم شری ایوارڈ سے بھی نوازا گیا ہے ۔زیر نظر کتاب میں بشیر بدر کی شخصیت اور فن کو محور بنا کر بہت سارے مضامین جمع کئے گئے ہیں۔ جن میں بشیر بدر کی شخصیت اور فن کو اجاگر کیا گیا ہے۔