"دیوان بیدار" شاہ میر محمدی بیدار دہلوی کا مجموعہ کلام ہے، جس کو محوی صدیقی نے بڑے اہتمام سے مرتب کیا ہے، مرتب نے مقدمہ میں بیدار دہلوی کے سلسلے میں اہم معلومات فراہم کی ہیں۔ محمدی بیدار دہلی کے نامور شعراء میں سے تھے، وہ اٹھارویں صدی کے نصف آخر کے اہم ترین شعراء میں ہیں، لیکن ان کی وفات (1794) کے بعد زیادہ دنوں تک ان کی شہرت باقی نہیں رہی، اردو تذکروں میں ان کے احوال اور کلام پر گفتگو ملتی ہے۔ فارسی اور اردو دونوں زبانوں میں بیدار کلام موجود ہے، جو اس مجموعہ میں شامل ہے، بیدار نے غزلیں زیادہ تعداد میں کہی ہیں، اس مجموعہ میں بھی غزلیں زیادہ ہیں، اس کے علاوہ مخمس مسدس اور رباعیات بھی شامل ہیں، تصوف و سلوک اور معرفت خداوندی غزلوں کے اہم مضامین ہیں۔ غزلوں کی زبان سادہ و ششتہ ہے، مشکل الفاظ کا استعمال نہیں کیا گیا ہے، دیوان اردو کے بعد دیوان فارسی ہے، اس میں غزلیں رباعیات، ترجیع بند شامل ہیں، نعت اور قصیدہ بھی شامل ہے، بزرگان دین کی وفات کے تعلق سے تاریخی قطعات موجود ہیں، اور مثنویاں ہیں، جن میں اولیاء کرام اور صوفیاء عظام کی تعریف کی گئی ہے، اور شاعر نے ایک مثنوی میں اپنے آباء واجداد کا تذکرہ بھی کیا ہے، مجموعہ کا مطالعہ بیدار کے فن کی اہمیت کو واضح کرتا ہے۔

میر محمد بیدار:۔میر محمد علی نام ، میر محمدی کے نام سے مشہور ہوئے فارسی میں مرتضیٰ قلی بیگ فراقؔ اور اردو میں دردؔ کے شاگرد تھے ۔ بیعت مولانا فخرالدین سے تھی ۔ درویش آدمی تھے میرؔ و مرزاؔ کے مانند صفائی کلام کے دلدادہ تھے بقوف کا رنگ بھی ہے آخر عمر میں دہلی سے آگرہ چلے گئے تھے اور وہیں 1209ھ مطابق 1794ء میں وفات پائی ۔