فیوض الحرمین شاہ ولی اللہ کی روحانیت کے موضوع پراہم کتاب ہے۔جس میں شاہ ولی اللہ ؒنے 1143ھ میں اپنے حجاز کے سفر کے دوران روحانی مشاہدات اور مکاشفات کو تفصیل سے بیان کیا تھا۔اس کے علاوہ اس کتاب میں تصوف و سلوک ،تخلیق کائنات اور حکمت و فلسفہ کے اسرار و رموز پر بھی روشنی ڈالی ہے۔ شاہ ولی اللہ نے روح کی آنکھ سے بہت کچھ مشاہدہ کیا ہے۔خانہ کعبہ سے انھیں نور کی شعاعیں نکلتی نظر آئیں ،شہدائے بدر کی قبروں سے نور پھوٹتا ہوا دکھائی دیا،روضہ رسولﷺ پر نور کی بہاریں دیکھیں ۔حضرت شاہ ولی اللہ نے تقریبا دو سال مکہ معظمہ اور مدینہ منورہ میں قیام کیا ۔اس قیام کے دوران قلب و روح کی آنکھوں سے جو کچھ دیکھا ۔اس کا روح پرورمناظر "فیوض الحرمین"میں بیان کیے ہیں۔اس کتاب میں چالیس سے زائد مشاہدات ہیں۔جو علمائے کرام اور اہل سلوک کے لیے مشعل راہ ہیں۔شاہ صاحب نے اپنے چند خواب بھی اس کتاب میں نقل کیے ہیں۔ اس کتاب کے مطالعے سے اس بات کا بھی علم ہوتا ہے کہ درود شریف کے پڑھنے سے اللہ کا قرب کیسے حاصل کیا جاسکتا ہےاور درود شریف جتنی محبت ،خلوص، ادب و احترام ،اور مکمل توجہ سے پڑھا جائے اسی قدر نبی پاک ﷺ خوش ہوتے ہیں۔یہ کتاب دل و دماغ کو روشن کرنے والی ہے۔جس کا مطالعہ سے قاری کو عشق رسول ﷺ سے متعلق ابھرنے والے مختلف سوالات کے جوابات مل جاتے ہیں۔

شاہ ولی اللہ محدث دہلوی برصغیر کے نامور عالم دین گزرے ہیں۔ شاہ ولی اللہ 21 فروری 1703ء کو مظفرنگر بھارت میں ہیدا ہوئے اور 20 اگست 1762ء کو دہلی میں وفات پائی۔ شاہ ولی اللہ ہند و پاک کے نامور عالم دین، الہیات داں، فلسفی اور محدث گزرے ہیں۔ انہوں نے سات سال کی عمر میں قرآن حافظ کیا۔ ان کے والد شاہ عبدالرحیم محدث دہلوی بھی اپنے عہد کے مایہ ناز محدث تھے۔ انہیں سے اکتساب فیض کیا اور بیعت و خلافت بھی پائی۔ شاہ ولی اللہ نقشبندیہ ابوالعلائیہ کی پیروی کیا کرتے تھے۔ شاہ ولی اللہ محدث دہلوی نے قرآن پاک کا فارسی میں ترجمہ بھی کیا ہے۔ اس کے علاوہ علم تفسیر، علم حدیث، علم فقہ، علم تاریخ اور تصوف پر بھی کتابیں لکھیں مگر ان کو شہرت ان کی کتاب حجۃ اللہ البالغہ سے ملی۔ شاہ ولی اللہ نے بحیثیت داعی بھی بڑے بڑے کارنامے انجام دیئے۔ سماج کی برائیوں کو دور کیا اور معاشرے میں پھیلنے والی غلط فہمیوں کو حکمت و دانائی سے ختم کیا۔