فورٹ ولیم کالج کے شعبہ ہندوستانی کے سربراہ میں سے سرِ فہرست ڈاکٹر جان گلکرسٹ کا نام ہے۔ وہ 1759ء کو ایڈنبرا (اسکاٹ لینڈ) میں پیدا ہوئے۔ وہ بطور ڈاکٹر ہندوستان آئے۔ اور یہاں اس وقت رائج اردو زبان (ہندوستانی) سیکھی کیوں کہ اس کے بغیر وہ یہاں اپنے پیشے کو بخوبی سر انجام نہیں دے سکتے تھے۔ بعد میں فورٹ ولیم کالج کے آغاز کا سبب بنے۔ جان گلکرسٹ نے چار سال تک اس کالج میں خدمات سر انجام دیں اور 1804ء میں وہ وظیفہ یاب ہو کر انگلستان چلے گئے۔ جہاں اورینٹل اِنسٹی ٹیوٹ میں اردو کے پروفیسر مقرر ہوئے، 9 جنوری 1841ء کو پیرس میں انتقال کر گئے۔ جان گلکرسٹ نے اردو کے لئے عظیم خدمات انجام دیں۔ ان کے عہد میں بہت سی کتابیں تالیف یا ترجمہ کی گئیں جو جدید اردو اور ہندی کی اولین نثری کتابیں ہیں۔ وہ فورٹ ولیم کالج کے اولین سربراہ تھے ۔ مصنف نے ان پر کتاب لکھ کر انہیں گوشہ گمنامی سے باہر نکالا ہے۔ اس کتاب میں گل کرسٹ اور ان کے عہد کا تفصیلی جائزہ لیا گیا ہے ۔ ان کا ادبی مرتبہ،ان کے دور میں تصنیفات و تالیفات، مدرسے اور فورٹ ولیم کالج جیسے عناوین کے علاوہ ضمیمے میں کچھ اہم پہلوؤں کو لیا گیا ہے اور اس میں ادبیات کے تعلق سے بسیط کلام ہوا ہے۔