زیر نظر کتاب میں اقبال کے خطبات کا جائزہ لیا گیا ہے۔ ان کی خوبیوں اور ان سے نکلنے والے مضامین و نکات پر روشنی ڈالی گئی ہے۔ یہ خطبات مدراس، بنگلور ، حیدرآباد اورعلی گڑھ میں پڑھے گئے تھے جن میں علم و روحانی حال، تصور باری اور نفس انسانی کے عنوانات ہیں ۔ کتاب میں تین عنوانات ہیں " خطبات علامہ اقبال اسلامی نقطہ نظر سے " اس میں تصور ذات باری ، صفات الیٰہیہ اور وحدۃ الوجود جیسے خالص مذہبی ایشو کو نئے انداز میں پیش کیا گیا ہے۔ دوسرا عنوان " خطبات پر اعتراضات اور ان کا جائزہ" میں جنت و دوزخ اور قرآن میں روح کا ذکر جیسے دقیق مسائل کو لیا گیا ہے اور تیسرا عنوان "اجتہاد کےمتعلق اقبال کا نقطہ نظر " ہے اور آخر میں "خاتمہ" شامل کیا گیا ہے ۔ علامہ اقبال کے ان خطبات کے ذریعہ عصر حاضر کو اسلامی حقائق سے آشنا کرنے کی راہ دکھائی گئی ہے۔ ان خطبات سے اسلامی پیغام رسانی میں علامہ کے تفکرات کا اندازہ ہوتا ہے،وہ یہ کہ اسلام کی فلسفیانہ روایات کو ملحوظ رکھتے ہوئے جدید افکار سے استفادہ کیا جانا چاہئے۔