کبیر داس کی زندگی کے انگنت پہلو ہیں جن پر گفتگو نہ صرف جاذب نظر ہے بلکہ اس سے کئی طرح کے پہلو نکل کر سامنے آتے ہیں۔ ان کی زندگی اول سے ہی مختلف فیہ رہی ہے جہاں پر اگر وہ ایک طرف لوگوں کو خیر کی صلاح دیتے ہیں، وہیں دوسری طرف وہ لوگوں کو سماج میں پھیلی ان وڈمبناؤں سے نکالنے کی کوشش کرتے ہیں، جو صدیوں سے ان کی گھٹیوں میں پڑی ہوئی تھیں۔ اسی طرح سے اس کی شاعری بھی عوام کو جگہ جگہ پر چیلنج کرتی اور انہیں خرافات مزعومہ سے روکتی ہے جو ان کو بھلی معلوم پڑتی ہے۔ اگر وہ ایک طرف مذہبی لوگوں کی آنکھوں میں چبھتے ہیں تو دوسری طرف وہ آزاد خیال لوگوں کے یہاں ایک مہاتما کی حیثیت سے جانے جاتے ہیں۔ اس کتاب میں کبیر کی زندگی اور ان کی شاعری کے مختلف پہلوؤں کو اجاگر کیا گیا ہے۔ چونکہ کبیر داس کو مشترکہ ہندوستانی سماج ورثہ میں ملا تھا۔ اس لئے ان کا کلام اسی مشترکہ سماج، تہذیب و ثقافت کا عکاس ہے۔ اس سوانح حیات میں کبیر کی شاعرانہ خصوصیات کو بھی اجاگر کیا گیا ہے۔ توحید، خدمت خلق، محبت و خلوص کبیر داس کے کلام کے اہم موضوعات ہیں۔ جس کے ذریعہ کبیر داس نے محبت و خلوص کا درس عام کیاہے۔