ہندوستان زمانۂ قدیم سے ہی اپنی رنگارنگ اورمتنوع تہذیب وثقافت کے لیے پوری دنیا کی توجہ کا مرکزرہا ہے۔ یہاں کی زمینی پیداوار اور جغرافیائی حالات، علم وادب اور تہذیب وثقافت، آب وہوا، مناظر فطرت وغیرہ دنیا کے لیے توجہ کا مرکز رہے ہیں۔ زیر نظر کتاب "مختصر تاریخ ثقافت ہند" عبد اللطیف صاحب کی تصنیف ہے۔ اس کتاب میں ہندوستانی تہذیب و ثقافت کا جو خاکہ پیش کیا گیا ہے وہ تین حصوں میں تقسیم کیا گیا ہے، پہلے حصے میں ماقبل آریائی تہذیب پر آریاوؤں کے اثرات اور ہند آریائی تہذیب کا تذکرہ ہے، دوسرے حصے میں ہند آریائی تہذیب پر اسلامی اثرات سے بحث کی گئی ہے، اور تیسرے حصے میں اس کی آخری منزل کا ذکر جس میں مغربی اثرات کی بدولت اس میں مزید اضافہ اور ترقی عمل میں آئی، اس کا ذکر ہے۔ اس کتاب کے مطالعہ سے قاری کے ذہن میں ہندوستان کے ثقافتی سرمائے کی ایک مکمل تصویر واضح ہوجاتی ہے اور قاری کو پرانے ثقافتی ورثے سے آشنائی ہوتی ہے۔