اس کتاب میں ہر دور کے مستند شعراء کے چیدہ چیدہ اشعار اور ان کی خصوصیات کا ذکر ہے۔ اس میں پانچ قسم کے اشعار کو شامل کیا گیا ہے۔ َ قصائد ، مراثی ، مختلف نظمیں، غزلیات اور رباعیات۔ خاص بات یہ ہے کہ ہر نئی قسم کی نظم سے پہلے نظم کی قسم، اس کی تعریف وغیرہ بھی لکھ دی گئی ہے۔ متروکہ الفاظ کے متعلق نوٹ لکھا دیا گیا ہے، کسی واقعہ کی طرف اشارہ ہے تو حاشیے میں اس واقعہ کا ذکر کردیا گیا ہے اور اگر کوئی مشکل لفظ ہے تو اس کی تشریح بھی کردی گئی ہے۔ آخر میں تمام مصنفین کے سوانح حیات اور ان کے طرز تحریر کے متعلق نوٹ لکھ کر بطور ضمیمہ شامل کیا گیا ہے۔انتخاب میں اس بات کی کوشش کی گئی ہے کہ پڑھنے والے کی اخلاقی، تمدنی ، عمرانی، روحانی اور ادبی رہنمائی ہو۔

نسیم امروہوی
نام سید قائم رضا، تخلص نسیم۔۲۴؍اگست ۱۹۰۸ء کو امروہہ میں پیدا ہوئے۔ الہ آباد بورڈ اور پنجاب یونیورسٹی سے منشی ، کامل ، مولوی، عالم، فاضل ادب (مع انگریزی) فاضل فقہ اور نوراللہ فاضل کی اسناد حاصل کیں۔ شروع میں انھوں نے قائم تخلص رکھا۔ ۱۹۲۳ء میں نسیم تخلص اختیار کیا۔ ہندوستان سے ہجرت کرکے ۱۵؍مئی ۱۹۵۰ء کو لاہور آگئے۔ اردو کی سب سے بڑی لغت کی تعمیر وتشکیل کے سلسلے میں اپریل ۱۹۶۱ء سے ترقی اردو بورڈ کراچی سے ان کا تعلق قائم ہوا۔ یہاں انھوں نے ۱۸برس تک اردو لغت کی تحقیق وتدوین میں کام کیا۔ یکم ستمبر۱۹۷۹ء کو اس ادارے سے ریٹائر ہوگئے ۔ اس کے بعدانھوں نے کراچی کی سکونت ترک کرکے کوٹ ڈیجی(سندھ) کا رخ کیا۔ انھوں نے تمام صنف سخن میں طبع آزمائی کی ، لیکن ان کا اصل میدان مرثیہ ہے ۔ وہ سو سے زیادہ مرثیے کہہ چکے ہیں۔ انھوں نے متعدد علمی وادبی کتابیں تصنیف کیں۔ ۲۸؍فروری ۱۹۸۷ء کو کراچی میں انتقال کرگئے ۔ آپ کی تصانیف کے نام یہ ہیں: ’روح انقلاب‘، ’ساز حریت‘، ’برق وباراں‘(طویل مسدس)، ’نسیم اردو‘، ’نسیم اللغات‘، ’رئیس اللغات‘، ’مراثی نسیم‘(حصہ اول ،دوم، سوم) ، ’تاریخ خیر پور‘، ’فرہنگ اقبال‘(اردو)، ’فرہنگ اقبال‘(فارسی)۔

بحوالۂ:پیمانۂ غزل(جلد اول)،محمد شمس الحق،صفحہ:410