کتاب کے موضوع پر ایک مقالہ لکھنو یونیورسٹی میں لکھا گیا تھا۔ اس پر پی ایچ ڈی کی ڈگری تفویض ہوئی، اب اسی مقالے کو کتابی شکل میں پیش کیا جارہا ہے۔ مقالہ نگار شعبہ اردو دہلی یونیورسٹی میں لکچرر رہی ہیں۔ان کے چالیس سے زیادہ افسانے ہندو پاک کے ادبی رسائل اور آل انڈیا ریڈیو سے نشر ہو چکے ہیں ۔ مصنف نے اپنی اس کتاب میں پریم چند کے ناولوں میں نسوانی کردار کا جائزہ پیش کیا ہے۔ پریم چند ایسے ادباء میں سے ہیں جن کی تحریر میں انسان دوستی اور سماجی خیر کا جذبہ صاف جھلتکا ہے ۔ ان کے ناولوں میں نسوانی کردار سیدھی لیک پر چلتا ہے اور پورا کردار ادھر ادھر بھٹکنے کے بجائے کردار نگاری پر مرکوز ہوتا ہے ۔ مصنف نے اس کتاب میں سات ابواب قائم کیے ہیں۔ پہلے باب میں ہندوستانی سماج میں عورت کا جائزہ پیش کیا ہے اور دوسرے باب میں پریم چند کے ناولوں میں کردار نگاری پر بات کی ہے جبکہ تیسرے باب میں مشترکہ خانداں اور بیوہ کے مسائل پر اور چوتھے باب میں طوائف اور گری ہوئی عورتیں زیر بحث آئی ہیں جبکہ پانچویں باب میں عورت سماجی کارکن کی حیثیت سے اور چھٹے باب میں عورت کے عام مسائل اور کردار کو بتایا گیا ہے ۔ ساتواں باب خلاصہ اور نتائج پرمبنی ہے اور آخر میں کتابیات کے تحت فہرست دی گئی ہے۔

شمیم نکہت مشہورترقی پسند، فیمنسٹ افسانہ نگار اور ادیبہ تھیں۔ لکھنؤ کے ایک بڑے کاروباری گھرانےمیں پیدا ہوئیں۔ مشہورادیب اورنقاد شارب ردولوی کی رفیق حیات تھیں۔ ابتدا سے بی اے تک کرامت حسین گرلس کالج، لکھنؤمیں تعلیم حاصل کی۔ ایم اے، لکھنؤ یونیورسٹی سےکیا اور پروفیسراحتشام حسین کی نگرانی میں’پریم چند کے ناولوں میں نسوانی کردار‘ کےموضوع پر ایچ ڈی کی ڈگری حاصل کی۔ شعبہ اردو، دہلی یونیورسٹی میں پروفیسراور صدرشعبہ رہیں۔ کئی کتابوں کی مصنف تھیں: پریم چند کے نالوں میں نسوانی کردار(پی ایچ  ڈی مقالہ)، دو آدھے (افسانوں کا مجموعہ)، تاثرات (مضامین کا مجموعہ)، دھند میں چہرے (خاکے، ریڈیو نشریے، افسانے، مضامین)، بچوں کی صحبت (انگریزی سے ترجمہ)۔ انھوں نے اردو کےابتدائی اور غیر مادری زبان کےطلبا کے لئے بھی کئی کتابیں لکھیں۔ اتر پردیس، بنگال، دہلی اور بہاراردو اکادمیوں نے ان کی کتابوں پر ایوارڈ پیش کئے۔ پاکستان اور لکھنوکی کئی ادبی تنظیموں کی طرف سے اعزازات سے نوازی گئیں۔