رسالہ تہذیب الاخلاق سر سید احمد خاں کا ایک ایسا کارنامہ ہے جس پر صدیاں ناز کرتی رہیں گی۔ ایک ایسا رسالہ جس نے اردو زبان کے رخ کو موڑ دیا، لیکن اس سے بھی خوبصورت بات یہ ہے ان کی رحلت کے بعد یہ رسالہ آج بھی اپنی پوری آب و تاب کے ساتھ علی گڑھ مسلم یونیورسٹی سے جاری و ساری ہے۔ زیر نظر رسالہ اسی زندہ روایت کا ایک خاص نمبر ہے جس میں ان تمام مشاہیر علی گڑھ کا علمی وعملی خدمات کا تفصیلی تذکرہ موجود ہے جنہوں نے علی گڑھ کے نام کو نامۂ جاوید میں رکھ دیا۔ اس سے قبل اسی عنوان سے اس کی دو جلدیں منظر عام پر آ چکی تھیں جن میں ان مشاہیر کا ذکر تھا جو ابھی بقید حیات ہیں، مذکورہ شمارے میں مرحومین کا ذکر ہے۔ جن میں وہ مشاہیر بھی شامل ہیں جو تقسیم کے وقت پاکستان جا بسے۔ اس شمارے کی اہمیت کا اندازہ اس بات سے لگایا جا سکتا ہے کہ اس میں جتنی بھی شخصیات کا ذکر کیا گیا ہے انہوں نے ایک نسل کی ذہنی اور علمی آبیاری کی ہے۔ اس میں شامل کئی تو ایسے بھی ہیں جو آج بھی اپنے اپنے فن میں نہ صرف یہ کہ یکتا ہیں بلکہ انہیں سند کا درجہ حاصل ہے۔