عرفان ستار ایک قادر الکلام شاعر ہیں انہوں نے مختصر ترین بحروں کے علاوہ طویل ترین بحروں میں بہت رواں اشعار کہے ہیں جن میں حیرت انگیز طور پر بعض اوقات ان کے عام بحروں والے اشعار سے زیادہ روانی ہے۔"تکرار ساعت "عرفان ستار کا پہلا شعری مجموعہ ہے ، عرفان ستار زبان کے شاعر ہیں اور الفاظ کی نشست و برخاست سے شعر کہتے ہیں ،عرفان ستار کا خیال ہے کہ شاعری ، خواص کی چیز ہے عوام کی نہیں۔اِسی لئے عرفان ستار کی شاعری میں خواص کے لہجے کی کھنک نمایاں ہے ،ان کے اسلوب میں جدید حسیت معنوی سطح پر تو نمایاں ہے مگر خارجی طور پر اُنکی شاعری قدامت یا کلاسیک کا پیرہن ہی پہنے رکھتی ہے۔

نام عرفان ستار اور تخلص عرفان ہے۔فروری۱۹۶۸ء میں کراچی میں پیدا ہوئے ۔ ابتدائی تعلیم لیبیا میں حاصل کی۔ کراچی آکر ایم بی اے اور ایم ایس کیا۔ تعلیم سے فارغ ہونے کے بعد دواؤں کی کمپنی میں چیف ایگزیکیٹو کے عہدے پر فائز ہیں۔شاعر ی کا آغاز ۱۹۹۰ء میں ہوا۔ جو ن ایلیا سے مشورہ سخن کیا۔ ’’تکرار ساعت‘‘ کے نام سے ان کا شعری مجموعہ شائع ہوگیاہے۔ بحوالۂ:پیمانۂ غزل(جلد دوم)،محمد شمس الحق،صفحہ:446